شخباركم حبوبات؟
هذي اول موضوع لي في قسم الطبخ
ويمكن يكون موجود من قبل في المنتدى
سمعت ان عمتي عندها ضيوف باجر واهي مسكينه مريضه الله يشفيها وما تقدر تسوي لهم شي
فقلت بسويلها حلى ومنها اني حصلت شي احطه لكم في هالقسم
وقعدت افكر وافكر يلا يا رحوله الحبوبه فكري
وتذكرت حلى سهل وبنفس الوقت لذيذ
والاغراض متوفره في البيت
بس حبيت ازيد عليه اضافات فالتزيين عشان يطلع منظره حلو وشهي ويبيض الويه جدام الضيوف
الحلى اهو : حلى السميد النوتيلا
مقادير العجينه:
كأس ونص سميد
كأس حليب بودر
كأس سكر ناعم
علبة قشطه
ملعقه صغيره نسكافيه
ملعقه كبيره ونص كاكاو بودر
للتزيين:
فستق مطحون
فستق صحيح
جوز الهند مبشور
كاكاو نوتيلا
الطريقه:
نحط المقادير الجافه اللي اهي السميد والحليب والسكر على النار
ونحركهم لين يصير لونهم اشقر
نضيف عليهم علبة القشطه والنسكافيه والكاكاو البودر ونبتدي نخلط
لين تتحول لنا المقادير الى عجينه متماسكه
صوره من كواليس العمل
نبدأ نشكلها في قوالب اذا وجدت
او تقدرون تكورونها وتضغطون على الكره ضغطه بسيطه لين يصير عندنا شكل قرص
انا هني استخدمت القالب احلى وارتب
عقب ما نشكل العجينه نمسح الاشكال بكاكاو نوتيلا ونغمسها في الفستق المطحون او جوز الهند او نحط عليها حبه فستق صحيحه
وانا هني نوعت مره فستق ومره جوز هند ومره حبه فستق صحيحه ومره بس النوتيلا
وهذي الشكل النهائي للصينيه
الموضوع حصري فقط لعروس واللي تحب تنقله تذكر اسمي والمصدر