قصة معاناتي بولادة ولدي (عبادي)

اليوم حبيت أنقل لكم قصة معاناتي في ولادة ولدي عبادي الله يبعد اللي عانيته في ولادتي عن كل حامل يارب العالمين:091:

أول شي هو الحين عمره سنه ونص الله يحميه لي يارب صدق القصه جت متأخره شوي بس عذروني :065:

أنا فيني مرض فقر الدم المنجلي بس نسبته قليلة وما أحس بآلام هالمرض الا في الحمل وفي الأشهر الأخيرة اللهم لك الحمد والشكر فلما وصلت الشهر التاسع وكنت تكرمون داخله الحمام جاني ألم فضيع مثل الكهربه في كل أعضام جسمي لدرجة أني ماكنت قادرة أقوم أوقف فقعدت أصرخ من قمة راسي وزوجي الله يحميه أتصروع فكر أني راح أولد فقاااام يقول فتحي الباب أقول له مو قادرة أتحرك عشان أفتحه كسر الباب ودخل شالني وداني طواريء الولادة وأنا أصرخ مو قادرة من الألم ولما كشفوا علي بالمستشفى قالوا إن هالألم مو ولادة بس هذه آلام مرض فقر لدم المنجلي ومع الثقل ودمي كان واايد قاصر فعشان جذي تتألم بهذه الطريقة فتميت مرقدة بالمستشفى لمدة أسبوع يعطوني مهدآت وأنام ولما يروح مفعول المهدأ أقعد وأصرخ ويردون يعطوني مهدأ مرة ثانية تخيلوا تميت على هالحالة أسبوع من غير ماأدري عن زوجي وأهلي وولدي البكر فديته عمر خمس سنين لما يشوفني جذي يقعد يصيح بعدين الدكتور قالي ما نقدر نعطيج مهدئات أكثر من جذي لأنها تضر البيبي لازم تتحملين الألم :091:فقلت له عطوني طلق صناعي وخلوني أولد وأفتك قال الدكتور مانقدر لأنج ما كملتي 35أسبوع وبعدين نخاف أنج ماتقدرين تتحملين آلام العضام وألم الطلق فيرتفع عليج الضغط وتروحين بغيبوبة وبعد إن دمج قاصر لازم يرتفع شوي لأنه ويه الولاده نخاف يصيدج نزيف وأنتي دمج قاصر قالي مالج ألا تاكلين فواكه وايد وعصاير عشان يرتفع دمج ويخف الألم شوي بعدين نقدر نتصرف وأنا زوجي فديته ماكان مقصر يجيب لي فواكه وعصاير كثير وكنت آكل بس مافي فايدة الألم ما كان يخف فقالت لي أمي الله يخليها لي ولايحرمني منها مالج ألا الأدعيه والقرآن ويابت لي معاها لما جت تزورني كتب أدعية وقرآن وقالت لي الليلة لاتنامين ألا وأنتي قاريتهم والله بيسهل عليج إن شاء الله وبعد ما خلصت الزيارة وراحوا هلي من عندي كانت الساعة ثمان في الليل وكنت أتالم لدرجة أني ماأقدر أمسك حتى أي كتاب بيدي من كثر ماكانت أتألمني ففتحت دعاء أسمه دعاء التاج وهذا معروف لتسهيل الولادة قريته ولمن خلصت قريت سورة مريم كاملة وسورة يس وبعدين قريت سورة الأنعام وأنا دموعي تنزل مثل الشلال وكنت أدعي ربي بحرقة لما خلصت السورة ألا أحس إن مافي شي يألمني سبحان الله فقلت خلني أقوم أتمشى في الجناح مال المستشفى وقمت أمشي والممرضات مستغربين لما شافوني أمشي قالوا لي أنتي زينة ما في شي يألمج قلت لهم أيه وتوني أمشي ألا أحس بألم مثل الطلق فرحت غرفتي وريحت وكانت الساعة 12 بعد منتصف الليل وبعدين قام يجيني طلق كل ساعة يعني كنت أنام وبعد ساعة بالضبط يرجع الطلق لمدة دقايق ويروح لين الساعة 4 الفجر قام يجيني كل نص ساعة وتحملت وانا ساكتة وماخبرت الممرضات الساعة 6 الصبح قام يجيني طلق أقوى وكل عشر دقايق جان أضرب الجرس عشان الممرضات يجون ولما كشفت علي الممرضه قات لي خلاص ولادة وبسرعة ودوني غرفة الولادة وقبل لاأروح طرشت لزوجي مسج قبل لاياخذون تلفوني الأمانات وقلت له أني بولد خلاص ومن غير طلق صناعي وبعد ماودوني غرفة الولادة زاد الألم أكثر وأكثر بس الماي مانزل فقالت لي الدكتورة أن هي لازم تبط كيس الماي بيدها عشان أتوسع أكثر ولما بطت الكيس جان ينزل الماي وبعدها بساعة ولدت وجبت القمر عبادي اللي منور حياتي أنا وأبوه الله يرزق كل وحده الذرية الصالحة يارب

أتمنى أني ما خوفت الحوامل وترى اللي تتكل على الله ما تضيع والله يسهل على كل حامل واللي مو حامل ربي يرزقها بالضنا وتذوق أحلى إحساس في هالدنيا