مع الوقت الألم بدا يزداد للساعه عشر وشي تقريبا وكان متقارب ، وقعدت بنتي تصيح تبي ابوها :024:، وحاولت انومها ، بس نامت على الساعه عشر ونص تقريبا :042:دخلت آخذ شور عل وعسى يخف الألم والحمدلله دام اني تحت الماي الدافي كان الألم اقل وطلعت لبست ثيابي وتقعد بنتي تصيح والألم شغال عدل وكنت احاول اتنفس ، على الساعه 11:55 حسيت زوجي تاخر، نسيت ان ليلة السبت يطلع مع ربعه ، فدزيت له مسج :053:كتبت فيه ( بولد ) وسيده اتصل فيني ، قلت له ما اقدر اتحمل الألم ، فقال اوكيه دقايق وانا عندش
وتقعد بنتي تصيح مره ثانيه واني من الألم اجر روحي، سدحت عمري صوبها انومها ، ويمكن يخف الألم، حسيت برفسة البيبي ، تك بوووووووووووووووششششششششش :047:، الماي انبط ، اني هني جنه ضاربتني ام الديفان :023:، بنتي تصيح واني مو عارفه اتحرك وابي احط لي كوتكس مو قادره اتحرك اخاف الماي ينزل على البيبي ويخلص وابوهم للحين ما وصل وادور التلفون ما ادري وين فلته ، شليت شلايلي ولملمت ثيابي بين فخودي مثل الحصرانه وشفت التلفون الا هي الساعه 12 اتصل بزوجي وهو يتصل، قلت له الحقني الماي انبط،:096: ، شوي والا هو داخل لي البيت، هذا كله ولولو تزن على ابوها وبسرعه اخذها لحماتي ، وخليت لي كوتكس وركبنا السياره ويانا عمي
وطيرااااااااان على السلمانيه ( زوجي مصر يوديني هناك واني مو راضيه ) ، طول الطريق واني اذكر اذكارنا واصلي على النبي ويا مسهل ويا ميسر وبصوت خفي كأني اساسر روحي :091:وشربت من ماي مقري عليه ( قرت عليه امي الله يخليها ) ، زوجي من سرعته حسيت ان احنا نطير وكل شوي اقول له خفف .
وصلنا على 12:10 ونزل عمي جاب لي الكرسي،وزوجي ساندني ودخلوني طواريء الولاده، استلمتني هنديه، سيده قلت لها my water is broke ، ودتني على السرير في غرف التخطيط وهي تاخذ بياناتي من طرف خشمها،:098: وفحصتني ، سالتها جم قالت around 5 and some قلت في خاطري كل هالألم و5 رحت فيها للولاده :048:، وعطتني لباس الولاده وجيس اخلي فيه ثيابي عشان تعطيهم زوجي وكل هذا من طرف خشمها واني الألم ذابحني ، والسرير الثاني وحده قاعده تطل عليي :039:
خلوني على السرير بودوني غرفة الولاده في الطابق الثالث، وحده تسال الثنيه وينش تاخرتين، ردت اقرا في كتاب في غرفة الكوفي ، شنو هالكتاب قالت عن الدفان والموت واشلون كل واحد يكون مستعد ( تتكلم عن الموت على راسي واني ذابحني الألم ) :039:وطول الطريق وهي تقول دخلي ايدش ( غطوني عدل وبعدين اتكلموا ) :031:واني اتنفس عشان اخفف الألم .
وصلنا طابق الولاده وهم يسالون اي غرفه ؟؟!! ما يدرون اي غرفه لازم اروح :057:، المهم وصلنا غرفة الولاده وقلت لهم ان الماي انبط خلوا تبع قياس الضغط على ايدي واللي هناك بس باعدت بين فخودي الا هي تناديهم it’s coming والتموا ودخلت ايدها وتقول لي بوش ودفعت مرتين وطلع الراس وبعد عشان يطلع الجسم بعد ما طلعت ايوته على الساعه 12:35، وأخذوها ينظفونها على جهاز في نفس الغرفه واني احمدلله واصلي على النبي راح كل الألم :092:
وحده منهم قالت لي بضربش ابر في فخدش قريب الركبه ، عطتني اياها وقلت لها ايدش ثقيله ، ردت علي مو ايدي ثقيله، المكان لأنه حساس وردت عطتني ابره في ذراعي مرتين شالتها ودخلتها ، بس امانه كانت اخف من الفخذ ، وقعدوا يحوسون في البطن ينظفونه بس كان يألم شوي،الا تنادي الثانيه ، see ردت Excellent :02: فسالتها اذا بحتاج غرز فردت علي لا ما تحتاجين J وشفتهم ياخذون عينات من المشيمه والحبل السري ( كان لون الحبل رصاصي فاتح ) وبعدين جوا عشان يودوني غرفة الاستراحه ، الا تقول لي وحده منهم، ما خلوا لش سيلان ولا دروبس، جايه متاخره ؟؟!!
قلت لها لا بس نزل علي الماي في البيت وما انتبهت لسؤالها الا بعدين ، يعني ولدت بدون مخفف الم او مخدر، وللحين ظهري يألمني ، ودوني الاستراحه وجه زوجي وعمي وظلوا وياي لي ما ودوني الغرفه الخاصه على الساعه 3 وشي الصبح راحوا عني وظليت صاحيه ، مو قادره انام ، مثل الشي كاتم على صدري :010:ولا قادره انقلب يمين او يسار ، فكرت ادخل عروس من التلفون ابشرهم ، بس الارسال عدم
وهذي صورة أياتوه حياتوه ( احلى آية )
صلوا على النبي محمد وآله الطيبين الطاهرين
