خواتي سمعوا قصتي وقولوا لي وحكموا شنو مفروض اسوي..
أبتدت قصتي لما شريت بلاك بيري من شركة زين لما كانوا مسوين عرض أن البلاك بيري مجانا بس علي أدفع 11 دينار أجار الأنترنت + 11 دينار أجار الجي أس أم . أشتريت الجهاز من عندهم هدية حق أقرب ناس لي لما كانت في المستشفى طالعه من عملية .
من يوم شرينا الجهاز بعد 3 شهور أختربت الحبه مالته الي في الوسط كانت اتشير طبعا انا شريت البلاك بيري الكيرف فا رحت فرعهم الي اشتريته منهم وهو كان الي في عراد وقلت لهم عن الخلل الي صادني في الجهاز قالوا لي روحي فرعنا الي في الحور وهم بيتصرفون ورحت فرعهم الي في الحوره وقابلتني الموظفه مالتهم وقالت لي انا بتصل لج وتعالي بعدين بنصلحه لج وبعد جم من يوم اتصلت لي الموظفه وقالت لي تعالي ويبي معاج الجهاز و رحت لها ووديت الجهاز معاي لما وصلت اهناك قالت لي الموظفه ان احنا ما نقدر انصلح جهازج لأن ما عندنا مصلح حق البلاك بيري في البحرين من جذي احنا بنعطيج جهاز جديد من عندنا وجهازج بنطرشه لندن المصنع الأصلي حق البلاك بيري علشان يصلحونه أنا قلت لها أوكي ما عندي مشكله قلت لها اختي ايب البوكس ماله والضمان علشان اتغيرنا لي ردت علي قالت لي ماله داعي احنا انغير كل شي في السستم مالنا يعني ببين عندنا في السستم ان احنا عطيناج جهاز جديد وأن الضمان بيكون نفس ما هو أنا رضيت في الموضوع وقلت لها اوكي و و ثقت في الشركه لأن الشركه معروفه وما فكرت أني في يوم بطيح في مشكله كبيره.
وبعد شهر من استعمالي للجهاز جاني تلفون من مركز أم الحصم اتكلمني وحده شرطيه وسألتني عن اسمي قلت لها نعم انا قالت لي تعالي المركز الحين نبيج قلت لها اوكي مع أني كنت عارفه نفسي اني ما عندي اي مشاكل مع أحد بس بعد صادني وسواس وخوف أن الله يستر شنو صاير ليش المركز اطلبوني .
لما وصلت أهناك كنت انا مع بنت عمتي قالتي لي الشرطيه أنتي عندج بلاك بيري قلت لها ايه
قالت لي وينه طلعت لها وقلت لها هذي هو قالت لي فتحيه يعني شيلي البطاريه منه وعطيني اياه ، أنا سويت الي قالت لي عليه الشرطيه وعطيتها اياه وكنت على نياتي وفكرت أن يمكن الحين كل الناس يطلبونهم لأن يمكن فيه اي مشكله في البلاك بيري ...
ولما سلمت الشرطيه الجهاز وتوصل لي الصدمه الكبيره لما اتقول لي الشرطيه ان هذا الجهاز مسروق وأنتي الي سارقته
تفاجأت و أنربط الساني أنسحبت الأرض من تحت الريولي وماعرفت شنو اقول
قلت لها لا مستحيل اختي أنا هذي الجهاز ماخذت من شركة زين لأن جهازي الأولي كان خربان وأهم من نفسهم عطوني هذي الجهاز وأنا ماعندي اي فكره عنه.
قامت الشرطيه الله يسامحها تتهمني وتقذف علي كلمات على أني أنا سارقه وأنهم اذا ما عترفت بيوقفوني يعني بيحبسوني يعني بدش السجن يا عااااااااااااالم
قلت لها اختي الله يخليج أنا ما أدري عن هذي الموضوع وأنا بريئة ومالي شغل في الموضوع يعني انا خذيت الجهاز من زين أهم الي عطوني اياه اشلون يكون مسروق وأذا كان مسروق هذي مشكلة الشركة مب مشكلتي .
قامت عصبت علي
وأصرت أني أعترف وقامت اتقول لي أعترفي بساعدج بخلي الريال الي اشتكى على الجهاز يتنازل ، أنزين أنا ما قلت لكم من صاحب الجهاز الي مشتكي صاحب الجهاز كان ضابط في نفس المركز وهي الجهاز الي يقول على قولته أن مسروق من عنده كان عند أخته، وأخته الجهاز كان طايح من عندها لما كانت تبي تنزل من سيارتها ولما وعت تبي اتدور الجهاز ما حصلته وراح الضابط وسوى على الجهاز شكوى على أن أنسرق.المهم قلت لها أختي أنا متأكده أن هذا الجهاز أنا ماخذته من زين أهم الي سلموني اياه .
قامت اتقول لي عندج دليل قلت له ايه الدليل زين امشي معاي زين وبتعرفين كل شي منهم
قامت اتقول لي لا انا ما ابي اضيع وقتي معاج احسن لج اعترفي لا تجذبين لاني ما اصدقج لأن حجيج مايدش المخ مب معقوله شركه تعطيج جهاز مسروق
قامت تصر علي أني اعترف وقامت تسألني اسألة غريب أن هل انتي حصلتي الجهاز من مكان أو هل أحد ماعطج اياه هديه وماتبين اتقولين
قلت لها لا محد عطاني اياه هديه ولا اني محصلته من مكان أنا بنيه من النوع الي ما اجيس اي شي مب لي مستحيل اني اخذ شي مب لي ، اصريت وقمت اقول لها ان هذا الجهاز ماعطيني اياه زين ألا تدرون شتقولي ، قامت اتقولي بخليج في السجن يومين بعدين بتعرفين تتكلمين
أنا أهني انفجرت وقمت اصيح من القهر
أني ماخذه الجهاز بفلوسي وأدفع عليه دم روحي شهريا وفي الأخير يتهموني تهمة سرقه.وبعدين لما جافتني الشرطيه اصيح قامت تقول لي ليش اتصيحين انتي خايفه اعترفي احسن لج ترى اذا اعترفتي بقدر اساعدج بس اذا جذبتي ما بساعدج وبتمين في السجن شهور والريال الي اهوه الضابط ما راح يتنازل وبيوديج في داهيه.
قلت لها أنا متأكده أني ماخذه الجهاز من شركة زين قامت تقول لي اوكي يعني انتي مصره كيفج قامت الشرطيه وتصلت في زين تبي تاخذ منهم المعلومات برقم التسلسلي مال الجهاز النحس المسروق فاردو عليها زين وقالوا لها لازم تحضرين عندنا الفرع علشان نعطيج المعلومات بالتلفون مانعطي احد اي معلومات بعدين ردت الشرطيه تسألني وتقول لي أعترفي احسن لج لاتخليني اوديج زين واتعب روحي ترى بتفشلين لأن القضية لابستج
قلت لها أختي بتسوين فيني خير اذا وديتيني زين علشان تتأكدين لأني أنا متأكده اني بريئه.
المهم بعد أصراري عليهم اتنازلت اشرطيه وقررت أنها اتوديني زين وقالت لي خلي بنت عمتج اتروح البيت وتيب البوكس مال التلفون مالج و الرصيد الي أهوه الضمان قلت لها اوكي.
بعدين قلت حق بنت عمتي روحي ويبي المطلوب من البيت مسكينه بنت عمتي ماتت من الأصياح خوفا علي لأن اول مره يصير فينا جذي موقف
المهم بعدين خذوني في جيب الشرطه و ودوني زين وبعدين لما وصلنا زين كانت بنت عمتي وأختها كانوا واصلين اهناك ينتظرونا.
قلت حق بنات عمتي لاتدخلون وخلي كل شي اهمه يسونا علشان احنا متأكدين أن احنا مالنا شغل في الموضوع وأن انا بريئه .
