ملانه

السلام عليكم ورحمة الله وبركاته

بدخل ف الموضوع على طول وأريد نصيحتكم ...

أنا تزوجت وعمري 19 سنة وأنتقلت مع زوجي على العاصمة عشان شغله هناك وكنت وايد فرحانه عشان بسكن بعيد وفالعاصمة بروحنا ....

وكان ف العاصمة أخته العودا متزوجه وساكنه من زمان وخالاته ساكنين ف مناطق شوي بعيده عنا بس نزورهم ف الأجازات والمناسبات...

بعد زواجي بشهرين تقريبا درست أنجليزي تقريبا 6 شهور وحسيت بهذي الفتره ضغط كبير أولا ... عشان أني متزوجه جديد ومتغير عليي الوضع
ثانيا... عشان افترقت عن أهلي
ثالثا... الدراسة وضغطها
رابعا... زوجي ف أول فتره كان يجيب بنت أخته الصغيره عندنا عشان أخته أونه عندها ضغط كبير من الأولاد والوظيفة وكانت شوي مريضة وأنا ما متعوده ع الأطفال ولويتهم
خامسا ... زوجي يداوم من الفجر ويرجع ع المغرب وأجلس بروحي طول هذي الفتره يوميا
حسيت بضغط كبير ...

المهم بعدين قلت بأجل الدراسة وتضايقت من أخته لآنه كان عادي عندها أنه نحن معاريس يداد وهي تحطي بنتها معنا وحسسيته أني مضايقه من بنت أخته

لاني كنت أستحي أقوله فيس ت فيس ونحن تونا معرسين

لا وبعد خواتها وأخوانها قاموا كلهم يبوا يجلسوا معنا كأنه فاتحين بيتنا سبيل المهم بعد فتره قلتله بصراحه أني ما مرتاحه منهم..وما أحب غثة الأطفال...

المهم عدت هالفتره ع خير

بعد مرور فتره ما شالله زوجي يستلم راتب حلو لكن ثلاثة أرباعه يقصه البنك ويبقالنا الربع ويادوب يعيشنا ع آخر الشهر

وأنا من النوع اللي ألبس وأكشخ وأهلي معوديني ع كذا لكن بعد زواجي كل ما أقول لزوجي أريد أروح السوق واريد أفصل عبايات يضايق ويقول ماشي فلوس
وخاطري أشتري بس أراعيه وما أشتري شي وما أطلبه شي أبدا الا بعد فتره ويوم أحس أنه خلاص لازم أشتري شي

لكن بعد فتره قام يعطي أهله 50 ريال عماني شهريا وقلت ما عليه أهله وما بنقصر فيهم ومن حقنا نعطيهم بس هنا قام ينقص من مصروف البيت

بس أنصدمت أنه بعد شهرين قام يعطيهم 100 ريال شهريا الصراحه تضايقت يعني نحن يا دوب نمشي حالنا شهريا ويعرف أنه ماشي فلوس قال عشان أرضي أهلي
أنزين وأنا اللي قاعده ع طول الوقت ف البيت أنظف وأتعب وأراعيه وما مقصره فحقه وكل اللي يريده أسويه وبالمفروض يعطيني أنا مصروف بس أنا ما أطلبه الصراحه هنا أنا تضايقت زياده وقلتله أريد أفصل عباه من زمان ما فصلت قالي تمام ولليوم ما فصلت عباه دايما يقولي تمام وبعدين ما يسويلي شي

تخيلوا مره مرينا ف أزمه وأنا طبعا ما أشتغل قلت ما نريد نزيد الديون اللي علينا رحت وبعت ذهبي وكل فلوس الذهب عطيته ليه وحرام عليي كان خذيت منهن شي ولا قال خذي شي منهن والا أشترالي شي أنا دايما أراعيه وهو مو حاس أتم بالأسبوعين لا أكلم حد ولا أشوف حد يالسه ف البيت بروحي ما أشتغل ولا ادرس وما عندي شي أسويه ملانه ومنقهره

واللي زادني موت وقهر قالي بدفع عن أخوي ف البنك 100 ريال شهريا وبعدين برجعهن ليي وألحين يدفع عن أخوه شهريا 100 ريال والله ميته من القهر شو أسوي قولولي

لا وبعد أهله معقدين وعاداتهم غير عنا

ولازم ف الشهر مرتين نروح البلاد نزور أهلنا وأنا أروح ومستحيه من كثر ما أعيد نفس العبايات والملابس اللي عليي

بس الغلط مني أنا لأني دايما أستحي وما أحب أحرج حد أو أجرحه بالكلام

كان على بالي أني بعيش مرتاحه والله لوجالسه بيت أهلي كان بجلس معززه مكرمه ولا جالسه أشوف وأنقهر...

أنا كل ما أروح أشوف خواتي وأختي اللي متزوجه كل مره بعبايه جديده وأنا عباياتي من سنه عليي والله من أرجع أجلس أصيح وهو مو هامه ومو حاس بشي أبدا

ما أريد أشكي الحال لشخص أعرفه عشان ما أريد أصغره ف عينهم أريده يبقى كبير ف عينهم







الله يخليكم قولولي شو أسوي....؟؟؟