::][::

السلام عليكم ورحمة الله وبركاته
شخباركم خواتي؟

اول مره احط موضوع في هالقسم

موضوعي مشكله جارتنا مع امي


جارتنا اللي بيتهم مقابل بيتنا صارت صديقه امي يعني مو وايد من سكنو في فريجنا بس امي حست ان في احد في سنها
تروح لهم وتزورهم وتتصل فيهم ويتصلون فيها ويزورونها

وهذي جارتنا صارت لها مشكله مع خدامتهم تقول انهم لما يروحون الدوامات اتييها وحده ماتعرف من اهي وتدخلها البيت
وتطلعها قبل لا يرجعون من الدوام

عاد جارتنا قالت حق امي اذا شفتي شي خبرينا

المهم قبل فتره تقريباً اسبوعين يدتي كانت مريضه ويات عندنا
يوم ثاني جارتنا متصله حق امي تقولها ماتشوفين خدامتنا تطلع وقت اللي نروح الدوام
او تدخل احد البيت قالت لها امي والله مادري انا مشغوله مع ام زوجي وعندي ولد بنتي الصبح و وراي طباخ وتنظيف وغيرها من الاشياء
ماطلع ولا ادري بالشارع شلون شكله

قالت لها يعني ما شفتوها هالاسبوع مسويه شي مدخله احد وجذي
امي قالت لها والله كلش مشغوله وماعندي وقت اني اطل عليها من الدريشه

اذا صار عندي وقت ان شاء الله بحاول اراقبها
الا تقولها هذي احنا مأمنينج على بيتنا وقت اللي نروح الدوام وقلنا انج بتراقبينها وبتشوفينها شتسوي

وبس قالت مع السلامه وصكت التلفون

من بعد هالمكالمه صارت تتهرب من امي
امي تتصل تسأل عنها مره رد عليها اخوها وقالها فلانه طالعه
مع ان سيارتها عند الباب
ومره ثانيه اتصلت فيها ردت اختها وقالت لها فلانه تتسبح
حتى امي يوم راحت تزور زوجة اخوهم ما شافتهم هناك لا اهي ولا اختها
يوم امي سألت زوجة اخوهم عنهم
قالت انا قلت لهم وقالو بيون وما شوفهم ياو

امس اختي الظهر عقب ما طلعت من الدوام يات تاخذ ولدها من عندنا وشافت هذي جارتنا عند الباب
تخيلو من شافت اختي على طول صدت عنها

امي تقول انا ماقلت شي يزعلها ويخليها تتهرب مني انا كل اللي قلته لها ماعندي وقت ومشغوله وقت اللي يصير عندي مجال بشوفها
اهي هذي جارتنا مو متزوجه لا اهي ولااختها الظاهر عبالهم كل الناس فاضيين مثلهم لا طباخ ولا غسال ولا عيال يبليهم تربيه
امي من النوع اللي ماتحب تزعل احد
وتقعد تحط في بالها وتفكر
الحين صار لها اسبوع وضغطها مرتفع من التفكير
ما يسوى عليها هالجاره


نسيت اقولكم ان جارتنا هذي وايد تتدخل في اشياء ما تخصها
يعني مره متصله تقول حق امي درايش بيتكم وصخين نظفوهم
ومره ثانيه متصله تقول صبغ بيتكم طار صبغو بيتكم من يديد

يعني انتو تشوفون في شي فالموضوع يخليها تزعل من امي ؟
وشنو الحل اللي ناخذه مع هالجيران اللي من هالنوعيه؟
وامي شلون نخليها تنسى الموضوع وماتفكر فيها لين ترضى بروحها؟