مشكلتي اللي ملهاش حل

السلام عليكم ورحمه الله وبركاته
انا حبيت الركن ده اوي وجيت افضفض معاكو شويه يمكن ارتاح شويه او يمكن حد يدعيلي من قلبه وربنا يستجيب الدعاء
مشكلتي تعتبر مشكله بنات كتير اوي بس انا مشكلتي اكبرشويه هي المشكله اني قربت خلاص اكمل 26 سنه ولسه متجوزتش هو طبعا نصيب ونصيبي لسه مجاش بس المشكله في السحر حاولت كتير مع مشايخ ومفيش فايده وانا اعرف اللي بتعملي السحر ووالله ما ضريتها في حاجه بس مجرد انها بتحبش امي وبتغير مني علشان بناتها فاشلين في التعليم ومش جمال يعني ودايما تحلف انها عمرها ما تسيبني اتجوز طول ما هي عايشه وهي معروف اوي انها هوايتها تعمل اسحار للناس وتاذيهم كده مش عارفه ليه
بس بجد انا تعبت متتخيلوش الناس اللي بتتقدم اد ايه ومفيش حد بيرجع البيت تاني يمكن كل اسبوع عريس واللي ييجي مره مش بيرجع تاني مع انه بيكون هيموت ويدخل البيت اصلا
انا بصلي وبدعي ربنا كتير بس تعبانه اوي بجد معنديش اصحاب ولا اقرب في سني واخواتي كبار ومتجوزين وانا لوحدي مفيش حد اتكلم معاه ولا حد يسمعني ولا حد انا مهمه عنده ولا حد بيسال عليا وخلصت دراسه وقاعده في البيت ممنوع اشتغل بجد الوحده قتلتني نفسي افرح زي اي بنت انا بقيت مرعوبه من بكره كل يوم بيعدي وانا حياتي زي ما هي بخاف وبشوف نفسي من دلوقتي وانا كبيره ولوحدي واخواتي في بيوتهم وحياتهم وانا لوحدي مليش حد والله تعبانه اوي غصب عني تعبانه انا عارفه ان ده نصيبي واللي ربنا كاتبه هشوفه وان بايده سبحانه وتعالي اني اتجوز رغم السحر ده بس مش عارفه مزعلش نفسيتي بجد دمرتني شعري وقع ووشي تعب ومش باكل ولا بشرب وخلاص شويه وهتمني اموت يمكن ارتاح من العذاب
عارفه انها مشكله ملهاش حل بس حبيت اتكلم واطلب منكو تدعولي
انا حبيت المنتدي اوي مع اني لسه جديده بس شفت مواضيع كتير وشفت البنات بتساعد بعض اوي وبتدعي من قلوبها لاي حد محتاج دعاء فقلت يمكن تفتكروني بالدعاء علشان انا محتاجاه اوي