ساعدوني يزاكم الله خير .. عاجل وضروري للغاية

السلام عليكم والرحمة

بنات المنتدى العزيزات .. بقولكم قصتي .. واتمنى كل وحدة ترد علي وتقولي رايها .. والله بدعيلكم

اولا انا ربة منزل وعندي ولد عمره 10 شهور .. وانا ادرس بالجامعة والفصل هذا ماخذه 4 مساقات يعني دوامي خفيف .. وجبت خدامة اندونيسية .. والحمدلله هي زينة ونظيفة .. بس المكتب قالولي انها تعرف تطبخ وعلى هالاساس دفعت اكثر .. وانصدمت لما سألتها وقالت لي هي ماتعرف تسأل واتحملت وقلت ماعلي انا بعلمها .. بس هي هي مافي استجابة وحتى عيش ابيض ماتعرف تسوي .. المهم قمت اطبخ بروحي وبعدين اروح الجامعة واذا دوامي الصبح ما اطبخ ولا نتغدى .. اكل لي اي شي خفيف في الجامعة اما زوجي فينام من دون غدا ..والحين الله يسلمكم المصيبة الكبيرة انه انا قاعدة بشقة .. والحمدلله عمري ماجفت شي ..ولاسمعت شي ومرات قبل لاتيجي الخدامة كنت انام بروحي مع ولدي .. بس من شرفت خدامتي وفي يوم من الايام .. قمت الصبح الساعة 8 لمحت خدامتي واقفة عدالي .. تطالعني ولما جفت الساعة كانت 8 واستغربت انا مخبرة الخدامة تقومني الساعة 10 هي ليش داخلة الغرفة الساعة 8 .. المهم طنشت ونمت .. بس لما قمت الساعة 10 .. قمت افتح الباب جفته مقفول .. فاستغربت كيف دخلت الغرفة وهي مقفولة .. طبعا اتروعت ومت من الخوف . .. وخبرت زوجي قالي يمكن تتخيلي .. المهم هي علطول بعديها قالت لي الخدامة انها بتسمع اصوات جن كل يوم وحد ييجي من الجن يتلمسها وينام عليها وصرت اكره الشقة واخاف اروحها .. كانها تبغي تغطي عالموضوع .. لاني كشفتها فاهمين علي .. المهم وايد اخاف منها .. ما تتخيلون اشكثر عايشة برعب لما يكون زوجي مش موجود ونكون بروحنا .. والحين مش عارفة ارجعها المكتب ولا اخليها .. مش مرتاحة لها .. واخاف اذا رجعتها اهل زوجي يعلقون علي خاصة انها ثالث خدامة عندي بعد تجربتين فاشلتين.. وبعدين اذا رجعتها يبالي شهر لين ماتجي خدامة جديدة .. وانا ما اقدر اعيش من دون خدامة شهر خاصة اني ادرس .. الله يخليكم خبروني شو اسوي