ولادتي بحبيب قلبي "محمد"

أول شي أوجه تحياتي لكل حوامل مايو 2010 وأشكرهم على الأوقات الحلوة اللي قضيناها مع بعضنا نواسي بعض في الآلام ونهني بعضنا في الأفراح.. مرت علينا تسعة اشهر ما شاء الله بالحلو والمر والتعب والشوق..
F:F:F:

واخيراً في أحضاننا عيالنا ربي يحفظهم ويهديهم..:celebrate:

طبعاً أنا موعد ولادتي في البداية كنت اعرف انه راح يكون بداية شهر مايو وهالشهر يصادف تاريخ عقد قراننا فيه يوم 5/5/2005

يعني في هالسنة راح نكمل بهالتاريخ 5 سنوات من ارتباطنا مع بعض.. وراح تكون بإذن الله فرحتنا فرحتين..!!

عموماً كانت تجيني بوادر الطلق من دخلت التاسع بس كله تقلصات كاذبة.. الين قبل هالتاريخ بليلة كنا رايحين السوق انا وزوجي وكل شوي يجيني تقلصات في بطني يتيبس فترة ويرجع يرتخي.. بس من غير آلام الدورة المعروفة.. احس بشي يضغط من الاسفل عند الحوض ويروح..

وكان متحمس ان ممكن بنفس التاريخ اولد لأن له ذكرى حلوة بالنسبة لنا احنا الاثنين..

وليلتها سهرانة ويا الاخت الحبيبة دهن العود والغالية غادة.. نسولف مع بعض مع ان معروف عني اني ما اسهر.. بس الأرق ماسك فيني.. ويوم ثاني الصبح كان عندي موعد مراجعة في المركز الصحي..

قريب الفجر تعوذت من ابليس وقمت انام..

صحيت الصبح عشان الموعد وانا دايخة ودخلت الحمام كرم الله القارئ..!!:confused:

لما مسحت المنطقة لاقيت افراز مخاطي مايل للوردي..بس من التعب ما كنت مركزة 100% وما خليت الموضوع ببالي وقلت يمكن أتهيأ..

رحت مع أمي وصلتني المستشفى وقالت لي لما تخلصين اتصلي فيني.. وهناك ما زالت التقلصات اللي فيني من البارحة موجودة.. يشد معاي بطني وظهري ويرجع مع ألم خفيف.. ورحت مرة ثانية الحمام حق اسوي عينة ابوال.. وتفاجأت بنفس الإفراز الصبحي لكن لونه زهري أكثر..مبين انه مخلوط بدم يعني.. والألم يشد وياي..:|

اتصلت في والدتي وقلت لها ع الموضوع.. قالت لي لا تخافين هذي يمكن بداية ولادة عندج..

وبنفس الوقت طرشت مسج لزوجي كتبت فيه.. "تهقى أولد اليوم؟".. وهو ما صدق خبر.. حس ان عندي شي.. وكل شوي يتصل فيني ويسألني.. فيج ألم؟ ما نزل عندج الماي؟.. ههههه طبعاً قصة الماي هذي لأن بداية ولادتي في بنتي البكر كان انفجار كيس الماي من غير طلق!

وانا اقول له لا لسة..:hysterical:

وذاك اليوم بالذات بالعناد تأخرت الدكتورة على ما تناديني وانا رايحة جاية مو عارفة اقعد من التقلصات... ليييين جاء الفرج ودخلت عليها وكلمتها.. قالت لي لازم اسويلك فحص من تحت عشان أشوف اذا عندج ولادة.. لأنج الحين خلاص كملتي 39 اسبوع يعني متوقعة هالايام الولادة..بس رفضت لأني كنت خايفة من الفحص.. فعطتني الدكتورة كل أوراقي وملفي وورقة حولتني فيها على الطوارئ عشان يسوون لي تخطيط يشوفون عندي طلق او لا..وقالت لي لو ما ولدتي على هذا الاسبوع تجين على موعدج ونسويلج طلق صناعي لأنج عندج الضغط ما يصير تطوفين موعدج من غير ما تولدين..

اخذت اوراقي ورحت لأختي لأنها تشتغل بالمستشفى وقلت لها على كل شي.. وهي متحمسة بعد تقول لي يلا روحي يمكن تولدين اليوم وتحققين التاريخ.. يا احنا يا هالتاريخ خخخخخخ

قلت لها ابي اول يشتد الالم وبعدين اروح.. اخاف يلعبون فيني.. ورجعت البيت الظهر وتغذيت وامي شرت لي أناناس عشان يساعدني على الولادة.. وسوت لي حليب بالزعفران..

وأخذت لي شاور ماي ساخن..

المهم.. كنت تعبانة حيل من السهر وانسدحت ع السرير آخذ لي غفوة أريّح ظهري.. وما صحيت الا الألم خف..يعني قمة الإحباط خخخخ.. وانا كل شوي اناظر الساعة واحسب عدد الساعات اللي باقية ويدخل التاريخ الجديد..:clock:

جت المغرب وصلينا انا وزوجي والمتفرغة انا ما حفيت حواجبي للحين.. رحت لمرت حماي تحفني وكل شوي اقول لها صبري لين جت الطلقة.. بس ما كان الطلق منتظم عندي ابداً.. وهي تقول لي لا تسكتين روحي المستشفى.. اقول لها ما عليه.. اول نروح الممشى نتمشى شوي وبعدين اروح..

