ابويا طلق امى من 10 سنين كدا
كان لسة عندى 8 سنين
كنت فى المدرسة متفوق وبتعلم زى بقية خلق الله
وكان عندى اخت اصغر منى عندها 4 سنين
ولما حصل الطلاق
ابويا اتجوز وحدة تانية
وامى اتجوزت راجل تانى
هما اتجوزو وكل واحد راح فى بيته
وسابونى انا واختى نتربى مع واحد صاحب ابويا
كان عنده اولاد كبار ومتجوزين وهو كان راجل صاحب عاية محتاج حد يساعده او يناوله حاجة
وكان بيعلمنا وحبيناه وحسينا فيه يعنى ايه كلمة بابا
وعشنا معاه سنتين لحد ما الراجل دا مات
واولاده ورثو البيت وطردونا وقعدونا فى أوضة ع السطح
وبقينا مقطوعين من شجرة ومحدش بيسأل فينا
بعد كدا انا سبت المدرسة علشان اشتغل واصرف على نفسى واصرف على اختى
اشتغلت مرة كمسرى على ميكروباص ومرة اشتغلت ميكانيكى واشتغلت فى فرن عيش
وكنت فى كل مرة بنطرد من الشغل علشان صحاب الشغل كانو بيقولو ان عضمى لسة طرى ومش انفعهم فى الشغل
وربنا كرمها معايا واشتغلت مع واحد نجار واتعلمت منه واستمريت معاه وعرفت ناس كتيرة
وميت معاهم وفى مرة لقيت واحد بيعزم عليا بسجارة رحت واخدها وشاربها ما انا لو مش شربتها هيقول عليا عيل
وشوية شوية شربت ممنوعات وادمنتها وسرقت الراجل صاحب الشغل وبقيت اتأخر عليه وطردنى من الشغل
واختى كانت فى الاعدادية وعايزة فلوس تشترى ملخصات وتروح عند مدرسين
حاولت ارجع الشغل تانى معرفتش ......وكنت قاعد فى سهرة مع اصحابى وقعدة كيف الساعة 3 قبل الفجر
لقينا شوية شباب من اللى هما ولاد الناس الاكابر دول ماشيين فى الشارع
روحت ماسك سلاح علشان اقلبهم واصرف على مزاجى والبت الغلبانة اختى
راح واحد منهم عاند معايا وحاول يمسك السلاح من ايدى رحت معوره ومكنش قصدى انى اعوره
كان قصدى اهوشه علشان يبعد ايده عنه .....لقيته مات وراح فيها
________________________________________
بعد دا كله لقيت نفسى قومت من النوم
قومت اشوف بابا وماما
والحمد لله لقيتهم موجودين
غمضت عينى وفكرت
انا لو ابويا طلق امى هيحصلى ايه؟!!!
عايزكم تتناقشو معايا فى الموضوع دا
ابناء الطلاق
مسئولية مين ؟
وحقهم مين هيجيبو؟
نعاملهم ازاى؟
دور المدارس والجمعيات فى تربيتهم وتعليمهم ؟
وبما اننا من اكبر الدول اللى بيحصل فيها حالات طلاق ...مش عارف الاحصائيات بالظبط قد ايه
لكن اللى اعرفه ان كل 6 دقايق بيحصل حالة طلاق فى مصر
واكيد معظم المطلقين عندهم اولاد
طيب الولد او البنت دا لو عاش مع شخص واحد من الطرفين ....اكيد هيكون تعبان نفسيا ومحتاج رعاية ومحتاج تكامل الطرفين ومشاركتهم مع بعض
وحاجات كتير عايزين نتكلم عليها هنا فى الموضوع دا
مش مهم نتكلم عن الاب والام اللى بيطلقو بعض ....دول يولعو بجاز
المهم نتكلم عن اطفالهم اللى هما فى حاجة لحد يربيهم ويساعدهم على التعليم علشان يستمرو فى الحياة
اسف على الاطالة
منقول