قصة ولادتي معاناتي وفرحتي

سلام عليكم شخباركم كروشات الله يقومكم بالسلامه وترتاحو من تعب الحمل والثقل:lol:
المووهم .... حبيت اقول لكم قصة ولادتي بمفاجأتها وصعوبتها..الخ
قبل موعدي بسبوعين في الوزن خبرتني الدكتوره ان الحمد لله اموري ماشيه عال العال وان احتمال كبير اني اولد في خلال هدا الاسبوع فقلت اروح عند اهلي افضل عشان مايجيني الم الولاده واحتار شسوي في عمري مع ان عندي ولد الله يخليه انشاالله بس بعد احس روحي ماعندي خبره قعدت انتظر الفرج واشوفه طول مر اسبوع ومر الاسبوع الي بعده كان موعدي بالسونار 26/5 وبموعد الدوره2/6
تاريخ31/5 قررت ارجع بيتنا اشطب واحط اخر اللمسات وامي كانت خايفه قلت ليها بس ببات الليله والصبح برجع كانت تقول لي قلبي قارصني قلت لها لاتخافين رحت البيت وقمت انظف خلصت ونمت على الساعه 4 قمت وانتو بالكرامه بروح الحمام وانا نازله من السرير حسيت بشي منفجر من تحت الا جيس الماي منبط قمت اصيح واقعد زوجي اقوله قوم الحق الجيس انبط وانا اتنافض من الخوف الا يقول لي وعيونه مغمضه سكتي لاتقعدين الجاهل:mad:صدق فاضي<<<< نزلت بسرعه رحت الحمام واني خايفه خوف مو طبيعي طلعت الا هو مسكين مجود الفوطه وينتظرني لبست وجهزت روحي والالام كل ماجا ليها تزيد طلعت الا عمتي الله يحفضها مجهزه ليي ماي منقوع فيه كف مريم اتصلت على امي وخبرتها وكانت صاحيه تقول قلبي حاس ماعرفت انام رحنا المستشفى ويانا عمتي وولدي وزوجي دخلوني بسرعه وفحصوني كنت متوسعه 3 سم على ماركبوني فوق ردو فحصوني وصلت 6سم كنت فرحانه اقول الحمد لله الالم الي عندي مو وايد قوي وتوسعت هالكثر يعني كلها ساعتين وبولد وانا اسمع صراخ الي يولدون بره وكنت خايفه جت الدكتوره سوت لي توسعه مرت ساعه ساعتين ست ساعات وانا على ال6سم ماتوسعت اكثر اسمعهم يتكلمون ويسالون عن رقم زوجي سالتهم شصاير قالت لي الدكتوره بنركب ليش طلق صناعي ادا ماتوسعتين بنسوي ليش قيصريه:!!: ديك الحزه من الالم قلت الي بيسوونه خلا يسوه جت دكتوره ثانيه قالت لي امورش كلها زينه ادا ماتبين العميله براحتش وجا زوجي وانا اتالم قال لي مو كفايه لازم تبين تتعبين التعبين خلا يسوون العميله وخلاص استسلمت ووقعنا على العمليه لين وصلت غرفة العمليه وانا اتالم من الطلق في العمليه قالت الدكتوره برد افحصش ادا توسعتين لو بعد سانتي مابسوي العمليه وكان نفس الشي ماتوسعت وسووني العمليه(على فكره في العمليه تحسين بكل شي حتى البيبي لما يطلعونه تحسين) والحمد لله جبت بنوزته مثل القمر سميناها ملاك
ومسامحه ادري طولت وايد