محطمه نفسياً وأبيكم توقفون معاي بكلمه طيبه

مادري شلون ابتدي او شنو أقول بالضبط تعبانه نفسيا جدا لدرجه اني افزع من نومي نص ليل خايفه ومضطربه .. كل شي اسويه مايضبط ويعتفس وكل لي حولي ضدي

انا كتبت هني لآن أعرف ان كلنا خوات بهالصرح وممكن نواسي بعض ولو بكلمه طيبه تريح خاطر التعبان وتحسسه ان دنيا للحين بخير

الحمدلله الله من علي بالإيمان وانا مؤمنه بقضاء الله وقدره بس احيان الانسان يضعف من كثر الهم والتفكير ... ادري تمللتو وانتو تبون تعرفون شسالفه .. بس والله ثم والله ان مالي حد اشكيله ابد احسن بختنق بهمي وودي اقول كل لي بخاطري بس عشان احس ان قلت لحد وحد سمعني

مشكلتي بدت من 8 سنين من لما كنت بالمدرسه كان ابوي دايم يفرق بيني وبين أختي في كل شي مع اني انا الكبيره وهي صغيره بس كل شي مسموح لها وممنوع لي .. يمكن وحده منكم تقول يمكن شاف منج شي مو زين صدقوني عمري ماغلط لاني مو بس اخاف ابوي الا اخاف ربي ولله الحمد ... طلعات مسموح لها وانا مو مسموح لي لما كنت بالمدرسه وبغيت جوال مثل باقي ناس قالي ممنوع بس هي لما طلبت عطاها وعقب ماعطاها عطاني انا لما وصلت لسن التخرج من المدرسه

وامي مرضت بفتره امتحاناتي اخر سنه ثانويه وزادت حالتها سوء وكانت تحتاج احد يتم معاها على طول عشان يأكلها ويهتم فيها لان صادها مثل لجلطه واظطريت اتم مع امي وتركت اكبر حلم لي بحياتي وهو اني ادرس بجامعه واخذ شهاده افتخر فيها .. قلت امي اهم وباجر الله يعوضني وان شاءالله امي تصير بخير وانا ادخل لجامعه بعدين وتميت اعتني بأمي لحد ما الله اخذ امانته وتوفت امي وهي مريضه الله يرحمها
من يومها اختي صارت شخص ثاني هي طبعا خلصت مدرسه ودخلت جامعه ولا اهتمت بحالت امي وهي الحين قريب تتخرج وانا للحين بحسرتي
وتخيلو اني اختها الوحيده ماعندنا خوات بنات الا انا وهي وهي دايما تقسى علي وتحسسني اني اقل منها كل هذا وانا اسكت واقول لها يجي يوم واصير احسن وتمادت وصارت قدام صديقاتها لما يجتمعون ونتكلم بشي تقعد تقول انتي شفهمك حدك خلصتي مدرسه
مع ان ثقافتي زينه وحتى لغتي الانجليزيه احسن منها واحيان تجيني احل واجباتها بس تكون مشغوله
تصدقون لما تبي مني شي تصير مثل العسل تصير حبووووووووووووووبه وانا استانس واقول الحمدلله بتغير معاي وابذل كل جهدي عشان اسوي لي تبيه على احسن وجه على امل انها تغير وبعد ماخلص شغلها ترجع حليمه لعادتها القديمه اااه بس

ودي ادرس ولا تعايرني ولا احسن بالنقص ودي تتغير اختي وتصير مثل ناس ودي ابوي يعاملني مثلها احيان احس اني مو بنته لدرجه اني طلبت منه ادخل لجامعه تدرون شقال لي ؟؟
قال لي دبري نفسك تبين تدخلين شوفي حد يصرف عليك مصاريف لجامعه انا ماقدر اصرف
ادري انه حالته ضعيفه ومايشتغل ولا عنده مصدر دخل بس ياليته ما قال هالكلام لي جرحني وااايد وحسيت ان محد لي ابد معقوله في اب يقول لبنته هالكلام في ذمتكم شسوي انا
طلبت منه اشتغل عشان اقدر ادرس هم رافض ومو راضي يعني لا يرحم ولا يخلي رحمه الله تنزل يقول لي عقب ماتدخلين جامعه وتدرسين بعدين اشتغلي لحين لا طيب كيف ؟

ومن يومها وانا كل يوم ادور حل بس عشان اطلع من لي انا فيه والله تعبت كل طرق حاولت بس مستحيل يصير لي شي دام محد راضي يعيني او حتى يواسيني

نفسي احد يقول لي كلمه طيبه بس

لي كتبته هو فيض من غيض