بنااات شوفن لي حل قسم بالله تعبت نفسيـن من شكلي .؟؟؟؟؟؟؟؟؟

بحرينية ودمي عماني;12049379:

اختي الغالية اسمحيلي ارد عليج واعتبريني مثل اختج

ترى الشكل مو كل شي بهالدنيا صحيح (نحسه) مهم بس اهو مو كل شي
ويقولج من شاف مصايب غيره خفت عليه مصيبته
بقولج شي ..انتي اكيد شفتي وسمعتي عن الناس اللي مالها اطراف او ناقصة يدين او رجلين
تخيلي نفسج بالهالموقف شنو كنتي راح تسوين ؟!
انا عارفة احساسج ونفسيتج لأني مريت بتجربة وراح اذكرها لج ..
خليني اتكلم عن نفسي مابقولج عن الناس .. انا واعوذ بالله من كلمه انا .. يوم كنت صغيرة صار لي حادث بالبيت
واحترقت والحمدلله على كل حال .. الحرق صار لي عند كتفي وشوي عند رقبتي يوم كنت صغيرة ما افهم وكان عادي عندي الموضوع ..
بس يوم كبرت شوي وفهمت صرت شوي حساسة وما احب احد يشوفني حتى خواتي .. وكنت كله اقول مابي اتزوج مو عشان شي بس عشان كنت اظن ان ماحد بيرضى فيني مع ان الكل يشهد ويقول اني احلــى خواتي والله مو غرور فيني والحمدلله على كل حال .. وانا عارفة هالشي بس كنت مرات ابكي وتجيني حالة نفسية
خاصة اذا كنت معزومه على عرس او حفلة صح كنت اكشخ بس مو على مزاجي يعني ما البس عاري وحركات مثل البنات .. وهالشي كان يحز بخاطري .. بس بعدين كبرت وفهمت الدنيا وعرفت ان الله اذا حب العبد يبتليه بالدنيا بأي شي بشكله بصحته بماله بعياله المهم
انا فهمت هالشي ووكلت امري لله وحمدته وصدقيني ومن يومها وانا الحمدلله ماعترض على شي كتبه الله لي ..
وهذا انا تزوجت بس بعد (تطلقت) برغبتي والحمدلله .. وزوجي شاقولج دلعني دلع مو طبيعي .. والله خلاني اميره .. ودللني على قد مايقدر ..ولا كانه يشوف اللي فيني ..و فهمني انه مو ناقصني شي واني عنده اسوى كل الحريم .. لي درجة ان مايبي يطلقني يوم طلبت الطلاق .. بس المحكمة طلقتني .. عشان اسباب خاصة
سبحان الله زوجي عادي شكله يعني مقبول بس اللي يشوفونا حتى اهله يقولون انتي ليش تزوجتيه وانتي حـــلوة وبينكم فرق واضح ؟ بس اقولهم اشدعوه الشكل مو كل شي وهو احلى الناس بعيني .. ومن هالكلام .. واللي يشوفني صج مايصدق ما يصدق ان فيني شي .. عايشة سني وعمري وكفاية ان ضحكتي وابتسامتي ماتفارقني .. دايما راضية بقضاء الله مع انه ان يجوز لي اعمل عملية بس ما يشغلني هالموضوع ابد
لان هالشي آخر همي .. انا بالنسبة لي
تكون المصيبة بالشكل ولا تكون بالدين والخلق صحيح ؟؟

ليش اشوف الناس في الغرب اللي عندهم بلاوي ومشاكل اللهم يا كافي نلقاهم سعيدين وراضيين ولا بعد يتحدون نفسهم و العالم ويثبتون انفسهم بكل طريقة ماعندهم استسلام ولا شي مستحيل .. واحنا ابسط مشكله عندنا ننكسر ونتقوقع !!
واحنا عرب ومسلمين المفروض تكون عندنا قناعة بأن الله له حكمة في كل شي
وان الله ما هو بظلام للعبيد ..

خلاصة كلامي ان لا تستسلمين للوسواس والانعزال ..
عيشي عمرج .. حرام عليج لا تدفنين نفسج وانتي ما فيج الا العافية ..
ولا تهتمين لأي كلام سلبي من احد .. واعرفي ان هذي خلقة ربج وانتي راضية فيها
وابتعدي عن المقارنات .. لانها هي اللي راح تسبب لج التعب النفسي ..
شوفي مميزاتج الثانية .. اكيد ان روحج حلوة .. اخلاقج احلى .. برزيها بتعاملج مع الناس ..صدقيني بتشوفين الكل حولج .. بس انتي استعيدي ثقتج من نفسج من داخلج مو من الناس ..

وتحياتي لج وآسفة للإطاله بس حبيت اوريج ان ما في احد كامل والكامل الله ..