مشاكلي ولا قصص الأفلام ،، يارب رحمتك

السلام عليكم
اشحالكم خواتي ان شاء الله أموركم طيبه وماتشكون بأس من الدنيا وأهلها ... والله المستعان...
خواتي مشاكلي تتعقد وابغي المشوره والنصيحه وأول وأخير الدعاء لي بتفريج الهم لي ولجميع المسلمين يارب أمين ...
أنا مشاكلي مع أبو عيالي من زمان بش الحين تفاقمت لدرجه وصلنا لطلاق بش كله ظلم ظلمني وظلم عيالي . يتحرى الدنيا
في طوع أيده بتمشي الدنيا وناسها على كيفه .. ظلمني من يوم اختارني عروس وظلمت نفسي يوم وافقت على ريال مطلق وعنده أولاد
وكان مأخذ طليقته بعد قصة حب طويله وبرغم حياتهم المقززه هي في علاقات مع شباب من ما أخذها ويدري وشاكت ومافكر يطلقها ..
وراضي بأي شيء منها المهم تكون معاه .. أما أنا تحملت أخطاء الناس ونار غدرها كواني فيها زوجي وكان يمثل انه يحبني من أول يوم تزوجنا
قال أنا ما أريد أولاد لثلاث سنوات وبعدين بنفكر لازم أعرفج زين قبل ما يكون بينا أولاد ويوم اتحسس من كلامه ؤيحس ان كلامه غلط يرقع ويقول
مجرد كلام ويوم حملت قال ضحكتي علي وفي كل مره الله يرزقنا بطفل يعيد على نفس الكلام. ومافي أي ورقه غير عقد الزواج يربطني فيه الأوراق الثبوتيه
مافي أي شيء يذكر انه زوجي لازم عقد الزواج يكون معنا .. ومرت الأيام والشهور والسنوات وحاله مره جيد ومره سئ .. يسهر لين الفجر مايدري عنا أنا والأولاد
لا يؤديني ولا يجيبني غاسل أيده مني ومن الأولاد لو أقوله الساعه ? في الليل بشير صيدليه أو مستشفى بيقولي روحي .. مايغير علي يخليني أودي ولدي الحلاق في الزحمه
وسط الرياييل في الجمعيات والمجمعات والمطاعم تكون زحمه يقعد يتكلم في التلفون وأنا أجيب أكله وأكل اولادي وأكل الخدامه ،، عادي عنده يخلينا نطلع أنا وأولادي مع صديقه يوصلنا
احساس المسؤوليه مافي وأنا ربي يشهد كنت أتقرب من عياله من طليقته الثانيه وطليقته بش عشان اكسب رضاه وحبه تسافر تخليهم عندي وهي تسافر تتمشى وأنا اتحملهم .. ومن غير نكد أهله أمه وابوه
وخواته وياويلي لو اشتكيت من حد يقلب علي واطلع كذابه وهم الصادقين ...
لين زادت سهراته وماقدرت اتحمل وصار بينا نقاش حاد في التلفون وقرر انه يعيش لوحده واحنا لوحدنا وحاولت أرضيه وأخذ بخاطره لكن رفض كان مبيت النيه على السكن لوحده ... وقعد ?? أيام لوحده ورجع الصبح
في يوم وكان مسافر لأن شغله خارج الدوله وطلبت منه زيادة مصروف الشهر طلقني علشان مصروف قتلني وحطمني وحطم مستقبل اولادي وفرح أهله فيني .. ماتوقعت انه في يوم من الأيام يسوويبي جيه وأنا إلي ماقصرت
في عياله وأهله طلعت في النهايه ولا شيء...
وسافر ويوم رجع طلب انه يشوف عياله وطلبت من أهلي محد يفاتحه في أي موضوع لأني في كل مره ازعل واطلع من البيت أرجع لوحدي وكنت ابغي أرجع لبيت زوجي وكرامتي مرفوعه وفوق وللأسف أهلي ماحترموا طلبي وفاتحوا
أبو عيالي في الموضوع وكبروا رأسه ... وقالهم أنا جاي أشوف عيالي بنتكم ما أريدها ولا ناوي أرجعها خليها تتأدب وتم عندكم انا خلاص انقهرت وقلتله أنا ما أريدك واطلع من بيتنا ومافي بينا غير المحاكم ،، والحين يعاندني ويبغي يرجعني وأنا مذلوله
في ناس أصدقاء العائله ما قدروا يتحملون إلي صار وفاتحوا الموضوع معاهم وقال عندي شروط ترجع توافق عليهم ماوافقت خلاص يبغي يذلني وشروط سخيفه اين أسفر الخدامه وأنا عندي ثلاث أطفال ويأخذ السياره ويسكني مع أمه وابوه وأولاده من الحرمه الثانيه
ويأخذ تلفوني قلتلهم أنا موافقه بش بفكر أكثر وأنا بعد عندي شروط وبخبركم عقب .. وسرنا التوجيه الأسري ورمس وقال شروطه ووافقت مره ثانيه على الشروط وقاله الموجه رجعها رفض أبو عيالي قال لا برجعها على كيفي أنا مب على كيف حد ... ومن بعدها انقهرت ورفعت عليه قضيه
نفقه ... والمشكله الثانيه غير رب العالمين ماعندي والحمدالله أهلي واقفين مع طليقي والكل واقف ضدي أمي إخواني والكل تعذبت مع الريال وأهلي عادي عندهم أنذل وأهلي مب خايفين من كلام الناس يقولون بنتهم مطلقه هم ماديين تفكيرهم اني برجع اسكن معاهم ومستحيل وبسعى بشت الطرق
اني اسكن لوحدي أنا وعيالي تعذبت حتى اني ساعات أفكر أشرد واغيب عنهم خلاص لي أربع شهور ضغط من كل مكان محد فاهمني ولا واقف معاي كرهت أهلي أمي وأخواني وكلهم ما أكلم حد ولا حد يكلمني برغم اني والله ما أقصر ويا أي حد في بيتنا في أعراس حد مريض عزايم حد محتاي وأنا عندي ما أقصر
ليش جيه يعاملوني ...
صح اني انفعاليه بس طيبه وما أشل في خأطري على حد ولا أحقد على حد بس هألفتره إلي أمر فيها والضغط واشوف انه محد واقف معاي حقدت على الكل صغير وكبير مب قادره أثق في حد
الشك صار يدور في رأسي وأتوقع الغدر من أي حد كان قريب وإلا غريب صغير وإلا كبير صرت مكسوره وحتى عيالي أتوحش على أي حد يضائقهم ... أدري اين طولت بس أرجوكم انصحوني وبكره أنا عندي جلسه
الصبح والله يسهل ويعين ويكتبلي الخير وين ماكان أدعولي وانصحوني والله وفي أحداث كثيره بس هاي المشكله باختصار شديد ،، الله يوفقكم وربي يحفظكم من
كل سوء ...
مع تمنياتي لكم باطيب وأسعد الأوقات