ازيكم يابنات عاملين ايه
انا عملت كبسة دجاج وطلعت جميييييييلة اوي الحمد لله وصورتها
فقولت انزلهالكم :)
المقادير
3 كوبايات رز بسمتي..انا بجيب الاصفر لان النشا فيه اقل
دجاجة متوسطة..
4 بصلات
توابل مختلفة
ملح حوالي 4 معالق صغيرة
6 او 8 حبات فلفل صحيح..
معلقة صغيرة قرفة..
5 او 6 فصوص حبهان...
4 ورق لورى...
معلقة صغيرة كركم...
معلقتين او 3 بهارات الكبسة...
واحده لومي ولو حابه طعمها يطلع خرميها بالسكينة
حاسه اني ناسيه حاجه هههههه
اه زيت او زبدة
اه وزبيب..ولوز لو تحبوا بس انا مبحبوش معاها :)
الطريقة بقى :)
الاول بنغسل الرز كويس وننقعه ف مية...
وبعدين نبدأ بقى التحضير
اول حاجه نقطع البصل شرايح رفيعه وطويلة
انا بقطعه يااما دواير وبعدين افردها من بعضها
يااما بالطول...مش هتفرق الاسهل نغمله :)
وبعدين نحط شوية زيت في الحلة الي هنعمل فيها...ونحمر نص كمية البصل فيها لحد مايدبل
انا عملته ف طاسة بره عشان احمر الدجاج ف الحلة التانية ف نفس الوقت لان كنت متأخره :)
نقطع الدجاج ..انا قطعته 8 قطع
وبعدين زي ماقولت نحمر الدجاج ف الزيت ...ونضيف عليه البصل الي حمرناه ف الاول
والتوابل كلها ونقلبها كويييس وبعدين نضيف المية...ونغطيها حوالي نصف ساعه مثلا عشان تقرب تستوي
بعدين هنافي طريقتين بقى والاتنين بيدوا نتيجة متقاربه
الاولى انك تضيفي الرز عليهم مع الفراخ وتسيبيه يستوي عادي...وانا بحب دي بس المشكلة ان الفراخ بتبقى ف وسط الرز كدا وانا بحب احطها لوحدها ف التقديم على الوش يعني
التانية انك تشيلي الفراخ وتضيفي الرز للمية وتزودي المية لو كان اتبخر منها جزء كبير
بحيث يكون ارتفاعها فوق الرز بحوالي 1 سم
وتسيبيه يستوي عادي ولما يشرب ميته تحطي الفراخ على وشه تكمل سوا...ولما يستوي تغرفي براحتك بقى :)
وف طاسة نحمر نص كمية البصل الي كنا سبناها
ولما تقرب تحمر نضيف الزبيب ونحمره معاها ونزين بيه الوش
ونضيف عليه الفراخ
وبألف هنا وشفا
لو عجبتكم ماتنسوش الدعاء والتقييييييييييم
