قصتي كامله(استقبالي لنيوفي)

السلام عليكم ورحمة الله وبركاته
مساء الخير /صباح الخير
كيفكن حبيباتي
تكمله لموضوع تبشيركم بولادتي قلت إذا فضيت راح أكتب لكن عن تجهيزاتي لولادتي وعن قصة ولادتي (بنيوفي) وتجهيزات بعد النفاس والمشكلات اللي واجهتها وحلولها:
أولاً:تجهيزاتي قبل الولاده:
طبعا أنا ماجهزت إلا نهاية الثامن أكيد بتقولوا إني تأخرت أقولكم ليش لأن شغالتي كانت على وشك سفر قلت خل افتك منها:011: لأنها غاثتني وبعدين أفضى لنفسي
تجهيزاتي لنفسي /ولدي/بنتي/:
1/ولدي:
طبعا اشتريت له كل شي من القبعه إلى الجزمه (الله يكرمكن)علشان مااحتاج شي أثناء نفاسي لأني مايعجبني ذوق غيري
المشاكل اللي واجهتني بملابسه:
*إني لما اشتريت البجامات اخترت اللي مقاسها من0-3 والمفروض إني اشتريت اللي مقاسها (زيرو)مع إن وزنه ثلاثه ونصف
*وإني ماكثرت اللفات والقبعات والمفروض إني كثرت لأني ولدت في البرد:090:
*نسيت اشتري جهاز لاسلكي للبيبي وقت نومه علشان أسمعه
2/بنتي:
اشتريت ملابسها كلها ربيعي وشتوي طبعا ماخليتها تحتاج حتى بعد ماطلعت الأربعين (كأني داخله على معركه )ههههههههه
طبعا ماواجهتني بملابسها أي مشكله
3/تجهيزاتي لنفسي:
اشتريت القمصان وملابس شتويه والملابس الداخليه رخيصه علشان أرميها بعد النفاس أما ملابس الإستقبال شريت جلابيات غاليه وأغراض النظافه الشخصيه من الصيدليه
المشكله اللي واجهتني:
إني ماكثرت سنتيانات الرضاعه
4/الأدويه الشعبيه:
طبعا أنا سويتها لأن أمي كانت تعبانه وماكنت أعرف أحد ثقه يبيع الدواء اشتريتها وطحنتها في البيت :وهي الدواء اللي يوضع مع الأكل وآخذه مقاديره من أختي الكبيره_الشاي أنا استخدمت ثلاث أنواع:
الأول:شاي حلبه طبعا علشان إدرار الحليب وعلشان آلام الظهر بالعشرين الأولى
اثاني؛: شاي أعشاب أنا مخلطته شربته بعد العشرين الأولى وكله أدويه مفيده وماتأثر
الثالث:شاي أعشاب في آخر عشر أيام
الكبوطبعا خلطت كبو الهوا وكبو الشمم مع بعض/الغسول/ العنزروت أمي مسويته من قبل/والتحاميل استخدمت البوثيل من الصيدليه بس تجنن
طبعا فيه تجهيزات ثانيه مثل تمر الخلاص/السمن/العسل/اللحم /المناديل/ماء صحه/مناديل حمام/روب حمام/شريط لسورة البقره/كتاب أذكار الولاده ممكن فيه حاجات نسيتها طبعا كل التجهيزات موديتها عند أهلي قبل الولاده

ثانياً: قصة ولادتي:
طبعا أن كنت فاتحه ملف متابعة حملي بمستوصف خاص وكانت دكتورتي حاسبه ولادتي على يوم عيد الأضحى وكنت ناويه أولد بالمستشفى العسكري وفاتحه عندهم ملف وحاسبين ولادتي على الدوره بتاريخ 29/11وكان الجنين رأسه فوق وطوف موعدي عند العسكري وأنا خايفه أروح لهم ويسوا لي عمليه وكل شوي ناطه عند دكتورتي أشوف تعدل وضعه وإلا لا وكل مره أحبط بأنه ماتعدل وآخر مره رحت لها كان عصرتاريخ 6/12قالت لي: شوفي أنا حسابي وأنا متأكده منه إنك راح تولدي يوم العيد بس ولادتك ماهي عندي عندهم وراح يعتبرونك مطوفه نصيحه مني روحي لهم قبل إجازتهم وماراح تلاقي الدكاتره الكويسين بتلاقيهم بإجازه
