أسنان بطتي واوااا(2)

الله يساعدش اختي والله بنتي مثل بنتج السوس لاعب في أسنانها لعب احيانا تألمها واحيانا لا

والله البنج الكامل يخوف للكبار فما بالج بطفلة ....... بس عاد اني ما عندي خبرة وان شاء الله الاخوات يفيدونش

هلا أختي أم علاوي.. ومسكينة للحين بنتج تعاني الله يشفيها... شوفي أختي دام مافي فايدة من أسنانها والأفضل تشيلينها عشان الدائمة يطلعون عدلين شيليهم لها.. الله يسلمج أختج ام عبود كانت عندها مشاكل تسوس بس مو في الأماميين وكان وقتها عمري عشر سنوات والله سويت بنج كامل وشالوهم لي... شوفي بعد ردود الأخوات وأستخيري والله يجدم اللي فيه الخير...

اولا ما تشوف شر الحلوة
وهذاني اعاني وية كتكوتي بعدد
المهم صدوقي اسنانه مسوس يمكن 6 ومحتاجين تنظشف وحشوات بسس ورحت ابه المركز وكل مررة بالصياح والصراخ يشتغلون في اسنانه اشووي وما اقدر اسكت عنهم لانهم بيزيدون وبيوصلون للعصب وبعدين لازم قلاع والحين المشكلة اقل ولما تعبو منه المركز قالو بيحولوني على مركز عالي لانة هناك تخصصهم اطفال ورحت ابه ونفس الشي كل زيارة صياح وصرراخ قال الدكتور ولدكم ما اليه حل الا نسويه عملية احولكم السليمانية ونسويه بنج كامل واشتغل في اسنانه على راحتي وفعلا اخذنا اقرب موعد وسووه بنج كامل وسووى كل اسنانه حشوات يعني ولا ضرس قلع لانة ما كانو محتاجين لكن يوم نروح هناك يمكن في 5 جهال في حدود عمر صدوقي كللللهم محتاجين اسنانهم قلاع وبيسون بنج كامل وبيشيلون اسنانهم لدرجة ان في جاهلة شايلين منها 13 ضرس تخيلي
والي ضرسين والي 5 يعني ولدي كان احسن وااحد فيهم لانة مو محتااج قلاع مجر تنظيف وحشوات وبس والحمد لله تم كل شي على خيررر وبصراحة اني ارتحت وهو بعد ارتاااح على عمرري
( على فكرة اني وديته عيادة خااصة بعد قبل كذا مرة لكنه صراخ وصياح ونطلع بدون ما يسوون شي في اسنانه)

هدرت وااجد بس الي ابي اقوله اليش عادي تسوي بنج كامل وتشيل ضروسها لانه الحل الوحيد والدكتورة ما قالت هالشي عن عبث واذا مو قادرة على المبلغ لانه فعلا كبيرر تقدرين تودينها المركز وتقولين اليهم السالفة وهم بيتصرفون لانة في تحويل لمركز عالي ومن هناك للسلمانية وبيتم كل شي هنااك وبتفتكوون

شروق رانيا وحبيبة جيمي والككادي الله يبعد عنكم كل شر

وفعلا الاسنان متعبة للكبار فما بالكم الاطفال

المشكلة عندها الاسنان الللي المفروض ايح ماطاحت وطلعوا عندها الاسنان الجديدة واللي المفروض يطيحون طلعوا ليها من اللثة !!!!! وهذا اللي مخوفني لو ويدتها مركز ما يعرفون له !!!!!

ولدت اختي شالوو اسنانه كلها وعمره 7 سنوات

والحين الحمدلله بدو يطلعون له جدد

نسيت ما قلت عمر ولدي الحين عمره 5 سنوات ونص يوم يسوي اسنانه كان عمره 5 سنوات بالضبط

بسومة اذا السالفة جدي يبي اليها دكتور شااطر وبصراحة اقول اليش خلش على عيادة خاصة واهم شي سلامة الجاهلة وهذلين اسنانها بيظلون وياها طول عمرررها يعني يستاهل تدفعين عليهم حتى ولو مبلغ كبيرر
وما تشوف شر الحلوة

ماعندي فكره
اتمنى البنات يفيدونج

ماتشوف شر الحلوه


اني بعد محتاره ويا بتي عمرها سنه و10 شهور وعندها اسنان مسوسه

ماادري اشلون اعلمها تغسل اسنانسهاا وساعات تصيح تقول يعور

بسومة اني ولدي طلع له سن جديد والسن القديم ماطاح والتهبت لثته ورحت معاه وقلعوه له في ثواني ببنج مؤقت لكن السن الجديد صار معوج الدكتور طمني وقال بيتعدل بعد فترة و الدور شكله جاء على السن الثاني الله يعينا عليهم
استشيري اكثر من طبيب سواء حكومي او خاص كلميهم واستشيري وماعليها الا العافية

بسووومه حبيبتي ..

اختيارش مووفق للدكتووره نفسها الا وديت ولدي لها وحكت له لثتته ...
وبعد يومين طلعو اسنانه من بعد عذاااب ومرض وصخوونه متواصله ..!!

وعيادتها كشخا وكلها العاب هههه مو !!

عموما سبق وقلت لج انو ولد صديقتي الا دلتني على العياده تطلع اسنانه وتسووس ..
وكان عمره حوالي الثلاث سنووات وراحت حق نفس الدكتووره وشالتهم كلهم له ببنج كامل ..
وفي اقل من سااعه بس واخذت مثل المبلغ 300 دينار ..

ومسكين للحين بدون اسنان بيكمل اربع سنوات قريب ..
وقالت لها انو طبقة المينا مو موجوده بالاسنان الا شالتهم له نهائييا ..!!
وانو ان شاء الله يطلعون الاسنان الجديده بطبقة المينا ..

ومن غير المينا يطلعون وعلى طول يسوسوون ...
بس بصراحه الدكتووره ممتاززه وما صار في ولدها اي شي ..!!

من بعد البنج والقلالاع ...
بس الاكل صار غير كل لين وسهل الاكل لانه بدون اسنان ..

ويارب ما على الحلووه اي شي ..!!
وطمينيينا عليهاا ..!!

بسوومة عمري مادام مافي الا هالحل تلاحقي عليها وشيليهم احسن قبل ما تزيد المشكلة وما عليهااا شر ان شاء الله

ماعليها شر
بس لازم تنتبهي اكثر للاسنان اللي بتطلع
لازم تعلميها تنظفهم زين وتهتم فيهم اكثر

ماعندي فكره الاخوات ماقصروا الله يعينك ويعينها اختي الم الاسنان مايتحملها الكبير كيف الصغير

أهلا أختي

اول شي البطوطة ما عليا شر يا رب

قلتي (ظلت مدة طويلة بدون اسنان).. اتوقع تقصدي انها متآكلة ما قلعتوها صح؟

وبالنسبة للاسنان الجديدة... قلتي طلعت بس الاسنان اللبنية ما طاحت.. طبعا تقصدي الاسنان اللبنية المقابلة للاسنان الدائمة اللي طلعت صح؟.. هذا اللي فهمته

طبها الاسنان اللبنية لازم تنشال مادام الاسنان الدائمة طلعت.. لأنها ما راح تطيح لوحدها .. لأن سبب سقوط الاسنان الدائمة هو تآكل جذورها.. و جذر الاسنان الدائمة يتآكل اثناء نمو الاسنان الدائمة بس الحين خلاص طلعت.. هذي نقطة

النقطة الثانية وجود الأسنان اللبنية في كانها ما يخلي الأسنان الدائمة تطلع في موقعها صح فلازم تنشال

الحين... الاسنان اللبنية ممكن تنشال ببنج موضعي
بس اذا البنوتة ممكن ما تتقبل.. صعب يكمل الطبيب شغله
هذا بالاضافة إلى انهماكثر من سن
واذا كانوا مرة متآكلين ما بيهم جز ينمسك.. معناه خلعهم ياخذ حبة وقت اكثر

يمكن على هذا الأساس قررت الدكتورة ان الخلع يكون بتخدير كامل

طبعا الأسنان الثانية المسوسة اذا كانت خلفية.. نصيحتي انها تتصلح اذا في امكانية طبعا.. أفضل لها.. لأن الأسنان الدائمة تطلع في سن متأخر... ممكن ينعمل لها قطع عصب - حشوة - وتلبيسة
وهالعملية ممكن تتم اثناء البنج الكامل لما يجي يشيلوا الاسنان اللبنية مرة وحدة.. واذا مايتصلحوا.. الله المعين مافي حل غير الخلع
واذا حابة تحافظي على مكانها لين تطلع الاسنان الدائمة فيه قطعة معدينة ممكن تتركب لها وتحفظ لها مكان الاسنان.. طبعا رح تكلفش اكثر

اتمنى للبطوطة الصحة والسلامة..
ولازم تعلميها تفرش أسنانها وشجعيها عشان الاسنان الدائمة استثمار لمدى الحياة... وساعديها في تفريش اسنانها الى عمر 9 سنوات لأن الأطفال حتى لو تعلموا ليه مايعرفوا ينظفوا كويس

ميمي الجميله;11284499:
ماتشوف شر الحلوه


اني بعد محتاره ويا بتي عمرها سنه و10 شهور وعندها اسنان مسوسه

ماادري اشلون اعلمها تغسل اسنانسهاا وساعات تصيح تقول يعور

في فرشة أسنان للاطفال الرضع تنلبس باصبع الأم اسهل للام في تفريش اسنان الطفل
تلاقيها في سنتر بوينت ومذر كير

طبعا 1 ونص مرة صغنونة على انها تتعلم
لازم انتي تفرشيهم.. ولحد 9 سنوات لازم تفرشهم تحت اشرافش
ووقت النوم خلاص لا تعطيها حليب لأنه عامل كبير في تسوس أسنان الأطفال المبكر
لانهم يناموا والحليب في فمهم ويتخمر والبكتريا تلعب مبسوطة وتاكل الاسنان

و عشان تصير عادة عندها.. خلي لها فرشتها الخاصة بدري.. ودائما تشجعيها وتساعديها وانتي بعد فرشي اسنانش قدامها وحبة حبة تتعلم