<><>بسكويت البهارات... هش و خفيف و طعم لا يقاوم<><>

السلام عليكم و رحمة الله و بركاته

صباح الخير على الجميع...

جايبة لكم اليوم بسكويت غير شكل!
طعمه جداً رائع و مهما كلتوا منه ما تشبعون :)


نبدأ بسم الله...

المقادير:

125 غ زبدة = إصبع زبدة و ربع (لازم تكون الزبدة بحرارة الغرفة)
ثلثين كوب سكر بني
ملعقة صغيرة هيل مطحون
نص ملعقة صغيرة دارسين مطحون
نص ملعقة صغيرة زنجبيل بودرة
أقل من ربع ملعقة صغيرة (جوزة الطيب - مسمار (قرنفل) مطحون - فلفل أسود)
صفار بيضتين
كوب و نص طحين


في البداية نخلط الزبدة و السكر البني و البهارات و الصفار لحد ما يصير عندنا خليط كريمي...






نضيف الطحين على الخليط...






و نعجنهم مع بعض لحد ما تصير عندنا عجينة لينة <<< و ريحتها تجنن :worn_out:






الحين جيبوا ورق نايلون و افرشوه عالكاونتر، حطوا العجينة بالنص و شكلوها على شكل اسطواني مثل حركة بسكوت السمسم إذا تذكرونه، على هذا الرابط...

http://forums.3roos.com/showthread.php?t=484150


بعدين لفوا النايلون على العجينة و باليد حاولوا تضغطون عليها بحيث نخلي شكلها هرمي طويل، عشان لما نقطعها بيطلع لنا شكل البسكويت مثلثات :)





إذا حبيتوا شكل البسكوت يكون شرايح دائرية، خلوها اسطوانية مثل ما هي، أو شكلوها مثل الحركة اللي سويتها... و إذا حابين شكل البسكوت يكون شرايح مربعة أو مستطيلة، شكلوا العجينة بشكل مضلع يناسب الشكل اللي تبونه!

بعدين دخلوها الثلاجة نص ساعة، أو تسوون مثلي، حطيتها بالفريزر و خليتها نص ساعة عشان لما أجي أشتغل عليها تكون متماسكة!

بعد ما تطلعونها من الثلاجة أو الفريزر، قطعوها شرايح رقيقة بسمك 3 ملم تقريباً... إذا حسيتوا العجينة صارت لينة و انتوا تشتغلون عليها، رجعوها الثلاجة أو الفريزر عشان تتماسك!
و عشان التقطيع يكون سريع و سهل عليكم استخدموا سكين كبيرة و عريضة!








صفوا الشرايح في الصواني و دخلوها الفرن في الرف الأوسط، على حرارة 325 فهرنهايت = 160 مئوية لمدة ربع ساعة أو لحد ما تشوفونه تحمر، و انتبهوا له، لأن البسكويت رقيق فهو يتحمر بسرعة!








و هنا بعد ما خلص :)








ريحة المطبخ ذاك اليوم كانت شي! :thumbs_up:

أنصحكم تجربونه، فعلاً طعمه مميز... و اللي تخاف من حرارة البهارات ممكن تستغني عن الفلفل الأسود!


و عوافي إن شاء الله F: