السلام عليكم ورحمة الله وبركاته ..
واخيرا اليوم دشيت عشان اكتب لكم قصة ولادتي ببنتي هيا نور عيني ..
في البدايه الحمد لله على كل حال .. والولاده تساهيل من الله .. احمد الله ان تمم علي حملي هلمره .. انا كان عندي اسقاط من قبل على اخر الرابع .. والحمل الثاني تعبت وايد وترقدت كم مره في المستشفى وسويت ربط لان عندي قصر في عنق الرحم ,, وعشت في الطلق اسبوعين كاملين وجبت ولدي على 25 اسبوع في الشهر السادس .. وبعنايه الله وقدرته عاش ولدي جاسم .. والحمد لله عمره سنه و 9 شهور .. نور عيني ,, الله يحفظه ويخليه لي ولابوه ..
الحين حملي الثالث في بنتي هيا .. ومن عرفت اني حامل وانا عزمت ان اسوي الي اقدر عليه واتوكل على الله .. من الشهر الثاني حرمت الطلعه ما عدا للكلية والمواعيد .. كنت اروح بالوييل شير ( الكرسي ) .. وما اشتغل .. وحرصت ان ارقى بطني .. واطلع نسبة صدقة من فلوسي كل شهر .. وما اشيل اي شي ثقيل .. حاولت قد ما اقدر .. حتى جهاز بنتي وثياب نفاسي .. الوالده ما قصرت سوت كل شي ..
طبعا طول الحمل وانا متلعوزه من الافرازات بسبب الربط الي سويته على 12 اسبوع ... وخذيت ابره الرئة على 25 اسبوع ..
بالنسبه للنظافه ... بس حاولت دايما اخلي المنطقة نظيفة وجافه قد ما اقدر .. وكنت احط قطعه قماش قطنيه بدل فوطه عشان الفوطه الصحيه تزيد الاتهاب عندي .. ومنعت العلاقة الزوجيه عشان ما يصير انقباضات او تهيجات في الرحم ..
او ما دخلت السابع بدت عندي تقلصات خفيفه رحت المستشفى وسوو لي تخطيط وقوالو في طلق خفيف ومنتظم .. انا توقعت اربي حزتها او بعد كم يوم .. وترقدت كم يوم .. وخف الطلق الحمد لله .. وتميت لين الاسبوع ال 33 ( نص الثامن ) والطلق يروح ويجي بس على خفيف .. ورحت موعدي الروتيني ذاك اليوم .. وبعد ما شافت الدكتورة نبضات القلب وفحصت بطني .. قتلها عن الطلق قالت عادي ان شاء الله ما في شي .. بس قتلها ان احس ضغط كبير تحت فقالت لازم افحصج .. حسيت بالم وهي تفحص .. فقالت لي حرام عليج ليش ما تكلمتي او جيتي الطواري .. :woo: انتي مفتوحه 2 سانتي والربط وايد مشدووود .. لازم نفتحه علطول لان الحين ضرره اكثر من فايدته .. يمكن يصير عندج تمزق .. الحين بنسوي لج دخول للمستشفى .. ودخلت المستشفى .. المهم .. نزلوني غرفه الولاده مره وحده لان توقعوا اولد لان عنق الرحم كان وايد ضعيف .. والرحم احتمال يفتح واولد .. بس سار عكس التوقعات .. وراح الطلق .. ولا كانه كان موجود .. بس خلوني يومين في المستشفى احتمال يرجع الطلق .. وقبل ما اطلع .. كشفت علي الدكتورة وكانت المفاجاه ان الرجم رجع يتسكر بقدره الله .. حمدت الله وشكرته .. ورجعت البيت .. وبدل ما كان الطفل ضاغط علي رجع لفوق رجع كل شي طبيعي .. وحسيت بمتعه الحمل .. لا افرازات ولا ضغط كبييير على ريولي وظهري .. كان كل شي محتمل مثل اي حمل ..
كل شي كان اوكيه لين يوم الجمعه 24- 4 .. وذاك الوقت صار لين 3 ايام في التاسع تقريبا .. حسيت بطلق يزيد مع الوقت بس مو منتظم ..فقلت بصبر .. ما بروح من الحين وبتبهدل .. انا اعرف هاي مو طلق ولاده على قولتهم طلق كاذب .. صبرت الجمعة والسبت والالم يروح ويجي .. وانا ما قلت لامي وزوجي .. وامي كانت تسالني انتي بخير .. تحس ويهي متغير .. وانا اقول ما في شي .. لين الاحد فليل .. حسيت الالم زايد وايد فقلت لازم اروح اخاف يصير شي .. فقلت لامي .. فقالت توه بادي الالم اصبري .. قتلها يمه لازم اروح .. انا اعرف هالالم .. الرحم اكيد انفتح ... .. وعلطول على المستشفى .. مع ان امي كانت شاكه وقالت لابوي احنا ما بنتاخر .. وحتى خلت اخوي ينطر برع في السيارة ما راح البيت :confused: .... وكان زحمة ذاك الوقت ... وعشان انا اول التاسع ما دخلوني بسرعه على اساس حسبالهم دلع مو ولاده .. وبعد عشان ما كنت اصيح او اصرخ .. كنت استحمل ( هاي نصيحه امي عشان اخذ الاجر .. وعلى قولتها البنت العاقله ما تسوي هالسوالف وتصرخ .. :thumbs_up:) طلعت عاقله ذاك اليوم المهم .. بعد نص ساعة دخلت .. وسالتني الدكتورة من متى الالم .. قتلها هاليوم الثالث .. وامي طالعتني وهي مبققه عيونها :I: .. وبعدها كان ويها بالضبط مثل هاي >> 8o|
المهم ... كشفت الدكتورة وقالت 4 سانتي والراس نازل .. انتي ولاده .. بس نسوي لج تخطيط اول .. هني امي اياست وقالت لاخوي روح .. الحين ايقنت ان الموضوع صج خخخخ ..
المهم ... كشفت الدكتورة وقالت 4 سانتي والراس نازل .. انتي ولاده .. بس نسوي لج تخطيط اول .. هني امي اياست وقالت لاخوي روح .. الحين ايقنت ان الموضوع صج خخخخ ..
المهم سوو لي تخطيط وقالوا في الم بس مو منتظم كلش .. بس بنرقدج ما تطلعين من المستشفى .. المهم طلعت فوق .. والام راح ولا كان كان موجود :-o هني حزتها قلت لامي روحي .. جاها اخوي مره ثانيه وراحت .. لين الصبح ..فجاه الالم رد .. وتجي طلقه ورا الثانيه وجا الدكتور علطول .. وقال 5 سانتي .. نزلوها ولاده .. المهم اتصلت فامي لانها بتزفني اذا ما قتلها .. نزلت وعطوني حقنة شرجيه .. وساعتين الطلق يروح ويجي وفحصوا وقوالو .. بعد 5 سانتي .. والسستر تقولي تبين ابره ظهر .. ؟ اقولها لا .. كم مره قالت لي من كثر ما شافتني تعبانه ..
في ذاك الوقت قالو بيعطوني ابره تهديني .. بعد ما عطوني الابره راح الطلق ولا كانه كان موجود .. :confused: .. وردوا يطلعوني فوووق .. وتميت من الثلثاء الصبح لين السبت العصر .. وانا 5 سانتي والطلق يروح ويجي بس مو منتظم وكل يوم تخطيط مرتين .. وكله يطلع في طلق بس مو منتظم .. الدكاتره ما رضوا يعطوني طلق صناعي او يفتحون كيس الماي لان على اساس توني مخلصه اسبوع في التاسع بس .. ويبون البيبي يقعد اكثر قدر ممكن .. .. حسيت كل طاقتي راحت .. ومالي نفس اكل .. وامي حاولت وياي بكل شي من قرفه وماي ورد وزهر وزعتر .. وكل شي .. ما في فايده .. حتى المشي من التعب ما اقدر امشي اكثر من ربع ساعه ..
المهم السبت العصر كانت امي عندي وتقولي شلون الوضع .. ؟ اقولها نفس كل يوم .. فراحت وهي مطمنه
وتميت لين الساعه 9 فليل .. هني حسيت الالم حما شوي .. قلت فرصه بروح امشي .. وعزمت فنفسي ان بمشي قد ما اقدر ولبست عباتي .. وبديت امشي في الممرات .. والسسترات يشوفوني ويقولون لا تبعدين وايد .. والدكاتره يطالعوني ويضحكون خخخخ .. شكلهم يقولون ما في فايده لا تحاولين .. :hysterical: .. المهم حسيت الطلق زاد وزاد .. ايقنت حزتها ان الوقت جا .. وهيا بتطلع وبتنور حياتي .. وزدت سرعه المشي .. والطلق زاد وزاد وسار كل نص ساعه تقريبا .. يعني منتظم .. .. لين الساعه 10 حزة تغيير الشفت .. رجعت سريري ارتاح شوي .. وبعدين جات السستر تبي تسوي لي تخطيط .. وانا فكرت حزتها ان بتشوف عندي الم منتظم وبتنادي الدكتوره تفحص وانا ما ابي .. ابي اخذ وقت بعد .. فقتلها بعدين ما في الم الحين .. اذا في الم اي ول كووول يو .. قالت اوكيه .. وراحت وهي مو مقتنعه كلش .. وكل شوي تطل علي .. لين الساعه 1 خلاص ضغت الزر عشان تجي .. وقتلها في الم .. وحزتها كان كل ربع ساعه .. وشافت التخطيط واصرخت في ويهي .. ماما في الم ولاده انتي ليش ما في كلام .. وراحت وهي تتحلطم خخخخ لان الدكتورة قالت لها اذا بدا الم علطول ناديني ..
جا الدكتور .. وشاف التخطيط .. وحزتها الام صار كل 10 دقايق .. وفحص .. والصاعقة الكبرى ... :| ان كان ..
5 سانتي .. يعني ولا نص سانتي زياده ..
بس الدكتور قرر ان لازم انزل لان الطلق منتظم .. ويقرب من بعض ..
اتصلت في امي حزتها .. وتخرعت لان الوقت متاخر .. وقالت شصار ... قتلها خلاص بولد .. قالت نفس كل مره .. ؟ .. قتلها هلمره صج .. :-o . ..
ونزلوني .. وامي وصلت بعد نص ساعه .. وتميت من الساعه 1 لين 6 الصبح والطلق منتظم وصار كل 5 دقايق .. وجات الدكتورةوكشفت وقالت بعد 5 سانتي :confused:.. يا ويلي .. وانا من التعب احس ان مرات ادوخ وما اكون في وعيي .. هذا بدون ما اخذ الكمام .. ما قدرت اخذه عدل .. لان كنت يوعانه وبطني فاضي .. فكان يلوع جبدي ..
وامي طلعت من الغرفه ما قدرت تستحمل تشوفني جذي .. وبالصدفه لقت دكتورتي الاستشاريه .. وقالت لها حلفتج بالله تدخلين تشوفين بنتي .. وتتصرفين معاها .. ما يبون يسوون شي لها .. فجات الدكتورة وامي وشافت .. ووقالت خلاص ما ينفع تطلق اكثر من جي .. وافتحوا كيس الماي .. الساعه 6 ونص تقريبا .. وحمى الطلق بعدها واااايد .. بسرعه كبيره .. وفتح من 5 ساني لين 10 في نص ساعه وطلعوا امي من الغرفه ...وهني بدا الدفع ..وعصرتين و ثلاث ... ونزلت هيا بسرعه وسوت لي تمزق داخلي من قوة الدفع .. .. وحطوها على صدري وخلوني ابوسها .. وخذوها وكم ثانيه .. وقامت تصرخ .. هني دموعي انزلت .. وناديت يا يمه يا حبيبتي .. وردت على من ورا الباب .. يا نور عيني .. وبدوا يخيطوني .. وتموا نص ساعه لان سوو لي خياطه داخليه وخارجيه .. الحمد لله على كل حال .. ورحت غرفه النقاهه وتميت 3 ساعات .. ورحت الحمام كم مره .. وما قدرت اتحكم في التبول من الخياطه .. بس الحمد لله بعد يومين قدرت والله سهل ..
والحين هيا في حضني .. جبتها على 36 اسبوع ويوم .... تاريخ 2-5 ... يوم الاحد الصبح ... وخلتني انسى كل شي عشته لما اشوف عيونها .. الله يحفظها ويخليها ..
الولاده تساهيل من رب العالمين .. وصدقوني التعب كله منسى بعد ما نشوف الضنا ونلمه
الله يرزق كل محرومه .. انا دعيت لكل البنات هني .. والمتاخرات دعيت لهم من قلبي وانا اطلق .. ان ربي يرزقهم فرحه الضنا ..