مشكلتي .. بليز الكل يدش :(

السلام عليكم

شحالكم خواتي

انا من فتره اتابع المنتدى .. وايد استفدت منه


وسجلت عشان اقولكم مشكلتي اللي اعاني منهااا

وانا متاكده ان شالله انكم مابتقصرون معاي


خواتي انا مالجه (كاتبه كتابي) من 3 شهور تقريبا .. وكنت اكلم ريلي فتره الخطبه يعني تقريبا متعودين ع بعض


المشكله انه اول ماخطبني .. كان يهتم فيني ودايما يسال عني وكل مره يطلب بتصل بس انا مارضا اقول خل بينا مسجات لين مانملج احسن .. المهم كان غير في تعامله معاي وكان يقولي كلام يحسسني صدق اني برتاح معاه وانه بيسعدني


المهم توكلنا على الله وملجنا على خير .. لكن تعالو شوفو الصدمه .. مايسال ولا يهتم .. كل شي عنده عادي .. حتى ماحس انه يغار علي ولا كاني حرمته .. يتصل لي 5 دقايق ويسكر ومرات تمر ايام مايتصل .. وحتى زياراته جدا قليله وانا اللي اقوله تعال .. كلمته وقلتله انت متغير وماكنت قبل جي يقولي مب متغير عادي .. وهو قبل الملجه بفتره بسيطه حسيت انه متغير شوي بس قلت ماعليه يوم بنملج بيتغير الوضع

بس للاسف يوم عن يوم يصدمني فيه وبتصرفاته وياي .. يابنات تخيلو انه حتى المصروف انا اللي اذكره فيه كل شهر ولا هو ولا ع باله ولين اليوم مافكر ايبلي هديه ع الاقل !!


ووايد اشياء بعد لو اقولكم بتستغربون .. مع اني مب مقصره فيه دوم اتصل واسال واحاول اتقرب منه و لا مره ضايقته او اذيته ويوم ايني اكشخ له وجميلة بشهاده الكل الحمدلله


والله تعبت منه مب عارفه كيف اتعامل معاه .. ع فكره عرسنا للحين ماتحدد وانا كل مافكر بالعرس وحالتنا انا وياه اخاف وايد ><


شورو علي شو اسوي

والسموحه ع الاطاله ماحصلت حد يسمعني غيركم


دعواتكم لي خواتي ><