..
حفل عقد قراني وخطوبتي كانوا بيوم واحد تاريخ 20-5 يوم الخميس ليلة الجمعه
وقبلها بيوم كانت حفله حنتي بتاريخ 19 وكانت الحفله عائليه
وهذا موضوع الحنه للي ما شافه
http://forums.3roos.com/showthread.php?t=537154
..
قبل ما ابدأ حابه اشكر بنات تجهيزات عرايس البحرين على وقفتهم وياي خطوة بخطوة ما قصروا فديييتهم :)
وان شاء الله اردها لهم في افراحهم
..
ويالله نبدأ بتقرير الحفله
_ صلوا على النبي _
وامانه ذكروا الله :)
يوم الثلاثاء تاريخ 18-5 رحت حفيت عند الحفافه دلال والحمد لله ظبطت حواجبي مثل ما ابي , وبعدها رحت شلت جسمي واكس في صالون ليلى في سوق واقف
يوم الاربعاء تاريخ 19-5 رحت الصبح نايس نيلز وسويت بدكير ومنكير وما شاء الله شغلهم تمام التمام :thumbs_up: حتى الكرسي اللي اقعد عليه يسوي مسااج فاسترخيت لآخر درجه
يوم الخميس قعدت الساعه 4 الفجر عشان اغسل الحنه واصلي . عقب ما غسلت الحنه وصليت جهزت اغراضي اللي باخذهم وياي الصالون لانه موعدي للشعر كان الساعه 10 في صالون رونق عند فتحيه , وبما اني بسوي بس شعر عندهم فما كنت احتاج احمل وياي شي غير الاكستنشن والحشوات والاكسسوريز تبع الشعر , خلصت اموري على الساعه 6 وقلت بارقد شوي بعد ارتاح ورديت قعدت الساعه 9 ولبست وانطلقت للصالوون .
وصلت على الساعه 10 الا ربع من الزحمه بس فتحيه ما كانت موجوده فاستغليت الوقت وقلت باسوي اظافري فرنج منكير عندهم
يوم خلصت من اظافري وصلت فتحيه الصالون على الساعه 10:10 تقريباً ومباشره بدأت في شعري ,, شنووو هالانسانه ذووق واخلاق وتعامل عن جد ارتحت وياها واهي تسوي شعري , سألتني شنو تبين قلت لها شنو يناسبني ؟ وشرحت لها فستاني شلون قصته قالت لي الحين فيه تسريحه جديده نسويها للعرايس تكون مرفوعه شووي ومايله على جنب وتنزل على الرقبه وبتناسبج اكييد بس مادري شلون حسيت التسريحه ما دشت مخي :cool: فقلت لها لا تسوينها لي :lol: وسوي لي بف وويفي كالمعتاد وابي اطلع ناعمه .. اخذت ساعه ونص وهي تسري لي التسريحه والحمد لله صارت رووووعه وحطت لي الاكسسريز اللي وديتهم وكانوا عباره عن حلقات كرستال لانه فستاني كله فيه حلقات بالاضافه اخترت ورد اوف وايت من عندهم وحطتهم لي على جنب فطلعت نعوووومية :adore:
وخلصت من الشعر تقريباً 12 الا ربع ورجعت البيت ارتاح شوي .. ارتحت وتغذيت وعقب جهزت اغراضي وفستاني والطرحه واتصلت لابوي عشان يوديني الصالون للميك اب , وكان صالون ايلاف واللي بتحط لي الميك اب فردوس الحلواجي , وصلت الصالون على الساعه 3 تقريباً ونزلت اغراضي ودخلتهم الصالون واكتشفت اني نسيت الجوتي في السياره ;) , وقلت يالله معليش لين بطلع من الصالون بلبسه .. سألت الرسبشن متى بتجي فردوس قالوا لي الساعه 4 توصل بس فيه قبلج ثلاث عرايس واانتي الرابعه والاخيره :-o جان انصدم ,, يعني على هالحاله ما بخلص الا الساعه 8 او 8:30 لانها تاخذ في العروس ساعه كامله ,, حاولت ويه الفلبينية تخليني اول وحده لانه الشيخ بيعقد عليي الساعه 7:30 ولازم اجهز من وقت واروح الصاله قالت لي ما يصير اللي يجي قبل يكون دوره قبل 8o| وطبعاً العرايس اللي كانوا موجودين كلهم يبون يجهزون من وقت فاستسلمت وظليت قاعده وساكته على اعصابي واتصلت لبابا وقلت له بتاخر شوووي قال اوكي فارتحت شوي :) ..
