اليوم يابنات عروس طاري على بالي أجيب لكم قصة حملي ولادتي..ببنتي (( بنين ))من 6 سنوات<<<حدي مغبره
اول مره حملت بعد شهر من زواجي مباشره<<<<منزهقه :woo: ولكن يافرحه ماتمت
شهرين وصادني التهاب مزمن في البول لدرجة اني اتبول دم وانتو بكرامه.. رحت المستشفى واني انزف دم وكانت المافجأه ان الحمل لايمكنه الاستمرار الى ان أجهضته
مهلت شهرين ... وحملت مره ثانيه وصادتني نفس القصه بالضبط.. تميت تقريبا سنه كامله واني اتعالج عن التهاب البول المتكرر ولا فاد فيني الا بعد ما سوولي عملية منظار بالمسالك البوليه وحطوا ليي هوز في الحالب:(
وبعدها بكم شهر حملت ونفس السالفه ابتدى عليي الالتهاب لكن الدكتوره اصرت عليي ان اتم في المستشفى.. وتميت هناك لما كملت الشهر الثالث.. والحمد لله تميت على سالفة اللاتهابات طول فترة الحمل وعلى طول منومه في المستشفى ارجع البيت حدي اسبوع وبعدها لازم اصير في المستشفى.. وكل ماله جسمي وينتفخ الى ان وصلت الزياده في وزني 32 كيلو ..في بداية الشهر التاسع و في ذاك اليوم قعدت الصبح الا حتى عيوني مااقدر افتحها من النفخ ..كسرت خاطر روحي وايدي مو قادره اصكها من النفخ .. التموا عليي الممرضات ونادوا الدكتوره.. شوي والا اشوف وفد من الدكاتره .. اسمع وحده تقول لازم نحط عليها طلق
صناعي والثانيه تقول لا تالي يموت البيبي عمليه احسن:woo:واني اطالعهم ومستغربه شسالفه..قالت ليي الدكتوره لاتخافين انتين ماعندش ضغط والحمد لله بس اللي صايدنش ((اوديما)) شنو هذا بعد قالت ليي تسمم حمل زياده في وزنك غير طبيعيه زايده عن المعدل بمرتين وزود:-o وهذا ايضر بالبيبي اذا مانزل البيبي احتمال يموت.. اهني ابتديت في الصياح
اقول لهم لا ما ابيها تموت خساره تعبت عليها طول هالفتره واني منومه عندكم هني..قالت ليي عندك خيارين ياعمليه يا طلق صناعي.. اهلي وام زوجي ما رضت بالعمليه وقمت وافقت على طلق صناعي وحطوا عليي الطلق الصناعي يوم ويومين وثلاثه ويوم رابع دخلوني الولاده
لان ابط كيس الماي وتوسع الرحم.. انتظروني واجد واني اتوسع و اتوسل ماخليت دعاء ومصبره نفسي
وهذا واني بروحي مسكين زوجي تعب سهر ويايي يوم كامل في غرفة الولاده وراح وتالي مره وحده حسيت اني انزف واني على نياتي اقول الحمد لله تعبت لكن الحين اكو بيطلع البيبي ومو حاسه فيه.. والمفاجأه الكبرى ان الدكتوره جت تفحصني الا طلعت معاها المشيمه ملتفه على ايدها وقامت تصرخ(( بليز نيرس هلب مي كول أنذر دكتور )) هذا اللي كنت اذكره الى ان غبت عن الوعي... وانا ماوتعيت الا في العنايه القصوى واسال اللي يمي انا ولدت والا لا..جات الدكتوره وتحمدت لي السلامه ومسحت على راسي.. وقالت ليي الحمد لله اللي الله رد لهالدنيا بعد ما تشوفي العافيه وتقومي صلي لك ركعتين وبوسي ايدك مقلوب.. انك نجيتي انتي والبيبي.. تدرون شنو صادني
من شدة تسمم الحمل اللي صادني ومع قوة الطلق الصناعي المتواصل انفصلت المشيمه عن البيبي وطلعت بروحها وتم البيبي يسبح في بطني بدون دم واكسجين..لان نزف كل الدم والاكسجين عن طريق الحبل السريوهذا حالات نادره تصير عندهم
وقالوا انهم اخر شي كانوا يتوقعونه ان البيبي يعيش والحمد لله كان اخصائي الاطفال متواجد بغرفة الاطفال الخدج المجاوره وانقذ حياتيها بسرعه اما اني فتوقفت عندي بعض الاجهزه اهمها القلب وسووا ليي انعاش قلبي رئوي ودخلوني العمليات وسووا لي عمليه قيصريه.. وبعدها خلوني في العنايه القصوى 6 ايام وبنتي في النايه القصوى 21 يوم.. ويوم اللي طلعونه من المستشفى ذبحوا ذيك الذبيحه ..وسوو ذيك العزايم
كله علشان نونتي الحلوه اللي الحين مطلعه روحي خخخخ فديتها بنتي الحلوه
وهذي صورتها.. علشان تدعوا ليها بالهدايه .. جبر لخاطرها وخاطري
ادري طولتها عليكم واجد.. بس القص اللي تصيدني كل طوال شسوي خخخخ
إذا عجبتكم قصة ولادتي بأحلى بنين لا تنسون تقيموني
وإذا حصلت تشجيع بحط قصة ولادتي بصادق الفرش
اللي كانت ماأحلاها..وفيها يوم الولاده مقالاب بعد خخخخخخخ بس حلوه