رحنا الممشى وزوجي تم يلعب بنتي في الالعاب وانا ومرت حماي لفينا الممشى مرتين تقريباً وقتها قلت خلاص ماقدر أتحمل امشي اكثر.. اشترى لي زوجي عشاء ورحنا ع المستشفى وسووا لي تخطيط وفحص.. وقتها منفتح الرحم عندي 2سم.. قلت يا سلام في بوادر ولادة يعني.. على الساعة 12:30 بدأ الألم يقل وانتبهت ان دخل التاريخ الجديد.. قلت يا رب سهلها ابي اولد بأي وقت وخلاص..:-o

جاتني الدكتورة قالت لي ما نقدر ندخلج الولادة الحين بس بعطيج لرقاد 24 ساعة ملاحظة يمكن يتوسع عندج الرحم في هالوقت ومبين ان ضغطج مبتدي يرتفع لازم نتابع وياج..

قلت لها ان شاء الله وانا في قلبي اقول عطيني اوراقي وبشيل عليه ارجع البيت.. مالي خلق اتنوم بالمستشفى..

رجعنا انا وزوجي الفجر على أذان الصبح صلينا ونمنا وقعدت الساعة 1 الظهر على ألم فظيع.. ماكنت أقدر حتى أتحرك منه.. لما خف شوي وقدرت اروح الحمام شفت افرازات مخاطية وايد معاها دم بزيادة بعد..

قلت يا بنت اليوم انتي بتولدين اكيد إن شاء الله..

طلعت دجاج وارز وسويت الغداء صالونة دجاج.. كان خاطري فيها وايد هههههههه:woo:

كملت الغداء ونظفت الشقة كلهااا وحطيت ملابس في الغسالة.. وكل ما يجيني الطلق اوقف شوي واكمل شغلي.. ناديت زوجي وامي طالعة لي الشقة مع اخوي وبنت اختي حطينا الغداء وانا بس مو قادرة أكتم كل ما يجيني الوجع.. قالت لي امي خلاص مالج قعدة روحي المستشفى الحين..

لبست عباتي ومشيت انا وزوجي وتركت امي تغسل المواعين وقلت لها تنشر الملابس مسكينة ووصيتها على بنتي وعطيتها شنطة ملابس لها واغراضها لو ولدت.. وانا شلت شنطة المستشفى وعلى السيارة..

وزوجي مستعجل وايد كل ماشافني أتألم وانا أقول له لا تسرع لأني خايفة من سرعته وهو يسوق!

وقفتنا اشارة حمراء وكان جنبنا سيارة اسعاف.. ماشوف الازوجي مطلع راسه للسيارة يقول له:"زوجتي تولد.. شغل لنا الصفارة حق يوسعون الطريق لين نوصل المستشفى."

شغلوها وانا قلبي يرقع لأني اخاف من صوت الصفارة من يوم انا صغيرة.. بس وصلنا المستشفى ودخلت غرفة الفحص وقلت للممرضة عن اللي فيني فحصتني كان عندي متوسع 3سم.. خلتني ابدل ملابسي ونقلتني لجناح المخاض وهناك رجعت الدكتورة فحصتني .. سبحان الله وقتها بس خلال 10 دقايق صار التوسع 5سم..

انا استبشرت في نفسي اقول كلها ساعة او ساعتين بالكثير واربي.. وقالت الدكتورة خل نصبر عليها قبل لا نفك كيس الماي..

بس مرت 7 ساعات وانا على هالحال.. من 4 العصر الى 11 الليل وانا اطلق من غير توسع ولا شي.. واسمع اهلي يتصلون كل شوي من غير اي نتيجة!

قبلها كان عاطيني ابرة عشان التوسع وابرة مهدئة لكن مامنها فايدة الألم موجود وماكو شي.. على الساعة 11 جات الدكتورة وفكت كيس الماي عشان تسرع الولادة..

كلها كم دقيقة والألم يزلزلني وخلاص.. عقب ما كنت أتألم بصمت ما قدرت الا أصرخ..

فحصتني الممرضة وصلت 7سم.. قالت ماباقي شي لو حسيتي بدفع تنفسي لين يكتمل التوسع عندج.. وانا من جد احس بدفع اقول لها تعالي في شي بينزل.. رجعت فحصتني كان 8سم.. تقول لي صبري شوي..وطلعت راحت لمريضة ثانية..

بس انا كنت احس بالولادة فعلاً.. ناديتها وكنت خايفة والله.. قالت لي لا تخافين انا معاج اجهز الاغراض، نامي على جنب ولين حسيتي بدفع اعتدلي عشان افحصج..

يجيني الدفع بقووووة واقول لها تقول لي اعتدلي بسرعة بس انا مو قادرة كلش.. قالت لي لو كنتي تولدين وما اعتدلتي راح يتشقق لج وبتتعبين.. والله خفت وغصبت عمري اعتدل.. فحصتني .. الا تقول لي ادفعي بشوف..

نادت اللي وياها تقول حقها هذي المريضة فووولي.. يعني خلاص كلها دقايق واوضع..

يا ربيييي.. قمت ادفع بكل قوة ومابي أترك لأني انهلكت خلاص.. مرة ومرتين والثالثة طلع حمودي ولدي.. حسيت بشي يزلق بس ما سمعته يصيح.. اقول للممرضة ماسمع ولدي.. تقول لي لحظة الحين تسمعينه.. وجت أحلى صرخة في إذني..

ولدت على الساعة 11:52 تاريخ 6/5/2010 عقب معاناة يومين طلق.. لكن كل هالتعب يسوى بشوفة الوردة حمود..:L:

في النهاية ابي دعوة بظهر الغيب ربي يسهل امورنا ويحفظ عيالي من كل شر ويهديهم..

وقبل ما تشوفون صورة القمر قولوا ما شاء الله وصلوا على النبي وآله.. وقيموني لو كان الموضوع يستحق..