لبنات البحرين ..

هلا اختي والله يتمم حملج على خير وتقومين بالسلامة ان شاء الله

شوفي اختي انا اللي سمعته انهم حالهم حال غيرهم من مستشفيات الحكومة

يعني انتي وحظج شوفي الطاقم اللي يكون موجود وقت الولادة ناس منهم حليوين وناس ما ينبغون فذي يعتمد على نفسيات الدكتورة والممرضات المتواجدين وقت الولادة

واتوقع على حسب زحمة المستشفى بعد يعني اكيد لما تكون الأجنحة فاضية غير لما تكون مليانة فيسيطر التعب على الممرضات والعاملات ويشتغلون بدون نفس

انتي لا تحاتين من الحين وكل شي بوقته حلو يختي والله يجيب أحمد بالسلامة ان شاء الله :)

انا اول مره ولدت هناك كااان زززززفت بس الزين فيهم يخلونش غصب تعتمدين على نفسش خصوصا بالرضاعه مايعطون حليب الا بحنه ورنه

ولادتي الثانيه كانوا عسل واهتمام ورعايه ..

الله يستر انه بولد في جدحفص

الان اقرب مكان لي معنى بعد بعيد

الله يسهل عليج وتقومين بالسلامه

هلا اختي .. بالعكس اني افضله على السلمانية من كل النواحي ..نظافة واهتمام ورعاية
ترقدت عندهم اسبوع ماحسيت قصروا ولا في شي والمكان جدا نظيف وحتى تقدرين تكلمين الممرضات واني مكانش في السرير (فيه جهاز)
اي وقت تبين تبدلين شرشف السرير على طول يبدلونه وعلى طول عاملات التنظيف ينظفون المكان وتحت السرير
السلمانية صرت عندهم 5 ايام لاعت جبدي من الوساخة وشرشف السرير كلما قلت اليهم بدلوه قالوا بكرة بكرة!! غير الاوساخ اللي موجودة قبل اترقد تحت السرير
قشر موز وكلينس وووو .. مافيه يكنس تحت السرير يجون عاملات النظافة بس عند الباب ويمشون مع اني صرت في جناحين ونفس الوساخة
بالنسبة للحليب عادي في جدحفص الدكتورة هي اللي قالت للممرضات ان هالطفلة اعطوها حليب لان ماكان ينزل لي وكانت كل تصيح اقول لهم وياخذونها عندهم

هلا اختي

مرت اخوي اولد في مستشفى جد حفص

وتقول انهم زينين و ومعاملتم زينه

بس مايخلون اليهال يدخلون ههههههه

وبس عادي تطمني

هلا خيووو..
الله يسهل ولادتج يا رب ويتمم عليج الفرحة بجية احمد ان شاء الله..
بقول لج..
كل مكان له ايجابياته وسلبياته.. يعني حتى الخاص نفسه له سلبياته مو معناه انه مكان كامل من مجاميعه!
الاهم ما تطغى السلبيات على الايجابيات..


أنا بحكم تجربتي بولادتي فيه.. ما اقول لج انه سيء مثل ما بعض الناس يقولون.. ولا أقول لج انه ممتاز لأن صادتني بعض الصعوبات.. ممكن تكون مقبولة بالنسبة لج او بالعكس تتضايقين منها بحيث ما تحبين تولدين هناك.. هذا يعتمد عليج انتي!

المعاملة وقت الولادة الكل يمدح فيها..
انا لما رحت الصراحة كانوا الممرضات عسل اذا يتصل زوجي ينادوني يخلوني اكلمه من التلفون قبل ما حمى الطلق عليي طبعاً.. بس لما حمى الطلق وايد كانوا يردون عليه ويخبروني ان زوجج اتصل فيج يسأل عنج الحين ويسلم عليج..
سووا لي كل اللي كنت احتاجه بهدوء.. وهالشي يعتبر من أهم الايجابيات بالنسبة للي تولد لأن نفسيتها تعبانة وتبي احد يوقف وياها بنفس مو يكلمها من طرف خشمه..

لكن بعض الامهات يحبون احد من اهلهم يدش يواسيهم مثل امهم او عمتهم او زوجهم.. وهالشي ممنوع بتاتاً في جدحفص.. انا الحمدلله هالشي كنت اتمنى يكون مسموح وقت الولادة لكن ما طولت وايد من دخلت لين ولدت!

وقت ما كنت اولد خلاص وطلع الراس اللي ريحني ان الممرضات المتواجدات بحرانيات قاموا يسمون بالله ويصلون على النبي .. هالشي ريح قلبي واااايد!!

بعد الولادة ودوني الجناح وهالشي اللي انا ما حبيته في جدحفص..تكرمين الحمام مشترك حق 6 وحدات في نفس الجناح.. شي صعب الصراحة.. والحل هو الغرفة الخاصة لكن للأسف أنا وقت ما ولدت ما في ولا غرفة خاصة فاضية لي واضطريت ان اكون في جناح مشترك.. بس الشي اللي صبرني ان ما تميت عندهم.. كان كل شي زين واوكي عطوني رخصة يوم ثاني ما ولدت حتى ما كملت 24 ساعة عندهم.. والبيت اكيد اريح من اي مستشفى!

ثاني شي.. الممرضات ما يرضون يمسكون عنج الياهل.. وهالشي صعب على البكرية اذا كانت بروحها وما تعرف تتصرف.. لكن له ايجابية انج بتعتمدين على روحج من اول ما يجي ولدج على هالدنيا..

هذا اللي اعرفه من خلال اللي جربته.. اما السلمانية ما جربتها الصراحة.. وهالمرة محتارة اروح جدحفص مرة ثانية ولا اسيّر على السلمانية!!؟

الله يقومش بالسلامه
ماعندي فكره عنه

الله يقومش بالسلامة

عن نفسي وعن تجربه انصحش بجدحفص السلمانيه كلش ما انصحش فيه لا اهتمام لا وقت الولاده ولابعدها تعبت وتعبت نفسيتي بالسلمانيه بس جدحفص غير معامله واهتمام وحتى قبل لا اولد كانو يدخلون امي وزوجي الي داخل غرفة الولاده

ايييي وفي شي بعد

مستشفى جدحفص مايخلون الزوار يطولون حتى لو غرفه خاصه يجي الناطور كل شوي يطق البيبان وانتهت الزياره

ولو بايده يدخل الحجره دخل

اما السلمانيه لو يقعدون لــ 12 عادي