ساعدوني يابنات الله يكرمكم نفسيتي مدمرة

انا بجد مش عارفة اقول اية بس انا فعلا محتاجة حد يساعدني ويقولي انا صح ولا غلط لاني خلاص تعبت اوي....اسمحولي اتكلم معكاكم كاني بكلم نفسي ومعلش استحملوني .انا اتجوزت من 8 شهور تقريبا واتجوزت الانسان اللي حبيتة الحمد لله بس من اول يوم جواز انا مش عارفة اية اللي حصل والله العظيم بدون مبالغة كأن السعادة حد مد ايده في قلبي وخطفها .مش عارفة في اية لية مش سعيدة كدة مع ان جوزي بيحبني وانا بحبة بس انا مش سعيدة معاه .بدعي ربنا كتير اوي يرجعلي السعاده في قلبي تاني مش عارفة فية اية؟
المهم مشكلة حياتي الاساسية وهي اللي يمكن عاملة الحزن ده هي اهل جوزى الله يسامحهم غاويين افتعال واختلاق المشاكل والتنكيد عليا كل شوية بلا سبب واللة العظيم .كل حاجة حلوة ممكن تتخيلوها انا بعملها معاهم عشان ربنا سبحانة وتعالى الاول ثم عشان جوزي لانة حنين وبستحمل عشانة بس هو طبعا قدامهم سلبي جدا ومهما عملوا لازم يطلعهم مش غلطانين..مامتة حطاني في دماغها جدا وانا من النوع العصبي اللي مبحبش حد يغلط فيا وبحب زى مااعامل الناس كويس يعاملوني كل دة بنساة وانا معاهم وبقول معلش دول مش زي اي حد استحملي .مامتة مش بيرضيها حاجة لو اتصلت كل يوم وجيت يوم في الشهر مثلا ماتكلمتش تقوووووووم الدنيا وتقعد وتتقلب وتقعد مقموصة بالشهر واكلمها متردش عليا .لازم اكلمها كل يوم وانا بشتغل وبرجع الساعه 8 ومع ذلك بكلمها يوميا مع انها للاسف عمرها ماترفع التليفون وتتطمن عليا غير مرة كل 3 شهور ولا حاجة وده مش طبعها هي بتكلم طوب الارض.ولما بروح عندهم والله العظيم مابقعد ثانية بفضل واقفة معاها في المطبخ واعمل الاكل واغسل المواعين كلها رغم ان عندها بنت قدي تقريبا بس بتتحجج بالمذاكرة ومابتقفش حتى معايا وانا بعمل وانا واقفة واخلي الدنيا زي الفل والله بيبقا من قلبي وبتصعب هي عليا واقول حرام هي زي ماما انا لازم اعملها الحاجة مع انة يوم اجازتي وبعد كل ده مفيش مرة اتقالت كلمة تسلم ايدك او ربنا يخليكي ولو بنتها قامت جابتلها بس كوباية مية تقولها تسلم ايدك ياحبيبتي تعبتك .ووالله بابنات مابفوت حاجة وحشة عندهم او حلوة غير لما بكون معاهم وبعاملهم احسن معاملة بكل ذوق واحترام ..طب انا هقولكوا حاجة انا مرة رحت عندهم بعد الشغل نقعد معاهم شوية وكنت راجعه تعبانة من الشغل جدا وكانت عندهم اطباق الغدا بتاعتهم في الحوض وانا من التعب مكنتش شايفة قدامي وقعدنا شوية وروحنا الدنيا اتقلبت اني مغسلتش الاطباق اليوم ده وجالي بابا جوزي البيت بعدها بيوم وقالي ان طنط قالبة الدنيا وقالي كلام حرقلي دمي قالي انتي مطلوب منك لما تيجي تفضلي واقفة تعملي معاها كل حاجة لو يوم حاسة نفسك تعبانة ومش قادرة ماتجييييش احسن؟اية دة!انا عمري ماشفت كدة وتعبت يومها جدا بعد مامشي واغمى عليا من كلامة وضغطي علي جدا وكل مرة ضغطي يعلا وايديا تتقل بسببهم حاسة اني هاموت بسببهم جابولي الضغط وانا عندي 24 سنة .