المهم لما دخلنا الفرع أنا والشرطيه الحمد لله أن لقينا الموظفه الي سلمتني الجهاز كانت موجوده اهناك قاعده قلت حق الشرطيه اختي هذي اهيه الموظفه الي عطتني الجهاز
راحت الشرطيه وخذتني معاها عند الموظفه وسألتها هل هذي الزبونه جات عندكم علشان جهازها كان خربان قالت لها الموظفه ايه
وسألتها الشرطيه هل أنتوا عطيتوها هذي الجهاز قالت لها الموظفه دقيقه بشيك في السستم
ولما شيكت الموظفه في السستم ألا تقول حق الشرطيه ايه هذي الجهاز احنا الي ماعطينها اياه
قامت الشرطيه اتقول حق الموظفه أن هذي الجهاز مسروق قالت لها الموظفه مستحيل اصلا هذي الجهاز من عندنا واحنا مانعطي جهاز مسروق
المهم بعدين ظهر الحق و زهق الباطل وطلعت أنا بريئه
بعدين الشرطيه ما قدرت اتحط عينها في عيني من الحياء والفشيله
بعدين قالت حقي وحق الموظفه أن ما أقدر أعطي الجهاز حق زبونتكم وهذي الجهاز مال ضابط يعني ما برجعه لها قامت الموظفه اتقول لها مايصير هذي جهاز الزبونه مايصير تاخذونه واذا تبون اثبات ان هذي جهازها احنا مستعدين نعطيكم اورقه من عندنا بس لازم تعطونا رسالة رسميه من وزارة الداخليه انكم تبون هذي الأورقه قامت الشرطيه اتقول لها لا مانبي بس الجهار مارح نعطيها اياه هذي الجهاز مال الضابط وأنتوا بعدين اتصرفو معاها.
المهم بعدين قامت الشرطيه تتأسف مني على اسلوبها الي كانت اتعاملني فيه
بعدين خذوني مره ثانيه بالجيب مال الشرطه و دوني المركز علشان يقفلون المحضر.
المهم وصلت المركز مع الشرطيه الا امي و بنات عمتي كلهم قاعدين مساكين ينطروني وخايفين علي يصيحون
المهم لما وصلت اهناك قلت لهم الحين اشلون اطالب بجهازي قامت اتقول لي الشرطيه احنا بنعطيج رقم القضيه وبعدين انتي اشتكي على شركة زين علشان يعطونج جهازج قلت لها انزين اختي الجهاز في صور خواتي وصوري وصور بنات عمتي عطوني على الأقل فرصه اسوي له فورمت قامت اتقول لي عادي بنخلي اخت الضابط اتفرمته لج لاتخافين قلت لها انزين على الأقل عطوني الذاكره مالت الجهاز لأن الذاكره ماكانت في الجهاز الجديد الي عطوني اياه زين كان في جهازي القديم الي اخترب ، مارضوا يعطوني اي شي حتى البطاريه خذوها من عندي وقالوا لي خلاص صكينه القضيه وخلوني اوقع على اورقه اني انا كنت بس مجرد شاهده في القضيه وأن مالي اي ذنب في هذي التهمة.
الحين أنا شنو اسوي قولوا لي جهازي راح و الذاكره فيها صوري راحت غير المذله الي حصلتها من شرطة ام الحصم والأهانات والأتهامات الباطله وغير أن ركبوني جيب الشرطه جدام الناس وخربوا سمعتي .
الحين شنو اسوي وين اروح شنو اسوي في شركة زين أنا ماعندي ألا رقم القضيه وتاريخها بس.
وفي الأخير أحب انصحكم أن لاتاخذون اي جهاز من اي مكان بدون دليل او أثبات أنا الله ستر علي وسهل أموري وطلعت منها بس ما تدرون شنو يصير .
للأسف الشديد تعامل مركز أم الحصم كان جذي معاي يعني انا كنت مدنيه وأهم عسكريات وجذي عملوني بدون ما يتأكدون من أي شي وين القانون وين العدل؟؟؟
وغير هذي شلون شركة زين جذي اتسوي في الناس وين وزارة التجارة عنهم ؟؟؟
أبي منكم بس شي واحد أن احد يدلني على اشلون اكتب موضوعي هذي في جريده من جرائد البحرين علشان الكل يعرف قصتي ويحكم شنو اسوي؟؟؟
مع الشكر الجزيل للجميع
وبالتوفيق للجميع أن شاء الله