بسم الله الرحمن الرحيم
السلام عليكم ورحمة الله وبركاته ,,
خواتي العزيزات ,, محتاجه لنصياحكم ودعمكم ,, هالأيام احاول اراجع نفسي واخطائي واحاول اني اتفادها ولكن ,, ترجع وتكبر مشكلتي ,,
الله يسلمكم ,, ربي الرحيم ,, رزقني بأغلى شيء كنت اتمنااه طول هالفتره من 3 سنوات ,, انسان حبيت اطباعه وصفاته ,, مابقولكم انه خالي من العيوب لا بالعكس ,, وعيبه الاول عصبيييته الشديده ,, ويعق كلام ,, وعقب اعرف يندم فيه ,, كان بيننا أحترام وتقدير ,, وماعمرنا عشنا قصة حب ,, ابد ,, بالعكس ,, كان يناديني بأختي لين اليوم اللي صار وفاتحني انه يبا يتقدم لي ,, بصراحه ,, ماكان عندي اي ردة فعل لاني ماعرفت كيف اتصرف بهاي المواقف ,, وخاصه اني انا يوم اكلمه اكون متوتره حييييييل ,,
حاول ان يشيل هالتوتر ويقولي كلميني بطبيعتج وووو ,,
المهم ,, هالشخص يكره اطباعي ,, وطبعاً مالومه ,, لأنه يبي انسانه واثقه من نفسها تتكلم وماتسكت وتقول شو بخاطرهاا ,, نتكلم عن مستقبلناا ,, انسانه فاهمه ومثقفه وواعيه ,,
رغم ان بداخلي احس اني انسانه ناضجه وفاهمه واقدر اتحمل المسؤليه ,, لكن فيني عيب الخوف والتردد والصمت الدائم ,, انا وحده عشت سنين حاله انطوائيه في غرفتي وع النت ,, ما اخالط حد ما اطلع ,, ماكنت اشكي لحد حتى صديقاتي ابتعدت عنهم مابي اشرح الأسباب ,, لكني وايد عاندت نفسي ماكملت دراستي رغم الحاح امي وحتى الشغل ما اشتغلت ,, وماكان فيه اي دافع للتشجيع من قبل اخواني ,, اللهم امي تقولي سوي سوي وكنت اعاند ,,
يا هالأنسان اللي صدق بطريقته عرفت اخطائي اللي انا المفروض طول هالسنين ماتتركم علي واني اعالجهااا ,, بس محد نبهني عليهااا ,,
ف صار يقولي صرت اتضايق من اكلمج ,, لان ماعندج اسلوب ماتعرفين تتكلمين ,, ماتعرفين شتقولين ماتعرفين شيء بدنيا كيف نتزوج وانتي ماتقدرين تتحملين المسؤليه ,, يحاول يضغط علي وانا فاهمه ان يباني ادافع عن نفسي وحاول بأشياء وايد يعق كلام قاسي علي ,, عسب اتلحلح بس انا اتلعثم وماعرف اتكلم يا يعصب من سكوتي يا يعصب اذا تكلمت وماعرفت شو اقول ,,
ف يوم اللي تقدم لي وكلم اهلي وعلى اساس ان نسوي فحص ماقبل الزواج ,, كلمني ,, نا وايد مستانسين ونتكلم عن هاليوم ,, وشويه قالي اتصلي للمستشفى الفلاني ,, واسئليهم ,, وانا عندي طبع خايس بهاي الامور اعتمد على امي ,, ف طلعت مني كلمة ماعرف لهسوالف وهذه الكلمه تنرفزه مني ,, وكنت واعده نفسي ما اقولها لكن بدون قصد قلتها ,, لأن فكرت وقتها ان بضطر اني اتكلم انجليزي وانا ميحه بالانجليزي واستحي اقوله لا يفشلني وخاصه هو ماشاء الله عليه دارس برع ,,
فقام علي وعق هالكلام ,, ان انا انسانه مالي طموح وانسانه ماتعرف تسوي شيء لا صديقات عندها ولا تطلع ومنطويه على نفسها حق شو تبغي تعرس وهي ماتقدر تتحمل المسؤليه ,, ويقولي لاتاخذين الزواج من ناحيه عاطفيه لان الزواج مسؤليه ولازم تفكرين بعقلج وكيف تتصرفين ,,
وكلام وايد حتى ماقدرت اقول شيء بس اتذكر اني كنت اتأتأ عصب وسكر التلفون وقتهاا ,, وماقام يرد علي على كثر ماطرش مسجات وعلى كثر ما اتصل ,,
هو ماقصر معاي حتى يوم يانا ياب لي هدايا شكثر وكل ها زهبة الملجه ,,
وانا من كثرهم مافتحتهم كلهم خليت النص حق اليوم الثاني وقام سئلني شو اعجبج ,, مع ان ذووقه رهيب ماشاء الله ,, قلت فتحت صندوق واحد وقلت بفتح البقيه باجر انزعج بس سكت ,, لان تعب عليهم وجي ويوم عصب قالي حتى بدل ماتفرحين بالهدايا اللي تعبان عشانج عليهم ,, تقولين لي باجر ,,
انحرجت بصراحه وقعدت افتحهم وجي وطرشت له مسج اشكره واقوله ذوقك حلو ومايرد علي الحين صار له يومين ,, وهلي يسئلوني عنه وانا مكسورة الخاطر ,,
وكل اللي قاله قبل يوم عصب علي ان احتاج اعيد النظر بالموضوع ,, وكل شيء قسمه ونصيب ,, واذا الله كاتب لنا بنكون لبعض وهشيء مافيه زعل ,, واشياء وايد يمكن خايفه منها انا ,,
انا ودي اصلح من نفسي وايد ,, وهو يقول مب قادر يفهمني ويفهم طبعي ,, واني غير مافي انسان مثلي ,, لان طبعي مول ماينطاق ,,
وانا مابغي اخسره لو اني خسرت ,, اعرف اني عمري ما انفع لشيء وعمري مابحقق شيء لان كل هالفشل بيدي انا سويته ,, انا صار لي يومين حابسه عمري ,, وما اكل شيء ,, واقوم الليل ادعي الله واصلي الاستخاره ,, مع اني صليت فيه وايد قبل ,, والحين بعد اصلي ,,
بس انصحوني شو اسوي ,, وعلومني كيف يتعاملون مع الرياييل ,, حتى المواضيع اللي المفروض نناقشها وانا ما حاطه في بالي او غايبه عني ,, لأن محد يعلمني بصراحه ,,
وانا اعرف انه ماله ذنب وكل الذنب ذنبي بس ذنبه عصبيته الزايده اللي يخليه يحدد مواقف وايد بدون تفكير ,, بس انا ماحب اقوله هشيء بويهه ,,