وكل ده وانا مستحملة لكن شيء حد وانا المره دية مش قادرة استحمل .اخر مرة كنا عندهم حصل موقف كده هو اللي مخليني مدمرة دلوقتي .انا لسة ربنا ماكرمنيش ورزقني ببيبي وبدات اقلق شوية وابقا حساسة من ناحية الموضوع ده لاني داخلة على سنة اهو بس لكل شيء ميعاد باذن الله .المهم واحنا قاعدين راحت مامتة فتحت موضوع الخلفة وان واحد اتجوز على مراتة بعد 25 سنة عشان مش بتخلف وسابهافانا استغربت وقلتلها ازاي تهون علية العشرة كدة كان المفروض يقولها الاول مش يجرحها كدة .قالتلي لا طبعا من حقة يتجوز وقعدت تكرر في الكلام وانا اهرب من الموضوع واهزر معاهم وادخل في مواضيع تانية تروح ترجع لنفس الموضوع تاني وقاتلي من حق اي راجل يتجوز على مراتة لو عدت سنة ولاسنتين ومش خلفت فانا سكت لان انا حساسة شوية وقعدت اتفرج عالتليفزيون وانا جوايا بيتقطع من الكلام بس غصبا عني شكلي اتغير شوية بس والله ماقلبت وشي ولا اي حاجة تروح تقولي اية انا عارفة انتي سرحانة في اية انا فهماكي وقعدت تضحك اقولها لا مفيش حاجة والله ده انا بس مرهقة شوية برده تقولي انا فهماكي وقعدت تشهد عليا بابا جوزى واختة وكبرت الموضوع وتقولهم مش عاجبها ان الراجل اتجوز . وروحنا البيت وقعدت افتكر في كلامهم وضغطي يعلا تاني .بعدها بيوم لما جوزى حس اني حزينة قالها يماما ابقي حاولي تخلي بالك وماتتكلميش في الحاجات دية لان فلانة حساسة شوية وانا حسيت انها مش في المود من امبار ح وهي ماقلتليش حاجة بس انا حسيت وجه قالي انة قالها كده وخلاص الموضوع انتها بالنسبة لي على كده وبكلمها كل يوم كالعاده من يومها الاقيها بتقفل في الكلام اقول مش مهم هي كده لحد من اسبوع كدة تعبت جدا وعنيا ورمت اوي وضغطي علي ورحت للدكتور وكنت بموت والله سماعة التليفون ماترفعت يسالوا عليا مع ان جوزى قالهم اني تعبانة اوي بس ولا كانة قال حاجة كل يوم بقالي اسبوع اقول هايتصلوا يسالوا وانا طبعا مش بتصل خلاص لانة فاض بيا ولا حد بيسال لأ وجاية مامتة انهارده تقولة انا زعلانة من مراتك عشان لما قلنا الكلام بتاع الخلفة حسيناها اتغيرت وقالبة الدنيا طبعا ومقموصة وعايزاني كالعاده اراضيها واقولها معلش وانا اصلا اللي المفروض زعلانة .وهما كده على طول بس انا المردة دية ولا عايزة اكلمهم ولا اروحلهم ولا اشوفهم اصلا وصعبان عليا نفسي اوى .فاااااااااااااااااض بيا خلاص وعايزة اخد موقف وبجد بدات اكرة جوزى وحياتي معاه لانة ابنهم وهو مالوش ذنب مش عارفة اعمل اية ....معلش انا طولت عليكوا اوى استحملوني بس بجد ماليش اي حد احكيلة انا مالي ...ردوا عليا وقولولي اتصرف معاهم ازاي اواجههم واخد موقف المرده دية ولا اطنشهم واروح عندهم عادي واطلعهم من دماغي واخلي معاملتي باحترام بس مش زي الاول ولا اعمل اية واروحلهم ازورهم معاه زي مانا متعودة ولا بلاش عشان ماسالوش عليا وانا تعبانة نفسي اقولهم خلي معاملتكوا مرنة شوية وبلاش تقفولي عالواحده بس خايفة يقلبوا الدنيا اكتر.اعمل ايييييييييييييييية يارب والله تعبت.......