شخباركم عروسات؟
موضوعي اليوم مفاجأتنا حق عمتي بمناسبه يوم الام
ولان عمتي الله ما رزقها عيال
قررنا انا وبنات عمتي وبنات عمي ان نشتري لها هديه ونسوي لها مفاجأه تعبر عن حبنا وتقديرنا لها
اول شي اتفقنا على مبلغ معين وبعدين كل وحده منا دفعته
ويمعنا المبلغ وخذته انا عشان اشتري الهديه واغلفها
الهديه كانت عباره عن : علبة مكياج + طقم عطر فرنسي + عطر عربي + قميص نوم
غلفتهم بالطريقه اللي انتو شايفينها وحطيتهم في بوكس وزينته
هذي الهدايا
صوره اقرب
تزيين غطاء البوكس
واكتفيت بتزيينه بطريقه بسيطه
اما عن مفاجأتنا لها
فكانت عباره عن برواز وفيه لكل وحده منا صوره مع عمتي واحنا صغار
وتحت كل صوره كلام من عند كل وحده فينا نابع من قلبها
وكانت هالفكره كلها عشان نحسسها ان احنا كلنا عيالها حتى لو الله للحين مارزقها احنا موجودين
وشرينا باقة ورد تتكون من 6 ورود كل ورده تعبر عن وحده فينا
للأسف ما صورتها
اما عن يوم المفاجأه
كنا مجتمعين في بيت يدتي
وقلنا بنجهز كل شي لين راحت تصلي المغرب
بس اللي صار ان عمتي كانت اجازه عن الصلاه
فأضطرينا نغير الخطه
وخلينا مرت عمي تروح تاخذها على اساس ان تبيها في كلمه راس
واحنا جهزنا الطاوله وحطينا عليها البوكس
وبنات عمتي الثنتين وحده عاليمين ميوده البرواز
والثانيه على اليسار ميوده باقة الورد
للأسف الصور عند عمتي نسيت اخذهم
وبعدين نادينا عمتي ويات وماكنت مستوعبه الوضع
بس يوم استوعبت استانست وايد خصوصا بالبرواز
((كانت هديه بسيطه بس معناها كان كبير ))
فالنهايه اقولكم ما احلل اي وحده تاخذ الصور وتستخدمها بأي شكل من الاشكال
انا ماحطيت حقوق عليها لان برنامج الفوتوشوب مايفتح عندي
[MARK="#FF0000"]دعواتكم حق عمتي بالذريه الصالحه[/MARK]