حبيت اليوم أعيد إدراج موضوعي لصينية التونة اللي نزلتها بمجلة عروس للأخوات اللي ما شافوها...
و إن شاء الله تنال إعجابكم...
نبدأ بسم الله...
لصينية تكفي 6 - 8 أشخاص، بنحتاج:
كوبين رز مطبوخ، أنا سلقت الرز بكركم للحصول على اللون الأصفر، و ممكن إستخدام الماجي
كمية من صلصة باشاميل، طريقتكم المعتمدة
كمية من جبن التشيدر المبشور و الموزاريلا
بقسماط
لحشوة التونة بنحتاج:
بصلة متوسطة، مفرومة
فصين ثوم مفرومين
علبتين تونة، حجم وسط، نصفيها من الزيت
كمية من الخضار مقطعة قطع صغيرة (فلفل حلو - جزر - زهرة - فاصوليا خضراء - بازلاء - ذرة - ملفوف) ممكن تضيفون بقدونس - بصل أخضر، أو أي نوع خضار تحبون
ملح - فلفل أسود - كركم
بهارات مشكلة
نشوح البصل و الثوم في شوية زيت، بعدين نضيف لهم التونة و نفتتها بالملعقة...
نضيف الحين البهارات و الخضار، ما عدا الذرة، البازلاء، الملفوف، البقدونس في حال استخدامهم، نضيفهم بالأخير لأنهم يستوون بسرعة...
نقلب الخضار مع بعض، بعدين نضيف لهم شوي ماء، مو كثير، و نغطي القدر و نخفف الحرارة و نترك الخضار تستوي...
الحين نرص نصف مقدار الرز في صينية بايركس مدهونة، و لسهولة توزيع الرز، نبلل الملعقة بالماء عشان ما يلصق فيها...
بعدين نوزع نصف كمية الباشاميل فوق الرز، و نرش فوقه شوي من جبن التشيدر و الموزاريللا...
الحين نوزع فوقه مقدار حشوة التونة كلها...
آخر شي، نرص باقي مقدار الرز و فوقه باقي كمية الباشاميل... و نرش الوجه بشوي جبن تشيدر و موزاريلا و بقسماط...
ندخل الصينية الفرن على حرارة 350، لمدة نصف ساعة أو حتى يتحمر الوجه...
و هذا شكلها بعد ما طلعناها...
نتركها 10 دقايق عشان تتماسك بعدين نقطعها و نقدمها...
ما في داعي أقولكم شقد لذيذة... انتوا جربوها بأنفسكم و احكموا :083:
ممكن تسوونها بالدجاج بدال التونة، يعني تسلقون دجاجة و تفتتونها و تحطونها في الحشوة، و تسلقون الرز بمرقة الدجاج... و بكذا تصير النكهة ألذ...
إن شاء الله عجبتكم و عليكم بألف عافية :083: