ذكرى ملجتي بدون صور

السلام عليكم ورحمه الله وبركاته
قبل يومين كان الذكرى الثانيه حق ملجتي او كتب الكتاب على قوله اخوانا المصرين، ماكنت مخططه لشي مميز بس كان في خاطري اني اسوي شي بسيط حق زوجي خصوصا ان صار لنا فتره ماحتفلنا تقريبا 3 شهور، وفي نفس الوقت ماكنت قادره اسوي وايد اشياء لأني حامل واحس بثقل وفيني آلام وايد في الظهر خصوصا ان كان فيني من قبل فامع الحمل زاد وايد، اول شي قررته اني اغير المكان واحجز لي شاليه ، ثاني شي زوجي هالاسوع كان طول الوقت يقولي ان ظهره كان يعورة بسسب تعب الدوام فقلت باسويه جلسه مساج، وطبعا باشتري كيكه ، طبعا رحت وشريت زيوت أغراض خاصه للمساج، وسويت حركه انا قاريتها في المنتدى من إحدى الاخوات حق المساج، أول شي حجزت كبنت او غرفه على البحر، ثاني شي رحت بيت اهلي قبلها بيوم علشان اسوي استعداداتي وبت اهناك وقلت حق زوجي ان تأخر الوقت فبنام اهناك لان الغدا اهناك، إحنا في يوم السبت من كل اسبوع نروح بيت أهلي للغدا ، يوم السبت رحت سويت شعري ويفي وحطيت مكياج في ا لصالون لبست فستان قصير اسود وفيه نقشات بيضا ولبست بوت كعب لين الركبه اسود طبعا زوجي يوم جافه زفني وقالي فصخيه مب زين لج علشان اني حامل ، ومريت خذيت الكيكه وشرت غدا وطبعا كله باتفاق مع امي ان ماتحسس زوجي ان في شي، ورحت الشاليه بروحي علشان اجهز كل شي بس عطيت امي رساله تعطيها زوجي لما ايي على الغدا، طبعا باكتب لكم بعض من محتوى الرساله لان ماقدر اكتبها كامل فيها اشياء خاصه بس اهو اللي يقدر يفهمها :
إلى زوجي الحبيب ....... أحبببببببببببببببك مووووووت وكل عام وإحنا بخير حبي
أنت اليوم معزوم على جلسة من نوع خاص وعندك موعد مهم معاي فلا تدورني في بيتنا لأني مب أهناك، فأرجو منك انك تتوجه إلى سيارتك لو سمحت وتشغلها وتمشي، راح أعطيك معلومات عن المكان اللي انا فيه وحاول تعرفه:
1- مكان هادئ وحلو ومطل على منظر إينن
2- مكان لنا فيه ذكريات وايد حلوة وحابه استعيدها اليوم
3- مكان ....................................
4- مكان يذكرك بموقف يضحك صادني وانا فيه ههههه ( مره كنت اهناك وجفت حشره وتميت اصرخ وتجمدت مكاني)
5- مكان احب اروحه ومن زمان مارحت له ( من حملت مارحنا)
6- مكان يذكرني أبخاري محمد نور أمممم يمي يمي هههه ( دايما ناخذ معانا عيش من اهناك علشان البكنك)
طبعاً مايبيله تفكير المكان اهو.((((............)))) ييله بسرعه انا انتظرك على أحر من الجمر وياليت ماتتأخر علي، بسرعه لين الحين ماشغلت سيارتك؟؟؟ بذبحك يله حبي مليت بدونك ولا لحظة تسوى بدون قربك وجوفتك يالغالي أحبك وبظل أحبك طول عمري لين ما أموت أحبك، أنت حبي وماقدر استغني عنك ..........
يله أخليك في الطريج تحمل بروحك ومش بالعدال وعسى توصلي بالسلامة يا بعد روحي.


عاشقه.....................

ملاحظه : الرجاء عدم الاتصال بي وسوف أقوم بإرسال مسج برقم الغرفة



ولما رحت اهناك كنت شاريه زينه لصقتها بكل مكان على الجدران وشريت شموع وايد كتبت فيها I U وكتبت حرفي وحرفه بعد، أما عن الحركه اللي خذيتها من المنتدى فأهي اني حطيت وركه مكتبو فيها مركز الدكتورة ...... للمساج والتدليك وخذيت فايل وحطيت فيه اوراق اول ورقه كتبت فيها الدكتورة .... اختصاصيه مساج وتدليك ثاني وحده حطيت فيها نوع المساج وحطيت اقواس جمب كل نوع علشان يحط صح ثالث وحده حطيت فيها الاتفاقيه الرجاء الالتزام بالشريعه الاسلاميه وعدم لمس المناطق الحساسه وفي حاله الاخلال في احد الشروط سوف تدفع الضعف، وحطيت توقيع صاحبه المركز ووقعت انا وتحت حطيت توقيع الزبون وخليته يوقع، والورقه الاخيره حطيت يرجى خلع الملابس والساعه والخاتم، أي صح شريت بعد مفرش يديد علشان افرشه تحت حق المساج صار المكان روعه وحطيت له كأس عصير كنت شاريتهم من زمان وماستخدمتهم كاسات راقيه طقم بس اثنين. طبعا قلت حق امي اول مايطلع زوجي من البيت خبريني علشان اطرشله مسج برقم الغرفه، اتصللت امي وقالت انه تم يقرى ويضحك على الرساله وبعدين سلم عليها وقالها باروح ادور على الكنز اللي اهي انا هههههه، بعدين عطيته مهله علشان جريب يوصل اطرش له المسج واللي اهو حضره المحترم .......، عندك موعد اليوم لجلسه مساج، الرجاء الحضور في الوقت المحدد ورقم الغرفه ( ....) مع تحيات مركز الدكتورة ..... للمساج والتدليك، وشكرا
اول ماوصل طق الجرس فتحت الباب واهو مذهول وميييت من الضحك ومستغرب كلش لانه كلش ماحس اني سويت شي ولا رحت مكان، لأن انا كل شي سويته في يوم واحد قبل الحفله، في البدايه قلت باسويه المساج وعقب نتغدى وبعدين نحلي بالكيكه بس الشي اللي يضحك اني عقب مابتديت اسوي له مساج شوي شوي تعبت وتخيلوا وحده تسوي مساج واهي قاعده وماده ريلينها على الارض وبيد وحده، زوجي انكسر خاطره علي وقالي بس خلاص لان صادني الم في ظهر ماقدرت اقوم وكرشتي جدامي فتعبت، المهم ان بعدها تغدينا وعطيته هديه بسيطه شريتها من البادي شوب عباره عن عطر وكريم وشاور جيل، وكنت شاريه من عندهم استند الشمعه الفواحه اللي تنحط فيها العطر المركز ومن تحت الشمعه وكانت تفتر لما اشغلها عطت جو فظيع وريحه اتينن مايحتاج لا عطول ولا بخور كانت الريحه قويه انا خذيت مركز الرمان، والكيكه اللي خذيتها على فراوله وكتبت عليها كل سنه وإحنا بخير. ، ونسيت بعد كنت مزله ميوزك كلاسك وايد حلوين وزوجي يحب هاي النوع من الميوزك شغلته وكان الجو رومنسي حده، طبعا غيرنا جو واستانسنا وايد الحمدالله وزوجي استانس على الحركات اللي مسويتها وماتوقع كلش وقالي فككره حلوه انج سحبتيني بيتكم وعقب اتفاجأ، وإن شاء الله الله يسهل علي وأولد بالسلامه والله يخليلي زوجي ويسخره لي طول الدهر .