وصلت فردوس الصالون 4:30 وبدأت في اول عروس ويوم خلصت منها ونزلت العروس كانت عجييييييييبه الصاله على النبي :adore: قمررر فقلت خلاص باسوي لي مثل ميك ابها عجبني واايد , وبدت في الثانية والثالثه وخلصت منهم وجى دوري وركبت فوق قالت لي شنو تبين وشنو ما تحبين وسألتني كذا سؤال وكانت حبووووبة حدها وتسولف وياي وقعدنا نسولف عن الكيك والطباخ ههههه ويوم خلصت مني عجبت روحي عدل :adore: حطت لي ميك اب سموكي وقلتر ذهبي وشوي بنفسجي على احمر والحمره لونها بطيخي على وردي طلعت حدي نعوووومية .. في هالاثناء اتصلت لي اختي قلت لها تروح نوال فلاورز تستلم الباقه على ما البس الفستان واحط بودره الجسم ويوم لبست الفستان طلع حده واسع عند الصدر وتنرفزت عدل ويوم اختي راحت بتستلم الباقه الا مسوين الاوردر غلط :( فزاد التنرفز , كانت طالبه الباقه كلها روووز احمر , مسوينها لي كلها روز اوف وايت :'( حدي عصبت وانقهرت وكلمت الفلبيني هاوشته لا ويبي يحط الغلط عليي بعد , قالوا لي بنحط لج اكسسريز احمر فيها قلت لهم خلاص مافيه وقت لانه صارت الساعه 8 والشيخ ينطرني فاظريت اخذها وحاولت اهدأ روحي لانه مابي اعكر مزاجي في هاليوم بالذات ;) _ الصورة يبين فيها جزء من الفستان والحلقات اللي فيه -
استلمتها اختي وجت اخذتني من الصالون ومباشره رحنا الصاله ,, في هالوقت كان الكل قاعد يتصل لنا وينكم تاخرتون هههه واني على اعصابي حدي واحس قلبي يدق وكانه الشي بدا يصير صدق مادري شلون ماعرف اوصف الشعووور ..
وصلت الصاله الساعه 8 وثلث ولبست الجوتي اللي نسيته هههه ودخلت غرفه العروسين كنت لابسه جاكيت فوق الفستان وفيه قبعه للشعر ولبست فوقه المشمر الاخضر المطرز بالذهبي وقعدت انتظر الشيخ يجي لي .. واشوة انه مدخل غرفه العروسين مفصول عن الصاله مالت النسوان , جى الشيخ واعمامي اثنين وابوي وامي وجدي واخواني وسألني الشيخ عن مهري وعن الطايح وعن شروطي واني قلبي يدق :o ومستحيه اتكلم بس هني ماما جودت يدي عشان تهدأني وبعدين وقعت على الورقه وقعد الشيخ يقرا صلوات وعقب ما خلص بارك لي ومشى وهني باركوا لي الاهل وعمومي وامي وجدتي ويوم ببارك لي ابوووي قعدت اصيح :'( ماقدرت اجود دموووعي وماما تقول لي لا يخترب الميك اب ههههه بس ماخترب الحمد لله وصورت وياهم وطلعوا عني راحوا لمجلس الرجال التابع للصاله عشان الشيخ يكمل العقد هناك
عقب نص ساعه وصل العريس :D ودخل الغرفه وناديت المصورة عشان تصورنا بس قالت الغرفه ضيقه وما باخذ راحتي في التصوير فقلنا لها اووكي خلي التصوير لداخل الصاله .. وطول ما كنت في الغرفه كنت مقفله الباب عشان محد يجي يبارك لي ويشوفني قبل مادش الصاله هههههههه :lol: < مجرمه ههههه
**
المهم .. الحفله كانت في قصر المرجان ,, وهذه بطايق الحفله طبعاً في الوسط مكتوب اسمائنا عليهم ,, والبطاقات من مطبعه السامر
وهذه من داخل
واول سطرين من البطاقه كان مكتوب فيهم
نضئ الشموع ,, وننثر الورود ,, ونرفع اكفنا بالدعاء
اللهم بارك لهما ,, وبارك عليهما ,, واجمع بينهما بالخير
وهذه بطاقه دخول الاطفال
,,
الحفله كانت نصها اسلامي والنص الثاني اغاني , يعني حزة دخلتنا للصاله حطينا دي جي اغاني , كنت مخططه زفتي تكون الساعه 11 بس من صارت عشر ونص قال لي خطيبي خلنا ندخل الحين ههه مستعجل ,, فخبرت اختي عشان تقول للدي جي انه بندخل وخبروه وهني استعدينا ووقفنا عند الباب عشان بندخل الصاله ,, بدا قلبي يدق يدق ويدي ترجف وكنت خايفه على متوتره على مستانسه هههه ماعرف شلون بس كان شعووور ثاااني كان قلبي يدق اكثر من يوم يجي الشيخ ,, وصارت اللحظة الحاسمه واشتغلت زفتنا ( امشب شبي ) وطفوا الليتات ودخلنا الصاله :) واني اكتب لكم قاعده اتذكر كل لحظة في الحفله ,, طبعاً كنت موصيتهم محد يمشي قدامي ولا وراي بس تجري الرياح بما لا تشتهي السفن ههههه كانت فيه بنت تمشي قدامنه وحامله مخده عليها قرآن
والاهل كانوا كلــــــهم يمشون ورانه وحاملين رومالات ( قطع قماش صغيره ملونه ) ويلوحون فيها ويرقصون ورانه ووصلوونه لعند الكوشه ,, احلى شعوور مريت فيه بحياتي :D .
