مساء - صباح / الخير جميعاً
صار لي اكثر من سنة مشاركة في هالمنتدى ,, وقبلها بفتره كنت متابعه بصمت
واغلب تواجدي في موضوع ( تجهيزات بنات البحرين ) حباااايب قلبي كلهم ,,
استفدت منهم وااااايد واخذت منهم خبره وساهمت وشاركت وحاولت اساعد باللي اعرفه ..
وجى اليوم اللي انحطيت فيه بمكانهم ,, وما قصروا بنات ديرتي الكل بارك لي وهناني :083: شوووووكرا
..
بس للي ما يعرف - يوم المواساه او المعادل- هو يوم الخطبه الرسمي اللي يحددون فيه المهر ويتعرفون العائلتين على بعض
..
طبعا المواساه كانت البارحة بتاريخ 7-4 ,, في البدايه جهزت ولبست بدله بسيطه توب شيفون واسع ولونه بنفسجي هادئ بتدرجاته , وتحته بودي اسود ولبست معاه سكيني اسود .. وحطيت لي فاونديشن ورسمت عيني بالكحل وحطيت روج وردي مايل على بنفسجي وبلشر وردي ناجروال . وشعري طويل فسويته ويفي مفلول
ولبست هالساعه
**
اهل خطيبي وصلوا على الساعه 8:30 تقريبا واني كنت قاعده في الحجره < اختي حكمت عليي اقعد في الحجره ولا اطلع الا لما تناديني :085: يازعم حركات الخجل والحيا
بعدين نادوا عليي وطلعت سلمت على اهله واهلي وقعدت وياهم واني مستحيه حدي .. شوي الا يقولون الرجال خلاص اتفقوا على المهر وكل شي وصار التصفيق والتيبب < يعني كللووش :041: .. والدموع بدأت تتساقط ههههه الكل كانت تدمع عينه ويحضني من فرحته , وعطوني اهل خطيبي هالباقه + صحنين حلويات
وعقب المبارك والفرحه والدموع حطينا العشى .. وصورته لعيووونكم < على طلب بنات ديرتي وعدتهم احط لهم الصور
**
ملاحظة : كل الاكل كان صنع منزلي سواء من بيتنا او من عند خالاتي - ما عدا المعجنات من مخبز المرزوق -
**
ويالله نبدأ ,, :083: بسم الله
o·.·´¯`·.·o (المقبلات) o·.·´¯`·.·o
تبولة
حمص
وكان فيه ( ورق عنب + فتة ) ما صورتهم
o·.·´¯`·.·o (العشى) o·.·´¯`·.·o
هرييس
جاينيز رايس
محشي ملفوف
ميني شاوارما دجاج
سمبوسه
بيتزا
فطاير دجاج
فطاير جبنة بالزعتر
فطاير لبنة
طعمية -فلافل-
( معكرونه بشميل + سبرنغ رول ) ما صورتهم
o·.·´¯`·.·o (الحلويات) o·.·´¯`·.·o
شعيريه
كب كيك << صنع ايديه وحياة عينيه :03:
كيك الشعريه وكيكه الرمل
حلى الكورن فليكس
وكان فيه ( جيز كيك + سينابون ) ما صورته
وطبعاً سلة الفواكه اللي ما انلمست :085:
**
وعلى الساعه 10 تقريباً , مشوا ضيوفنا وظلوا اهلي ويانه وجوا الرجال قعدوا ويانه وطالعوا المباراه :041: وعقب ما خلصت مشوا .. وبعد يوم طويل ومتعب ما نمت الا الساعه 2 :02:
وخلاص .. دعواتكم لي بانه الله يتمم لي على خير ويهنيني , ودعواتكم لاخواتنا العازبات بالزوج الصالح .. وفي النهايه حبيت اشكر كل بنت باركت لي وشاركتني فرحتني :072:
واذا استاهل التقييم قيموني :02: