اول الفرحة هم ونكد...تعاااالو ساعدوووني تكفووون

السلاااام عليكم بنوتات وحريييم

مشكلتي اليوم مجموع لمشاااكل زادت همي وكرهتني الرجال والحريم والله

صار كل حياتي هموم وقرف ومادري اصبر ولا ما اصبر

ربنا يبتلي لكني بالنهاية انسانة واتمنى اني انول شرف الصبر ولكن طبيعتي عكس هذا

حبيباتي مشكلتي انه تقدم لخطبتي شاب كان يدرس معي بالجامعة وبحكم الجامعة مختلطة كان احتكاكي مثل اي بنت اهلها ربوها على الصراحة والاحترام...اذا اضطرت تكون بمجموعة فيها شباب بسبب تخصصها تدخل وبحدود دراسة يخلصوا اللي عليهم وربنا شاهد عليها وفقط... كنت والحمدلله بشهادة الجميع البنت المثقفة المحافظة على دينها وحاطاه بين عيونها..

كان دايم يتقدم لي عرسان من طرف امي وابوي وكان دائما الرفض هو الجواب إلى أن جاءت في يوم من الايام زميلة لي تخبرني عن ان اخوها اللي وياي بالجامعة يبي يخطبني وامه الحين بالجامعة تبي تشوفني..ماعرف شو اللي خلاني اوافق..اتصلت على امي وقلت لها قالتلي ايه روحي وين المشكلة كوني لبقة بالحديث وانتبهي على تصرفاتك...قلت علم ورحت وقلب يدق دق...قعدت وشفتها ما ارتحت لها من الوهلة الأولى... سالتني عن اسمي ووين ساكنين واسئلة..المهم قلت لها الاسم وقلت لها ساكنين في شقة..هي سمعت هالكلمة والله قالت لي ييييييي شقة؟!!!! انا عمري ما سكنت في شقة دووم بالفلل...

علما انه حالتنا الحمدلله ممتازة جدا لكن ما في غير انا وامي وابوي فليش نخاطر ونجيب فبلا وابوي كثير السفر بسبب العمل ونقعد انا وامي فيها بنات بروحنا...

المهم ضليت ساكتة احتراما لعمرها ولكن كان قلبي يتقطع...وتحملت وانا اسمع عن هالشاب كل الصفات الحميدة من كل الناس..تعرفون جامعة والكل صاحب السمعة السيئة والطيبة معروووف..قلت يلا يمكن يكون من نصيبي! كملت الاسئلة وقالتلي حنا معنا جواز اجنبي قلت لها انا ما معي قالت اوييه حتى هذي؟؟ عيل ليش ابني يريدك؟ بقيت ساكتة راحت قالتلي انا بس ابي اعرف انت كيف وقعتي الولد فيك؟؟انا ولادي ما يتطلعون ولا يحاكون بنات..تميت كمان ساكتة وانا بقلبي قهر.. المهم انهتها وقالتلي انتي ضعيييفة حاولي تسمنين وانا حزتها ابتسمت ابتسامة قهر وتميت ساكتة وبعد هذا كله قالتلي سمعي انا ابني مطيع واذا انكتب الكتاب وكان وياك لما ابيه بييني...واذا تزوجتوا لو كان نايم وياك بقوم وييجي عشاني..

قلت لها مشكورة وتسلمييين وقمت..

بعد هذا كله لقيت ابوي يتصل فيني ويقلي الابو والولد يبون يزوروني اتعرف عليهم شو رايك؟ قلتله اللي تشوفه..قال خلاص ان شاء الله وانا ما قلت لابوي اللي صار عشان ابوي مريض بالقلب وتعرفون اي زعل يأثر عليه...وكمان ما قلت لامي لانها كانت مسافرة عند خالتي وخالتي كانت مريضة بتتعالج ونفسية امي كانت زفت حدها وخفت اضايقها...وقلت لها انها امه انسانة عادية وحبوبة..