- كوشه الصاله ما غيرت فيها شي -
وصلنا لعند الكوشه وهني خلاص بدأ الكل يبارك لنا ويسلم علينا ويصور ويانه وبعدين نزلوا من المسرح وظليت اصور وياه كذا لقطه .. المصورة كانت ام يوسف تبع استوديو الاسطوورة وبصراحه ما قصرت ويانا جت الحفله من الساعه 8 الى 1:30 وصورت كلللل شي كل لحظة بلحظتها ,, حتى فيه لقطات عفويه صورتها واني كنت البس الطرحه واعدل قذلتي وامسح دموعي :lol: كل شي صورته ..
اني وخطيبي كنا متفقين نخلي الشبكه للعرس ونكتفي بالدبل حالياً ,, بس تفاجأت انه اختي وامي كانوا حاملين ستاند ذهب ومتوجهين لعندي :!!: انصدمت قلت شلون جذي ؟ طقم منو هذا ؟ ومن اخذه ؟ ههههه علامات استفهام صارت في وجهي ,, وصلوا لعندي وحضنوني ثنتينهم ودمعت عيووونا ;) الله يخليهم لي يارب ولا يحرمني منهم وقالوا لي هالشبكة هديه من ابوج :adore: فديييييته ابووووي ربي يحفظه ,, يعرفني احب اللولو فشرا لي طقم لولو :L::L:
,,
بعدين طلع الخطيب برى عشان الاهل يفصخون شيلاتهم وعباياتهم ويصورون وياي وقام الرقص والردحه :lol: وانشحن الستيييج كله كلهم قاموا يرقصون اللي يعرف واللي ما يعرف ههههه والمصورة كانت تصورني وتسوي لي لقطات حلوة ما قط جفتها من قبل عند استوديوهات ثانية بس طول ما كانت تصورني واني عيني على البنات اللي يرقصون :D
بعدين رد دخل خطيبي ويه اهله واهلي على اغنيه الدزه مالت يوسف محمد وزفوه لحد عندي للمسرح وصوروا ويانه وباركوا لنا وسحبوا خطيبي مني :lol: ورقصوا وياااه وعقب طلعوا .. بعد ما طلعوا قصصنا الكيك
- الكيك من مخبز الجزيرة -
وهذا تزيين صحن الكيك
وشربنا العصير ,, حتى الكلينكس كان عليه تغليف مثل صينية العصير والكيك
ولبسنا بعض قلايد الورد :o
واكلنا بعض العسل :adore::adore:
**
وعقب ما خلصنا من هالاكشنات كلها هههه .. جوا قالوا لنا بنحط لكم اغنية رومانسيه ورقصوا عليها , طبعاً اني ما رضيت بس قعدوا يقنعوني يقولون لي للذكرى ومادري شنو ولحظات حلوة :lol: واخر شي وافقت وحطوا لنا اغنية عبالي حبيبي مالت اليسا وطفوا الليتات وفضوا لنا السيتج ورقصنا بروحنا عليها سلو دانس :o:o لحظااات حلوة يارييت تتكرر ,, واللي زاد اللحظات رومانسيه هههه المصورة اخذت طرحتي وغطتنا فيها وقام الكل يصفق ويصافر :lol: صار الجوو عجييب , وعقب ما خلصت الاغنية خطيبي رد طلع مرة ثانية عشان يجهز ويه اهله لزفه السيارات وهني اني قعدت ارقص ويه بنات عماتي وخالاتي واهلي واهله :D خلوني ارقص في الوسط وسووا حواليني دائره واستانسنا حدناا
على الساعه وحده ونص دخل خطيبي اخذني وطلعنا ركبنا السياره كانت مزينه بشكل بسيط وناعم وورى مكتوب عليها احرفنا اثنينا ;) ومشينا بزفه طوووويله لعند بيتنا
وانتهى هاليوم على خير ,, كانت احلى ليالي عمري . ادعوا لنا ربي يسعدنا ويوفقنا ويهنينا ويبعد عنا عيون الحساد قولوا آمين وامانه عليكم ذكروا الله :) واتمنوا لاخواتنا العازبات بالزووج الصالح
**
فيه بنات كانوا طالبين مني صورة اوضع لتوزيعات البيض ,, :) هذا اهما التوزيعات وداخل كل بيضه فيه جوكلت لونه ذهبي وفيه ورد مجفف ورائحه معطره
ماسمح لاحد ينقل الصور لمنتدى ثاني :)