ما ارتاح عند اهلي ابد ابد ..

السلام عليكم ورحمة الله
مرحبا خواتي العروسات ..
هذي رسالة من صديقتي الغالية تبي دعاءكم :


اخواتي انا متضايقة جدا وبحاجة للفضفضة أحس نفسي مكتومة وضايق صدري
بقول لكم السالفة :

يا بنات انا ما ارتاح عند اهلي ابد ابد وما احب اروح عندهم كثير واذا رحت صرت على اعصابي لحد ما ارجع

عندي اخت اصغر مني من صغرها وانا معها عالحلوة والمرة .. عمرها ما احتاجت شي وما لقتني .. اخدمها بكل اللي اقدر عليه حتى بعد زواجي كنت استأذن من زوجي واروح السوق عشانها لانها ما تعرف ولا تقدر لحالها مع انها مو صغيرة بس رحمتها هي وامي وساعدتها .

ايام زواجها وتجهيزها تخيلوا تركت زوجي وولدي وسافرت معها وساهمت باجار الشقة معها ولفيت الاسواق لحد ما تقطعت رجليني عشان تكمل جهازها

والله وحنا ننقل عفشها لبيتها اني قاعدة اكوي ملابسها بنفسي ما ابي الشغالة تشوفها ويصير في نفسها شي وهي عروس .. ومع هذا طولت لسانها علي بكلمة وقحة والله دموعي تنزل وانا اكمل كوي .

وبعد ولادتها خدمتها بنفاسها وضيوفها وهي لما ولدت اقول لها تجين تصبين للناس تقول ما ادري !!! اشوف !!!

المهم هذا كله راح وقبل سنييييين طويلة لكنه اهون من اللي راح اقوله ..

المشكلة ان امي معها وبصفها ودايما تدافع عنها ولا تشوف خطاها !!
انا عصبية وحساسة ولما اشوفها لا مبالية اتنرفز واعصب وامي تزعل مني وتصير معها
وهي بعد عصبية ولسانها شين لكن عيوبها سبحان الله مخفية ..

المهم بعد هالسنين عرفت أو اقتنعت ان امي تحبها أكثر ولاحظت هذا حتى بطريقة تعاملها مع اولادها والكل لاحظ بعد ..
مع اني اخدم امي اكثر وما اقدر اشوفها محتاجة وما اساعدها حتى شغالتي تنازلت عنها وعطيتها امي عشان ما تحتاج احد وهي مستحيل شغالتها تسوي شي مو لبيتها وعيالها
وهي تستغل كل شي لصالحها وامي معطيتها الضوء الاخضر يعني الشغالة تحت امرها وانا لو اطلبها زعلت وقالت شغلي مين يخلصه !!!!
لو تتأخر ما تجي نص ساعة علطول تكلمها امي تشوف ليش تاخروا وانا بالايام ما تكلمني
حتى وانا تعبانة او عندي ظروف صحية

صارت مشاكل كثيييرة بيننا لاني صريحة وما احب الظلم وفي الاخير امي حلفت ان عمرها شافتنا نتهاوش انها تزعل علينا .. صرت اتحاشا المشاكل عشان امي ما تتعب وهي برووود الثلج لانها ما تحس ان فيه مشكلة اصلا !!

يا بنات والله ما اكذب عليكم صرت اكره أختي كرررره فظيييع بس بدون ما ابين شي
وانا احملها الخطا اكثر لانها عمرها ما وقفت معي او حسستني اني اختها او انها ممنونة لي
او ردت جميل أو ساعدتني او قالت لو بغيتي شي قولي لي .. يعني احساس الخوات هذا عمري ما عشته ابددددددا .

تعبت كثيييير وعانييييت كثير لحد ما صرت ابكي احيانا لوحدي بطريقة هستيرية من احساسي بالظلم والتفرقة

الحين احاول اتناسى لكن يجيني احساس فظيع بالالم والحزن اشوف البنات يتلهفون على اهلهم واخواتهم وانا افففف يضيق صدري ..حتى كلامها غريب كله نقد لو اقول ودي اشتري لبس معين او جزمة ما عندي قالت انتي دايما ما عندك ..تدقق بالكلام مرررة يعني الواحد ما ياخذ راحته يقعد يحسب للكلمة لو هو كلام عام .. تسجل كلامي ولو اغيره في يوم قالت انتي قبل قلتي كذا وكذا يعني كاني مراقبة ومحسوب علي وش أقول .

احيانا نهاية الاسبوع اقعد لوحدي في البيت وبالصدفة ادري انها وامي مجتمعات مع بعض في بيتها ولا قالت لي واحيانا مرتين في الاسبوع ..
اولادي يجيبوا لاولادها هدايا وهي عمرها ما قالت مشكورين بس تنقد !!

يا ناس وش جنسها هذي ؟
تعبت والله تعبت ..

ابي منكم الدعاء ان الله ياثرني وينور بصيرة أمي وهي الله حسيبها .

:o
:o