السلام عليكم ورحمة الله وبركاته
أريد منكم تفسير لي هذه الرؤيا وجزاكم الله خيراً
أولاً عمري 23 سنه قبل ثلاث سنوات تملكت على ولد عمي وبعد الملكه بكم شهر انفصلنا بطلب مني
ولدعمي هذا تزوج قبل سنه ونصف تقريباً وعنده بنت الآن ..
رأيت هذي الرؤيا على الرغم إني ماكنت أفكر فيه نهائي ومن بعد ما انفصلنا ماشفته
وحتى بنته وزوجته ماعمري شفتهم ولا أعرفهم ..
المهم الرؤيا ..
حلمت إنا كنا في إستراحه وطلعنا من الإستراحه بنروح البيت
يوم طلعنا من المكان اللي الحريم جالسين فيه مرينا بمكان الرجال وكان زي المنتزه أرض كبيره فيها ثيل بس الثيل كان ناشف ولونه باهت
والرجال موزعين فيها كل مجموعه بجهه
وكان واقف قدامنا ولد عمي هذا عند زي الأعمده الصغيره
ومعه بنته مجلسها على العامود وجالس يلعبها..
وركبنا السياره وكان هو اللي بيودينا البيت وأنا ركبت قدام جنبه وأبوي كان موجود وركب بالمرتبه الثالثه
والمرتبه الثانيه فيها أمي وأخواتي ..
وأنا جنبه يسولف معاي ويحط يده على رقبتي وانا أقول له ابعد وكأني خايفه أهلي يشوفوني
وأطالع فيه وآلاقي عنده لحيه وجلست أقول بيني وبين نفسي
يوم أنا معه رفض انه يربي لحيته وألحين رباها
وبنته معاه وهو يسوق ويحاول فيني أمسكها وأنا ماني راضيه بالأخير مسكتها وجلست آلاعبها وحسيت اني حبيتها
ويوم وصلنا البيت ونزلنا قال لأبوي انه بيطلع يتقضى للبيت وانه يبغى ياخذني معه
قال له أبوي ان البنات ويقصد أخواتي يبغون يروحون المحل الفلاني وأنه بياخذني معاهم وإذا خلصنا
بيوديني عنده ..
إنتهى الحلم
وجزاكم الله خير الجزاء
الحاله الدينيه : ملتزمة
الحاله الاجتماعيه: مطلقة بعد الملكة
المهنه : ربة بيت
حالتك قبل النوم : ما كنت أفكر فيه ولاكنت منزعجه