شافهم ابوي وانعجب بشخصية الولد واحترامه وقلي يابوي هذا الولد محترم وان شاء الله يحميك ويصونك...وعدت الليالي واتفقوا ما يصير شي لين اتخرج..وتخرجت وجو الاسبوع الماضي وطبعا دوم كان في زيارات بين الاهل والام كانت تقول لامي دووم مادري كيف تعيشون بشقة وانا دووم اقنع ابني ببنت اختي لكن هو مو راضي وهاي قالتها لي يوم ما شافتني...المهم حتى امي كبرت عقلها وسكتت عنها وما قالت لابوي..

ويوم جو الاسبوع الماضي يتفقون ع المهر وكل شي قالهم ابوي الطلبات ووافق الابو على كل شي ماااااااااا اعترض ابد ابد...وقروا الفاتحة وللعلم الزيارات بين الاهل تمت على مدار السنتين وكنا مثل الوعد خلاص بنتي لابنك لكن طبعا بدون ما اكلم الولد ولا شي...واستخرت كثيييييييييييييييييييييييييييييييييير وربي يعلم...

ومين اللي كان عندنا وقتها؟؟؟ بس الابو والابن وعم الولد...بعد هذا امه لا اتصلت ولا باركت ولا حتى خواته باركو مع اني اعرف اللي كانت معي بالجامعة هذا غير يا بنات الي كانت تتصرفه معي بالجامعة قدام كل البنات تحتقرني وانا والله يعلم كنت اذا بطلع من غرفتي بالجامعة اروح للمسجد او المحاضرات وبسسسسسسسس..

المهم بعد كل هذا يتصل الولد ويقول لاسف ابوي يقول المهر عالي على الرغم من انا طلبناه نفس مستوى ربيعاتي والناس اللي حوالينا لا كثرنا ولا شي وانا من النوع القنوووع اهلي انصدمو وقالوله الناس عرفت انه انقرت فاتحة البنت الحين تغيرون رايكم؟؟؟ يعني انا ماني عارفة اذا ابوه رجال قال كلمة وانتهى الموضوع المفرووووض...لكن الله بلانا فيهم..وغير هذا كله ابوه طلب الولد وهو حاليا يشتغل هني بالامارات الولد واهله بدولة ثانية...طلبه عشان يناقشه بموضوع المهر ويريده اسبوووع عنده بالدولة اللي هما مقيمين فيها...طيب انا اعرف ان كل العرسان بعد قراية الفاتحة يدورون يكونون مهتمين بعرايسهم شبكة وصالون وغيره وصالة وكوشة ويدور ويهتم فيها...انا من يوم ما طلعوا من عندنا والله والنكد صوبي من كل ناااحية...وانا خايفة على ابوي يصيرله شي واليوم قررنا انا وامي نقول لابوي عن موضوع ام المعرس وقلناله وكان موقفه السكوووووووووت وكان شكله مصدووم وانا خايفة عليه يحط بقلبه المهم طلبت منه قلتله يابوي انا وافقوا علي اذا الحين غيروا رايهم انا ما انطر اسبوع لين يتناقشون وهو يسافر وانا مرمية الكل يسالني بديتي تجهزين؟؟؟ شنو اقول وشو اكذب؟؟وانا بنت ناس والمعاريس والله يدقون ع البيت وكله نرفض من سنتين ان البنت مسمية على واحد وما يصير تنخطب لغيره.. والله الذي لا إله إلا هو تعامل مين يرضاه على بنته او خواته؟؟؟؟ لسة باقي بعد ما قروا الفتحة يبون يتشاورون اذا ايه او لا... لما قلت لابوي انه خلاص يبه ابي اعرف مصيري واعيش حياتي قلي يا بنتي بعطيهم وقت لين الأحد اذا ما ردوا خبر انا بتصل عليهم لانه ما يجوز انا اتصل.. قلتله حاضر..


بنات انصحووني وساعدووني امانة وقوليلي تصرفات امه واخته طبيعية؟؟؟؟؟وغير كذا يقولون الشبكة تنجاب بعد كتب الكتاب

امانة طيبوا خاطري وصبروني

واسفة على الاطااالة