أنتي روحي لهم وأنت تحت رحمة الله مو رحمتهم
وطلعت منها وأنا مصممه أروح لهم لكني يوم ركبت السياره قعدت أصيح:'( وبعد حوار طويل مع زوجي:06: حتى يعرف ليش أبكي قلت له:أنا راح أولد بعمليه يعني يمكن أموت بس ترى بنتي أمانه برقبتك لاتسوي
شي يكدرها وأهم شي لاتوديها لزوجة أبوك الجنيه (وحده خايفه من الموت تقول هالكلام) ههههههههههههه :094:وقعد يطمني أبو الشباب واشترالي عصير ليمون فريش علشان أهدأ رجعت للبيت وواضح بعيوني البكاء
وقعدوا أهلي يسألوني عن اللي يبكيني قالوا: أكيد ماتعدل البيبي قلت وأنا أقوي نفسي :إلا تعدل قالوا: أجل ليش تبكين؟ قلت:من الفرحه عدا الموقف على خير وراحوا بعد العشاء لعزيمه عند أنسابنا قلت فرصه
واتكلت على الله ورحت للمستشفى بعدماطلعوا ووصيت أختي على بنتي
ورحت جتني دكتوره في الطوارىء قالت:أنتي مخيره تبغي عمليه وإلا طبيعي وراح نحط لك إبرة الظهر قلت: أبغي الطبيعي قالت: بس راح أفحصك أشوف كم فاتح وفحصت أختنا في الله وصار فاتح1سم قالت: أنا ماأقدر أدخلك حتى يفتح 3 قلت:ماعندي مانع وفتحت إلى 3وطلعوني لقسم قبل الولاده الساعه تسع ونمت هذيك الليله وأنا ندمانه إني سلمتهم راسي:042:
من بكره الصبح جاني الدكتور :وقالي إنتي على راحتك إذا تبغي الطبيعي
وإلا العمليه قلت : أبي طبيعي قالي :أمشي حتى تحسي بآلام الولاده حتى لو على 4لأن وضعك غيرنادي النيرسات يسوو لك تخطيط وينقلوك لقسم الولاده قعدت أمشي مشي قوي من الصبح إلى العصر مايفصلني إلا الصلوات والوجبات
وبعد صلاة العصر بديت أحس بآلام خفيفه ورحت الحمام الله يعزكم وشفت قطعة دم وأنادي النيرس وأقولها قالت: هذا عادي جاني زوجي زياره وبدت الآلام تزيد بس موعلى كلام الدكتور وبعد العشاء لما مشى زوجي صليت وتعشيت ورحت أمشي
إلى الساعه عشر وأنا أحس الآلام تتزايد وأنادي نيرس ثاني وأقولها قالت:توك طلعت في الممر أدور ممرضه طيبه كان هذا وقت مناوبتها لكني مالقيتها قلت:يمكن خيره وأرجع لغرفتي وكأن الالم خف قلت: خلوا أنام :010:ونمت ساعه وتبدأ معي آلام الساعه11 كل خمس دقايق
قلت :شكل نيوفي قرب وأنادي نيرس حسبي الله عليها وماكلفت نفسها تشوفني وبعده بساعه ونصف يعني 12:30أنادي نيرس ثانيه وألقى نفس الأسلوب قلت:ياأم نايف واجهي مصيرك واحتسبي
واحتسبت الآلام اللي أنا أحسها عند الله 3ساعات ونص:058: يابنات وأنا أشوف الموت بعيوني يوم جت الساعه4:10
فجرالأربعاء8/12 طلعت الممر وأنا أدور أحد يرحمني وجت الممرضه الطيبه اللي أقولكم عنها ورحمت حالي وسوت لي تخطيط ونادت الممرضه اللي جتني 12:30حضرتها طلعت قابله
وكشفت وقالت فاتح خمسه وهي تكذب وينقلوني لقسم الولاده الساعه4:20 وأنا بين الحياه والموت وألقى قابله مسلمه ماهي عربيه الله يجزاها الجنه وصارت تهتم فيني وتخفف عني وتذكرني بفضل الصبر ثم جاني دكتور وكشف قالي فاتح 8 قلت :تحطوا لي ابره قالي : خلاص ماتصلح البيبي مقرب بس احتسبي الآلام عند الله
وتجمع عندي طاقم تقريباًعددهم 7 دكتورين ودكتورتين وقابله وممرضتين وكانت أصعب لحظات مرت علي وكنت طول وقت الولاده ماعلى لساني إلا دعاء يونس وطلع جسمه وبقى الراس وطلع بعد ماتأخر دقيقتين طلع أحلى طفل بالدنيا الساعه6:clock:إلاإنهم خوفوني عليه إن نقص عليه الأكسجين وراح يحطوه بالحضانه وكل من دخل علي أسأله قالوا : لسى بيجيه استشاري الأطفال وهو اللي يقرر وجتني الدكتوره اللي ولدتني وخوفتني شوي وبالأخير بشرتني وقالت:إن الدكتور شافه ماقرر عليه جهاز التنفس يعني وضعه مو خطير وحمدت الله جتني دكتوره سعوديه خيطتني صراحه خياطتها خطيره :092:الله يجزاها الجنه وبعده نقلوني لقسم التنويم وقعدت يوم ونص وطلعوني وخلو عندهم وكنت اروح لولدي أنا وزوجي ويبشرونا عن حالته إلا إنهم مايقدروا يطلعوا حتى يشوفه الإستشاري يوم السبت
يوم جاء السبت جاه الدكتور وبقاه لأنه صابه الصفار وتركوه عندهم حتى يوم الإثنين13/12وطلعوه بعد ماتطمنوا عليه وطمنونا عليه ومرت الأربعين وكنت مهتم بحالي مره من أكل وخلطات وزيوت والسوق:064: رحت له بعد 20 يوم رحت مرتين وكفوني لأني كنت مشتريه العطورات وأدوات التجميل وملابس النوم قبل الولاده وبعد شهر طهرت ولدي وشفي بعد عشر أيام وآخر وقبل لأطلع بأربع أيام رحت المشغل وقصيت( كريه مدرج) وسويت تنظيف من بكره حجزت كوافير فلبينيه وسوت كل الشغل الباقي إلا الحمام المغربي والنقش والحلاوه جبت سودانيه من بكره بس شغلها خطير واليوم اللي طلعت فيه أخذنا فندق:086: ولبست فستان أحمر وتزينت زينه دوخت:worn_out: زوجي وخليت عيالي عند أهلي
طبعا طلعت بخسائر 5%فقط وراح استمر على الخلطات حتى أطلع بانتصار100%:046:
الأمراض اللي واجهتني وعلاجها :
1/ورم صدري لما كان ولدي بالمستشفى ونصحتني أمي إني أحط سدر بماء دافيه وأغسل فيه ثم أمسج صدري بمشط
2/حبوب واحمرار بمنطقة الحفاظ عند ولدي وعالجته هويت المنطقه وحطيت بودره كل يوم حتى جفت الحبوب ثم فازلين حتى شفي تماما
3/بنتي صابها احمرار بنفس المنطقه وخلطت لها فازلين ونشا ومن أول استخدام اختفى
4/صابني ألم في المعده وعالجته بمشروب قشرالرمان وهو زين يشيل الكرش
5/ولدي صابته اكزيما بوجهه ووصف لنا الدكتور مرهم وصرت أستخدم له سيبا ميد والحمدلله خفت
هذي تجهيزاتي بإختصارمن تعب الحمل وسماره إلى أن صرت أحلى عروسه :015:بشهادة زوجي يقولي أنتي رجعت بنت وطبعا أنا أحس بنفس الشي
ماأوصيكن وصية أخت إنك ترددن:حسبي الله لاإله هوعليه توكلت وهو رب العرش العظيم 7مرات في الصباح والمساء
وفي الأخير أقول صدق إنا مسكينات نتعذب بالولاده وإذا طلعنا نفكر بالزينه:074:
آسفه ع الإطاله