بنات ادعولي أحمل و ادعولي ربنا يبعدني عن المعاصي - بعد مرتين اجهاض

:091:

بنات الله يخليكم ادعولي من قلبكم

انا متزوجة و عندي طفل الله يحفظو

في حملي الاول كتير تعبت و ولدت في عملية قيصرية ، و كتبت قصة ولادتي في قسم الحمل و الولادة، اذا فتشتو موضوعي يمكن تلاقوه

المهم بعد الاربعين على طول ركبت لولب
و جاني اكتئاب بعد الولادة

و قعدت كتير نفسيتي تعبانة

المهم كنت ما بدي احمل تاني قريب - بالمرة
و كنت كل ما الناس الحواليني يقولو لي ان شاء الله ربنا يرزقك ولد او بنت أكشر في وجههم و اقوللهم ما بدي ولاد تاني
:035:

شوفو كيف كنت انا... ربنا يسامحني يا رب

المهم كنت اقعد انتقد البنات اللي بيولدو ورا بعض
و كنت كل شهر اذا تأخرت الدورة، يصير عندي حالة عصبية من الخوف ، و ما أهدا الا لما تيجيني الدورة و أتأكد اني ما حامل

و كنت أقول لزوجي اذا طلعت حامل ما بدي البيبي بروح أنزله :035: عن جد شوفو كيف كنت انا هبلة و كيف كان كلامي - أستغفر الله العظيم


المهم حياتي كانت كلها مشاكل ، و قبل 4 شهور، كنا في مشاكل كبيرة في البيت و كنت رح أتطلق، فجأة اجاني نزيف و لما رحت الدكتور قاللي كنتي حامل و اجهضتي

اتخيلو بدال ما ازعل فرحت و قلت الحمد لله لأني ما بدي بيبي تاني يجبرني على العيشة مع زوجي

المهم بعديها الحمد لله انا ربنا هداني و رحت لاستشاري نفسي لأنو المشاكل اللي كانت بيني و بين زوجي بصراحة كنت انا السبب فيها بسبب عصبيتي و بكائي الدائم

و حاولت ارتب حياتي شوي مع زوجي و اهتم في بيتي اكتر

و بعد 4 شهور من الاجهاض الاول اجاني نزيف تاني
و رحت على الدكتور قاللي اجهاض تاني

طبعا المرة الاولة كان الحمل شهر
و المرة التانية كان شهر و نص - و في المرة التانية احتجت عملية تنظيف كحت
و عملولي اياه بدون اي بنج لا موضعي و لا كامل - متت من الالم و قعدت ادعي ربي و انا في العملية انو يجعل هالالم كفارة لذنوبي الكتيرة

بنات هلا انا من اخر اجهاض لي شهرين - و بعد اجاني اجهاض مرتين اتغير احساسي تماما ناحية الاولاد

صرت اتمنى لو احمل و اولد بيبي
سبحان مغير الاحوال
و صرت الوم نفسي انو يمكن الاجهاض هاذا بسبب كلامي اللي كان فيهو معصية لربنا و اعتراض على حكمه - استغفر الله العظيم

و هلا انا الدكتور تبعي عمللي فحوصات تبعة الاجسام المضادة اللي بتسبب الاجهاض

و لسا النتيجة ما طلعت و انا بنتظر على نار

بنات الله يخليكم اللي بتقرأ موضوعي تدعيلي أحمل قريب و ربنا يثبت حملي
و ادعولي ربنا يغفرلي ذنوبي و كلامي اللي كنت أحكيه

و يا ريت لو في وحدة عندها نفس شعوري اللي كان يجيني زمان تتعلم من غلطتي و تستغفر ربنا قبل فوات الاوان

بنات ادعولي الله يسامحني - الله يخليكم

شكرا كتير حبيباتي