مواقفنا الالذكيه و الحكيمه .. مواقف فهمنا فيها رجالنا ... !!!

السلام عليكم


قرأت كثير لقصص نساء لما واجهتهم مشاكل مع ازواجهم وكيف تغلبوا عليها بالدهاء والحكمه وطولة البال وليس بالتهور والاندفاع .. ومن جد قصص تفتح العقل والذهن وتخليك تفكرين ان تتمالكين نفسك عند حدوث مشكله كبيره ... او قصص شلون حصلت على الي تبي من زوجها وهو يضحك ويلعب :085:... تعرفون احنا نساء وكيدنا عظيم:029:... هذا بالاضافه الى القصص الي تعرف الوحده تكسب زوجها في صفها او يسوي الي هي تبي مع ان راي أهله امه و خواته يبون شي ثاني... وقصص تكشف لنا شلون الوحده فهمت زوجها شنو يعني بهالكلمه بعد ماكانت تسبب لها هالكلمه جرح بالقلب مع ان يمكن الرجال يقصد شيء ثاني يعني تعرفون ان الرجال من المريخ والنساء من الزهره .. والكلمه الي يقولها رجال او شي يسويه هو قصده شي واحنا نفهمها شي ثاني
ولكن للأسف قصص من هالنوع جدا قليله .... فحابه احنا نتعاون وكل وحده تعطينا من خبرتها ومن مواقفها ... سواء في الخطوبه او الزواج .. وحتى لو كنتي عزباء مع اخوك او ابوك


ونستفيد من بعض ... وهالاشياء مهمه مو بس الليالي الرومنسيه .. معاي انتوا صح:072:



وانا اول المتبرعات :083:

الموقف الاول
في ايام الخطوبه.... زوجي يطفشني .. بعض الاحيان تصير اشياء او مشكله مضايقه منها
او اكون مريضه وارسله مسج واقوله اني مضايقه او مريضه ..

مايرجع يتصل او يسأل او يرسل مسج... يرجع يرسل و يتصل بس عاد متى يمكن بعد اسبوع او 3 ايام ..واول مايتصل او يرسل مسج اهزئه انت ماتحس من زمان قلت لك مضايقه او مريضه ولا تتصل ولا تسأل... وبعض الاحيان طول الأيام رسائل تهزيء ... حتى لو رد علي ارد عليه بعصبيه ان ليش ماترد بنفس الوقت ... ويقولي خلاص هذا رسلت مسج الحين هذا اتصلت

وفي مره جاتني انفلونزا ورسلت له مسج وقلت له ... ولا رد علي ولارسلت له رسائل تهزيء كنت مابعطيه عذر ومرت ثلاث ايام ... او يمكن اكثر واتصل وصادف اني موموجوده بالغرفه ومارديت عليه.. ورجعت وانتظرته يدق ومادق مره ثانيه وفتحت جوال برسله مسج وكتبت رسالة تهزيء ليش مايرجع يسأل عني ... توني برسل لا وقفت صبعي ومارسلت وقعدت ااكلم نفسي واقول : الحين انتي كل مره مايسأل الا بعد وقت واعصب واهزئه ويرجع يكرر نفس الحركه و ترجعين تحاولين تحلين المشكله بنفس الطريقه شرايك هالمره تغيرين في تصرفك تغيرين طريقة حلك يمكن تجي نتيجه.. ومسحت المسج وكتتبت ياعمري والله شفت اتصالك وعارفه انك متصل تطمن علي ياعمري خايف علي حبي ..تطمن انا صرت احسن صحيح للحين تعبانه بس الحمدلله افضل من قبل.. وفرحت باتصالك... عملت send

شوي ويرجع يتصل :086: لا ويكلمني بكل حنان مو نفس كل مره هواش وصراخ >>> تفاجئت والله وفرحت ان رجع اتصل بسرعه لو سويت نفس تصرفي القديم ماكنت حصلت اتصال لانه عارف اذا اتصل بيحصل تهزيء بس الي خلاه يتصل انه تفاجأ من ردةفعلي وعلى غير العاده وبعدها صار يرجع يتصل ويرد على مسجي بسرعه
:013:

=============================
موقف " عادي ... مومهم"


تعرفون ان احنا والرجال مختلفين عن بعض
يمكن الرجال يقول شي ويتفاجأ بردة فعلج :057:


مرت علي فتره صارت معاي مشكله كبيره
وفي بعض المشاكل الاخرى ....
واذاا تضايقت او حسيت محتاجه افضفض وخصوصا لما احس اني خايفه ومهموه ومحتاره ... اتصل على خطيبي وارتاح له كثير

اتصل واقوله المشكله عاد هو دائما يقول : عادي ... عادي وكل ماقوله شي يقول عادي .. مومهم ... عادي مومهم .. شرايك تدخلين الماسنجر ...وفي كل المشاكل الي حصلت لي ... وطبعا اعصب عليه ليش مايهتم وعادي وانا مضايقه كلمفروض يخفف عني وانت ماتحس وانت ماتحبني ومن هالكلام وهو يستغرب من عصبيتي ...

عاد انا بعد ماسكر الجوال اقعد اصيح اقول اه مايحس واناني وكذاب مايحبني وانه مايستحي على وجهه وواحد قاسي يقولي عادي ومومهم انا طبعا كنت افهمها ان هو يقول : مايهمني وعادي اذا صارت لك مشكله وانتي ماتهميني شنو يعني شنو تبين شسوي لك يحسسني اني ولا شي


ومره صارت معاي مشكله كبيره وكلمته وانا اصيح .. وخصوصا ان خفت لما يعرف يتركني وقلت في كلا الاحوال يمكن يعرف خليني اقوله بنفسي وكان بعد احتمال يتركني حتى لو قلت له : وكان كل رده عادي ومومهم ولا بعد قالي شرايك تدخلين موقع (الفلاني) نلعب بلياردو انا وجهي صار كذا:047::039: هذا مايحس قلت له انت ماتحس وحده صايره مشكله معاها هالكبر وانت تقول تعالي نلعب وانت ماتحبني لو تحبني كنت تضايقت ومدري شنو طبعا عصب وقال هذا جزاي اني ابي اغير نفسيتك واسليك واخفف عنك

من بعد هالموقف فهمت كلمة" عادي " الي يقولها و " مومهم "

هو مولأنه مومهتم هو بالعكس هو مهتم كثير عشان كذا يحاول يخفف علي بكلمة عادي يعني يحاول يحسسني ان الامر موكبير واذا كبير انامايهمني ومايسوى ان تضايقين نفسج عليه
ولاتهتمين يعني يحاول يواسيني وان لما كان يبيني ادخل النت او الماسنجر كان يقصد يخفف عني ويشغل عقلي عن المشكله


وخلاص من بعدها لما يقولي عادي اابتسم وا فهم انه يحبني ويحاول يخفف علي همي:086:


بعض الاحيان الرجال يحسس المراه ان المشكله ماتهمه او عاديه ويحاول يسخفها ويكون قصده ان يخفف عنها والمراه تفهمها انه مومهتم بمشكلتها
ها يالله ننتظر مواقفكم الحلوه ...... الي فيها ذكاء وحكمه ودهاء
ومواقف ... كنتي تفهمينها خطأ وبعدين فهمتي بالضبط شنو يقصدون الرجال بها