وجدتها وجدتها الحل لمشكلة نمو الشعر تحت الجلد

السلام عليكم يا بنات

شوفو يا حلوين الحقيقه انى شفت اكتر من موضوع بيشتكى اصحابها من مشكلة نمو الشعر تحت الجلد

وانا كنت بعانى من المشكله دى لكن عرفت اوصل لحل

فى منتهى البساطه وحبيت افيدكو

لانى عارفه قد ايه المشكله دى كارثه بالنسبه لينا وخاصة المتزوجات

سئلت دكتور جلديه عن الموضوع دا

وقال:الحكايه كلها ان فى طبقه من الجلد الميت

بتبقى على الجلد ولما تيجى الشعره تطلع

بتقابلها الطبقه دى وما بتعرفش تطلع للخارج فبتكمل نموها

وتطلع لكن بتلف حول نفسها وبكده بتبدئى انتى بتشوفى حبوب سودا

ولما تقشريها تطلع الشعره


والعلاج ليها هو الترطيب ففكرت انا فى حكاية الترطيب

وجربت كريمات للجسم لكن ما لقيتش نتيجه

ودا لانى كنت بكسل ساعات عن انى احطها

ولقيت طريقه سهله ومش مكلفه تخلينى ما اكسلش

وكنت كل ما افتح كتب بيتكلم عن وصفات طبيعيه لترطيب الجلد

الاقى كمية زيوت غالبا ما بتبقاش موجوده فى البيت

فاخدت اهم ثلاث زيوت واستخدمتهما

لمهم الحل فى منتهى البساطه وموجود فى كل بيت

مطلوب منكو يا حلوين تجيبو عبوه او كوب صغير وتحطى فيه:

1- ملعقتين كبار من زيت الزيتون

2-ملعقتين من زيت الذره

3- ملعقتين من زيت دوار الشمس (اختيارى تحطيه او لا)

تاخدو حضراتكو الكوب الصغير اللى فيه مجموعة الزيوت دى

وتحطوها اكرمكم الله فى دورة المياه عشان بعد كل وضوء تضعى اصبعيك فى الزيت

يعنى لمسه مش كتير تدهنو منه على اليد والرجلين حتى الكوع وحتى الركبتين

اقولكو ليه زيت الزيتون : دا عشان يدى لايديكى لمعه وزيت الزيتزن معروف بفوايده للبشره

اما زيت الذره : فهو من اسرع الزيوت كلها فى امتصاص الجلد ليها

و سبب انك تحطيها بعد الوضوء لشيئن :الاول :حتى لا يمنع وصول الماء للاعضاء

الثانى :ان الجلد بيبقى رطب بعد الوضوء فيمتص الجلد الزيت بسرعه

ونصيحه منى ليكى بالذات للى بشرتها جافه زى حالاتى تدهن( فازلين طبى ) قبل النوم مباشره

عشان تبقى بشرتك ناعمه طول اليوم ولان الفازلين تقيل شويه فجلدك بيمتصه ببطء وبيبقى كده بترطبى جلدك طول الليل

وبتسمحى للشعر يخرج وما يسببش نقط سوداء مزعجه

وبرده عشان تحسى بالفرق بسرعه خلى الليفه المغربيه صديقتك اثناء الاستحمام وفى اليدين والرجلين تستخدميها بطريقه دائريه

عشان تعملى تقشر للجلد

والحاجه الاخيره بتشترى حجر لليد من الصيدليه وهوا رخيص جدا وبتسخدميه لما ترجعى من مشوارك خارج البيت وانتى بتغسلى رجليك

بالمره ابقى اغسلى رجلك لغاية الركبه بالصابون واستخدمى الحجر بطريقه دائريه

انتى بكده بتعملى سنفره وبتشيلى الجلد الميت

على فكره دى تجربه شخصيه والى حالتها صعبه اوى هتشوف نتيجه بعد شهر

والله لانى كنت بعانى من المشكله دى جربو على ضمانتى

وابقو فرحونى بالنتيجه