زوجي راح يخرب بنتي

السلام عليكم

انا بنتي الكبيرة عمرها سنة ونص وماخذة قلب ابوها
ما تقدر تفارقه ولا تستغني عنه ابد

مشكلتي هي ان الاب ما يرفض لها طلب ابد ابد ولو يحصل له يجيب لها كنوز الدنيا كان ما بخل عليها

يعني هي دايما تريد الانتباه وهو اي شي تريده يسويه لها بدون ما يفكر بسلبيات تصرفه الي ممكن تأثر عليها بالمدى البعيد

انا كلش كلش خايفة ان بنتي تصير صعبة السيطرة عليها لانها من هسه هي تريد تسيطر علينا

بعض الامور الي هي مسيطرة علينا بيها هي انها لهسة ما تنام الا بيناتنا انا وابوها
وزوجي دايما اقل صوت يسمعه من عندها الفجر مثلا او اي بكي ياخذها ويحضنها لين الصبح
وهالتصرف يخليها ما تقدر تتعود تنام بدونه
والشي الثاني ان ابوها دايما ينطيها الاكل الي تحبه يعني الحلويات والشغلات الي مو كلش صحية لجسمها ولمن اناقش الموضوع معاه يقول شسويلها هي ما تاكل شي غير هالشغلات بس والله بنتي مو كلش عسرة لهالدرجة بس ينراد لها شوية تعب
وانا لمن احاول بشي الاب يجر طول والام تجر عرض وطبعاً البنت ما تتعلم شي بهالطريقة
والشي الثالث انها ما تتحمل تشوفنا منشغلين شوي عنها يعني حتى على وجبات الاكل بس تشوفنا قاعدين ناكل او منشغلين عنها دايما تطلب ماي او صمون (تحب الصمون البنت) او عصير او اي شي ثاني واحيانا تطلبهم كلهم سوى تقول الاشياء واحد ورى الثاني .... مو لانها جوعانه او عطشانة بس لانها تريدنا ننتبه لها وما ننشغل عنها لانها لمن اجيب لها الماي او العصير او الصمون ما تاكل ولا تشرب... بالعكس تنحاش وتتحجج بشي ثاني
المشكلة ان الاب حتى لو يعرف انها تتحجج هم ما يتجاهلها... بالعكس يقوم ويجيب لها ماي او اي شي تطلبه وهي تكرر الطلب بدون ما تاكله وهو يكرر يستجيب لطلبها



هاي التصرفات طبعاً كلها قبل لا اولد بنتي الثانية
اما هسه لمن جبت بنتي الثانية (تقريباً صار لي شوي اكثر من اسبوع) زادت المشاكل مع بنتي الاولى
صارت تتحجج اكثر وتكثر طلبات
انفصلنا بالنوم يعني الاب هسه ينام بالصالة مع البنت الكبيرة وانا انام بالغرفة مع بنتي الصغيرة وطبعاً ما ينيمها الا وهي لازقة بيه

وهي دايما تبكي وتريدنا ثنيناتنا يمها ودايما تبكي وتقول اخت اخت
يعني تريد اختها بس طبعاً لمن نجيب لها اختها حزروا شنو يصير
تتولاها بالضرب بسبب الغيرة
زوجي لليوم ما يحب يشيل بنتي الصغيرة الا نادراً علشان ما يزعل الكبيرة

قبل يومين ضلت الكبيرة تبكي تبكي بالصالة يم ابوها وما بطلت بكي استمرت ساعة كاملة ولمن قعدت الصبح شفت انها مشمخه نفسها وطالع من وجهها شوي دم
يعني هي الغيرة جاي تخليها تأذي روحها

وتصرفات ابوها ودلعه لها كلش جاي يخربها وانا ما اعرف شلون اتصرف


لان واحد يجر طول والثاني عرض ما ينطي اي نتيجه زينة
بالعكس ممكن يخرب البنت لمن تشوف امها وابوها متناقضين

ساعدوني الله يخليكم