هيدا اول موضوع الي بركن المطبخ وبهديه لرفقاتي بالشات السوري اللي شجعوني نزله :025:
وحبيت قدم لكم كب كيك بعدة اشكال
الحلو بالكب كيك انه سهل وبنفس الوقت شكله كتير حلو بالتقديم وممكن تبدعي فيه
نبتدي بالمقادير
2 بيض
1 كوب سكر
1 كوب طحين
1/2 كوب زيت
1 علبة زبادي صغيرة
1 ملعقة صغيرة بيكنج باودر
1 ملعقة صغيرة فانيل باودر
طبعا هي المقادير الاساسية وانت بتضيفي اللي بتحبي عليها يعني مثلا برش ليمون
او كاكاو او نسكافيه او جوز ...الخ حسب الرغبة
المهم
انا عملت 3 انواع من الكب كيك منها
كب كيك الباونتي .. كب كيك النسكافيه .. كب كيك الجزر والجوز
بنبتدي بكب كيك الباونتي
طبعا بنضيف للخلطة السابقة كاكاو انا بحط 2 ملاعق طعام كاكاو واحيانا بزود شوي
بعد ما بتخلطي الخلطة بتجهزي قوالب الكب كيك وبتحطي بقلبها ورق البليسيه تبعت الكيك
بكل قالب صغير بتحطي 3 ارباعه خليط الكيك المهم ما بدك يكون مليان
واخبزيه بالفرن لحد الاستواء وبعدها طلعي الكب كيك وبس تخف حرارته
جهزي على جنب خلطة الباونتي وهي عبارة عن
1 كوب حليب سائل
3 ملعقة طعام سميد
ثلث كوب زبدة
كوب ونصف جوز الهند
كوب ونص سكر
نخلط المقادير السابقة ونحطها على النار حتى تتماسك و فورا بنحطها على الكيك وهي ساخنة وهي رح تكون الطبقة الاولى
بس تبرد بنرجع بنعمل خلطة تانية واللي رح تكون التغطية تبعتها
قشطة نستلة + سكر + كاكاو بكمية منيحة ليختلطوا سوا وتكون الشوكولا ظاهرة جداااا
وبعدين بنحطها على خلطة جوز الهند وبنتركها تبرد ممكن نزينها بجوز الهند وبالعافية
وبالصورة واضحة الطبقات
كب كيك النسكافيه
نفس مقادير الكيك من دون اضافة ومتل الطريقة السابقة بوضع الخليط بالقوالب بورق البليسيه
بندخلهم الفرن واول ما نطلعهم من الفرن بعد الاستواء بنسقيهم بشوية خليط نسكافيه مع ماء وسكر وانا استعملت 3 ان 1 يعني ما ضروري نسكافيه سادة
طبعا شوي ملعقة صغيرة من التسقية لكل كب والهدف تطرية الكيك واعطاءه طعمة قوية
لزينة كب كيك النسكافيه استخدمت كريمة الزبدة او البتر كريم متل ما بيسموها
مقدار الكريما
2 كوب سكر ناعم
3 ملاعق طعام ماء
1 ملعقة فانيل
بنخلطهم منيييح بالخلاط
بعدين بنضيف عليهم كوب زبدة لين لا انه سايح ولا انه متماسك انتبهوا ما بدنا ياه سايح
بيخرب الوصفة لازم يكون لين لانه بدنا تبقى الكريما متماسكة لنقدر نحطها بقمع التزيين نخلطهم كلهم سوا (طبعا هي طريقة كريما الزبدة وبعدها لوحبيتي تستخدميها باي وصفة ضيفي عليها النكهة او اللون اللي بتحبيه)
انا ضفت عليها ظرف نسكافيه 3 ان 1 لتعطيني نكهة نسكافيه خفيفة وطيبة
هيك شكل الكريما بعد ما جهزت
بنحطها بكيس التزين وبنزين فيها وجه كب كيك النسكافيه
وانا زينتها بالفارمسيل (حبوب الشوكولا)
ختامها مسك مع كب كيك الجزر والجوز بصراحة طعمه طيب وظريف وغريب
الجزر معروف انه يستخدم بالحلويات متل الجزرية بسوريا لانه طعمه بالاصل حلو
المهم نفس مقادير الكيك السابقة بس ضفت عليها برش جزرة + جوز + قرفة
والجوز والقرفة حسب الرغبة انا حطيت قرفة ملعقة طعام والجوز كترته لاني بحبه
وهي صورته قبل ما يدخل الفرن ( مع كيك النسكافيه )
وهي صورتهم لما طلعوا من الفرن
وهي صورة كب كيك الجزر بعد التزين
وزينته بقشطة نستله + شوية سكر للتحلية
ممكن تزينيه بكريما +جبن فلاديلفيا + سكر
بس انا ما كان عندي وقت وحسيت القشطة اخف
صورة جماعية
وهي صورة من عزيمة كانت عندي من فترة عملت كب كيك بالشوكولا وزينته بكريما الزبدة
بعد ما ضفت عليها كاكاو وعملت كب كيك سادة زينته بالسكر البودرة والفارمسيل
( الحلو اللي بالمكسرات جاهز )
ويارب يكون عجبكم :087: