معقوله في أم جذي؟؟؟؟

السلام عليكم ورحمة الله وبركاته
خواتي لجأت لكم بعد الله سبحانه
ابي رايكم ابي مشورتكم ابي حل من عندكم
سااااااااااااااااعدوني بلييز انا تعبااااااااااااااانه ومتضايقه حيل وماعندي اللي اشكي له هالهم
تدرون ليش؟؟؟؟ لان مشكلتي في امي
اي نعم امي اللي كأنها مو امي
هالاسبوع الكل فرح بعيد الام الا انا مو لانها ميته لاا
بس لانها موجوده ومو موجوده... امي بعيده عني وايد
والله يابنات يمكن بعضكم يستغرب من كلامي بس فعلا امي جذي
احسها ما تحبني ودايما تتذم مني ومن عيالي
ماتحب نزورها الا مره بالاسبوع واذا صارت مرتين تقعد تتذمر وتتحلطم علي عند الناس
هذي تاركه بيتها وكل يوم مطيحه عندي مع عيالها
احسها تتضايق من عيالي وقعدتنا عندها في البيت مثل الهم على قلبها

ومو بس جذي
المشكله اني بنتها الوحيده من بين اولاد
يعني لا عندي خوات يعاونوني او اشكي لهم
والله يابنات اني ماروح مكان والسبب عيالي اني ماعندي احد يمسكهم لي
اهي اللي امي ماترضى ..و وين ابي اروح تقول لي انا مو ملزومه بعيالج
جابليهم انتي هذيلين مسؤليتج والطلعه مو اهم منهم
مع اني والله ما اطلع ابدا الا للضرورة
ياكثر العروس والمواجب اللي مارحتها بهالسبب
وتكون اهي مو معزومه مثلا من طرف اهل زوجي او صديقاتي
يعني تكون في البيت اقولها يمه ماراح اتأخر ساعتين مسكيهم ولا ترضى

والله يابنات طقت جبدي احس قلبها مو على قلبي
احيانا ودي اطلع مع زوجي نتعشى برى او نروح السينما ما اقدر وين اخلي عيالي
لا خوات عندي ولا خدامه وهم استحي اتركهم عند اهل زوجي لان كل وحده عندها عيالها
ومابي ااذيهم ويه عيالي

امي مو من النوع اللي تطلع لا بالعكس اهي دايما في البيت
وكله بروحها خواني الاولاد دايما برا مافي احد يونسها في البيت
والله احيانا يحز بخاطري اقول مسكينه امي بروحها وانا بنتها الوحيده لازم امر عليها
اخذ عيالي ونروح وبعدها اتحسف من كثر النغزات اللي تقطها علي
وغالبا والله ماتدمع عيني.... وساعات اكون عندها واحد يكلمها بالتلفون وتقعد تتشكى لهم
هذيلين عندي ووووووووووو من الكلام اللي يعور القلب

مادري يابنات هل انا كلامي فيه مبالغه
يعني هل وضعي طبيعي انتو تشوفونه؟؟؟
والله انا اهل زوجي البنات يووووميا بيت امهم ويستغربون مني اني ماروح كل يوم
وحتى صديقاتي يطلعون ويتمشون ومايخلون شي بخاطرهم ويتزاورون وعيالهم دايما بيت امهم
احس اني بس انا بهالدنيا اللي جذي
بفترة النفاس اذا وضعت تحسب لي الايام متى ارجع على شقتي
حتى والله اني ارد قبل الاربعين بس من كثر ما احس اني ثقيله عليها
انا بنتها الوحيده وتعاملني جذي
ماعمري حسيت بحنانها من يوم انا صغيره
البنات دايما يطلعون مع امهاتهم حق تجهيزات العيد مثلا او العروس او اي مناسبه
الا انا والله العظيم ان حتى حق عرسي كنت كله مع صديقاتي
من اقولها يمه تروحين معاي المكان الفلاني تقول لي لا روحي مع ربعج

بلييييز بنات ابي ردودكم ابي اسمع حجي شوي يريحني ابي حلول منكم
ولاتقولون لي كلميها وتناقشي معاها بالموضوع لاني تعبت
ياماكنت اقولها يمه الله يخليج حسي فيني ماعندي خوات مالي غيرج
شوفي فلانه وفلانه شيسوون مع عيالهم واحفادهم تقول لي انا ماعلي من الناس

لا والمشكله ان اكثر من وظيفه حصلتها بس رفضتهم والسبب محد يمسك لي عيالي
اقولها بخليهم مع خدامه بس عندج بالبيت ترد علي لااااا قعدي في بيتج انا مو ملزومه فيهم


بانتظاركم