بنات اشلونكم ... حبيت اليوم اقص لكم قصة ولادتي وقررت اني اكتب لكم القصه بسرعه لعيون بنات تجمع مارس عشان يستفيدون وما يتخوفون من القيصري لان انا حبيت السالفه بصراحه وقلت الرابع اذا ربي رزقني بعد قيصري .. بس لو كنت والده طبيعي ما بفكر في الرابع شفتو الفرف بين الطبيعي والقيصري . المهم ما بطول عليكم وخلوني ابتدي لكم بالقصه .
طبعا انا عندي ولدين واحد عمره 6 سنين والثاني 3 سنين وكان عندي مشكله في حمالهم اثنينهم من ادخل التاسع تخف حركتهم وقلبهم يضعف .
الحمدلله طول فترة حملي كلشي كان طبيعي بس السكر عندي مرتفع وخذت ابر سكر موفا مكس 5 دروب وفي الاسبوع 34 الدكتوره قالت لي ان المشيمه تحت والظغط اشوي مرتفع فقالت لي خففي الموالح و..و.. وعطتني موعد بعد اسبوعين قالت لي ان اسوي انتراسوند عند اخصائية انتراسوند وبعدين بتشوف عن طريقة الولاده وانا اهني قلت اوكي بس المشكله ان من دخلت 35 اسبوع حسيت ان الياهل ما يتحرك وبتاريخ 2 مارس يعني 35 و3 ايام شفته ان ما تحرك كلش خفت واتصلت في دكتورتي مسافره طبعا انا دكتورتي دكتوره فرح في مستشفى البحرين التخصصي فخفت وقلت باروح بجوف مستشفى السلمانيه شنو يقولون لي وبما ان المعترف عليه ان مستشفى السلمانيه ما عندهم مكان وما يرقدون بالساهل لان مستشفى حكومي وزحمه فقلت باروح عشان اتطمن لين ما اتيي دكتورتي .
فرحت طوارئ السلمانيه للحوامل وتقرر لي ترقيد على ان قلب الياهل ضعيف ورضيت بالترقيد ان اكون تحت المراقبه
انا دخلت السلمانية تاريخ 2 مارس فليل تخيلو وقالو لي قلب الياهل ضعيف ورقدوني تحت المراقبه طبعا انا خضعت ورقدت لان دكتورتي فرح كانت مسافره ورضيت ارقد في السلمانيه وتاريخ 3 مارس الصبح ياتني دكتوره وقعدت اتفلسف واتسوي روحه فنانه وراحت وعقب بساعتين ياتني نفس الدكتوره ومعاهه 5 دكاتره مع الدكتوره المسؤله عنهم ودوني حق الانتراسوند وقعدو تقريبا 10 دكاتره على راسي واهم يسون لي انتراسوند تخيلو كلهم اتفقو ان الياهل قلبه ضعيف والماي قليل والشي العود الي قالوه الي خلو راسي يفتر واشكره في ويهي ان راس البيبي اكبر من جسمه بشهر تخيلو في ويهي ما فكرو في نفسيتي وانا حامل خلوني كلش لا حول ولا قوه .
طلعت من الانتراسوند اشوه الا ريلي توه واصل وشفته وقتله واهو ويه ساح تخيلو واهني اانا خفت زياده وتوهق واتصلت في امي وقتله وابوي و بعد اتصلت في الدكتوره فرح تيلفونه يرن بس برع البحرين قعدت ايود روحي ما ابي اصيح ليما نزلت الدمعه وقعدت ارتعد اتصلت حزته للدكتوره فهيمه المطوع وخذت موعد وقلت بوقع وبطلع بروح له ما وعيت الا السستر يايه تبي تحلق بطني يبون يدخولني العمليات عاد انا قتله ان انا نظيفه توني شايله وقالت بعد لازم اشيك وشيكت وقالت اوكي . اهني خفت واتصلت في التخصصي وكلمت الدكتور سلام وقتله دكتور انا في السلمانيه وقالو لي جذي وانا وايد احاتي ومضايقه ابي ايك تسوي لي عمليه قيصري الحين اليوم وقالي تعالي .
والسلمانيه بزور خلوني اطلع والحمدلله طلعت من يدهم ورحت التخصصي ودخلت على الدكتور سلام و وخذو الهستوري والحمدلله لان فايلي عندهم وكلشي عندهم دخلت عليه 5 وشي المغرب وقالي الساعه 8 العمليه وودوني وسولي السي تي جي هاي الجهاز الي يشيكون فيه دقات قلب البيبي والطلق وتصدقون ان قالو لي دقات القلب طبيعيه وعلى حسب طلبي دخلوني العمليات الساعه 8 بس ما بدو فيني الا الساعه 11 واول شي ياني دكتور البنج وسألني هل ابي بنج كامل والا نص واهني قعدت افكر وقتله نص لاني خفت اسوي الكامل وما اقوم منه وقررت وقتله ابي نص والحمدلله الدكتور طلع فنان ويده خفيفه ما حسيت بابرة الظهرابداً وبس طقاني الابره واسدحوني وقعد دكتور البنج على راسي و حطولي لي الستاره وبده الدكتور وانا مو حاسه في شي وخلص وانا مو حاسه في شي والحمدلله طلع رياني بالسلامه 11 و20 دقيقه ليلاً بتاريخ 3 مارس 2010م والحمدلله اول ما طلع سألت الدكتور دكتور شخبار اوكي راسه طبيعي قالي اي الحمدلله فيه شي عاد ودوه وفحصوه وطلعو الوصخ ولوتوه ويابوه لي والحمدلله ولدي طبيعي وما فيه شي وراسه صغنون واهني ارتحت وقعدت اضحك وارتعد والحمدلله صج تعبت اول يومين من القيصري بس الف الحمد والشكر يا رب بالنسبه لي ارحم من الطلق . واشوه بطني فش بسرعه لان كنت خايفه لان وايد بنات الي يسون عمليات تبقى دبتهم منتفخه .طبعا هاي طلع على طبيعة الشخص انا بطني رجع نفس يوم اولد بولدي الثاني ومع الايام يفش اكثر بعد .
هاي قصة السلمانيه معاي الدكاتره مع عندهم خبره وايبون لنه يهال يقولون دكاتره والمشكله ان الي يعلمون اليهال ابروحهم يبيلهم احد يعلمهم .
ما فكرو بنفسيتي كوحده حامل لابه التشخيص غلط ولابه ما يحاسبون حق نفسية المريض مع العلم ان الدكتور سلام قالي ان صج الماي كان شوي ناقص بس اوكي لو نطرنه اشوي ما يأثر وقال ان المشيمه في مكانه الطبيعي . واهو الدكتور ابروحه مستغرب ان السلمانيه ليش كانو يبون يولدوني بسرعه .
بس الحمدلله على كل حال والحمدلله على سلامتي وسلامة رياني وربي يحفظه ويحفظ اخوانه دعواتكم بنات انا ما تفننت بكتابة القصه لان بسرعه بسرعه سامحوني .:087: