النهاردة جبتلكم يا بنات فرخة محشية في الكيس الحراري بس بطريقة سوسي المختلفة :037: هي مش مختلفة كتير بس انا حبيت اغير في طعمها فقلت اعملها بالكاري وطلعت الحمدلله جميلة جدا جدا وأدي الطريقة خطوة بخطوة ::
اول حاجة نقعت الحمص قبلها بيوم
وتبلت الفرخة من قبلها بيوم برده وحطيتها في الثلاجة واستخدمت في التتبيلة الاتي : ( مية بصل + ملح + فلفل اسود ناعم + فلفل اسود صحيح + مستردة + كاري + كركم )
تاني يوم سلقت الحمص في مية بملح
وطلعت الفرخة من الثلاجة وكانت شكلها كدة وهي في التتبيلة
وبعدين بدأت اعمل الرز اللي هاحشي بيه الفرخة : اول حاجة حطيت سمنة علي النار وشوحت فيها بصلة مفرومة
وبعدين حطيت عليها ملح وفلفل ونص ملعقة صغيرة كاري وبعدين الحمص المسلوق وقلبت كويس
وبعد كدة حطيت الرز المغسول ومقدار المية بتاعي وعليه نص معلقة صغيرة كركم وشوية شطة صغننين خالص
وطبعا غطيته لغاية ما اتشرب وطيت عليه ودة شكله بعد ما استوي
(علي فكرة يا بنات دي طريقتي في الرز بالكاري بس باحط قطع فراخ مقطعة صغير في الاول علي البصلة مع الملح والفلفل)
ولما برد الرز شوية حشيت بيه الفرخة وقفلتها كويس بالخلة
وقطعت بطاطس مكعبات كبيرة وحطيتها في التتبيلة الباقية من الفرخة ومعاها شوية من الحمص المسلوق لمدة دقيقة بس وشيلتها بس عشان يبقي ليها طعم
ودي بقي كانت احلي من الفرخة كمان:ok:
وبعدين حطيتهم مع الفرخة في الكيس الحراري ورشيت علي الفرخة قبلها رشة زيت خفيفة عشان ماتبقاش ناشفة وقفلت الكيس ودخلته الفرن
ودة شكلها لما طلعت من الفرن :093::093:
اتفضلوا معانا :072:
يارب الموضوع يكون عجبكوا لإني فعلا تعبت فيه اوي وتجربوه وتقولولي الاخبااااااااار
وفي انتظار آرائكم وتقييماتكوا يا قمرات :08:
الي اللقاء :087: