فرحتي وحزني على وفاة الغالي ولدي

بقلوب ملئها الحزن اكتب اليكم قصة ولادتي وعذابي وفرحتي اللي ما تمت 00
سنة 2007 طرحت بتوائم
سنة 2008 توفى ولدي الغالي في بطني نهاية الشهر الثامن فجاه من بعد ما كان كل شيئ سليم وكتبت اليكم السنه اللي طافت قصتي
وسنة 2009 فقدت حبيب قلبي حمودي (توفى وهو عمره قريب الشهرين)
في البداية اني في كل حملي من البداية الى النهاية ترجيع ورقدوني لان صادني جفاف واجد
مثل ما تعرفون من بعد اللي صادني في حملي الاول والثاني صادني خوف مو طبيعي على حملي الثالث 00كنت اذا بمشي بمشي بطيئ اخاف البيبي يطيح ولا اطلع واذا بطلع قليل للضروره وكل شيئ منعته على روحي واكل كله اشياء مفيده ودوم اقرا ايات وادعيه على بطني والصلاة على النبي 1000مره كل يوم 00وكنت كل موعد اروحه ولاموعد طوفته وكل مره يسون ليي سونار حتى اتطمن على اليبي ويقولون ليي البيبي زين بس بعد ما اتطمن كله خايفه اقول ما بتطمن الا اذا شفته وعدت الاشهر على خير 000
عطوني تاريخ 29/9/2009 موعد الولاده
لما دخلت التاسع كنت احسب من ادخل التاسع بولد وكنت كل يوم اقول اللي عقبه يمكن اولد ولما وصلت الى نص التاسع قالت ليي الدكتوره بتولدني بطلق صناعي لكن امي وزوجي رفضو و احنا كنا في شهر رمضان يعني صايمه وتعبانه وخايفه على البيبي يعني اي شيئ يقولونه ليي موافقه عليه اهم شيئ سلامته لكن امي اصرت وقالت ليي لا توافقين اذا الله كتب اليه بالخروج بيطلع في وقته 00ولا وافقنا 00بعدها قالت ليي الدكتوره على راحتش دام البيبي بخير لكن اذا ما ولدتين في التاريخ اللي حددناه بنحط اليش طلق صناعي قلت اوكي على امل ان اني اولد قبل 00
الدكتوره من دخلت التاسع عطتني ورقه حتى اروح المستشفى تخطيط لقلب البيبي في الاسبوع مرتين وكان كل شيئ تمام 00
المهم جا تاريخ 29 ولا في اي بوادر للولاده ولا ولدت لكن بعد ما وافقت على طلق صناعي بعدها جا تاريخ 30 ودخلنا شهر 10 ولا ولدت
وفي تاريخ 4/10 رحت الى تخطيط قالو ليي نبض البيبي تمام لكن تاخرتين واجد ولازم ترقدين لطلق صناعي لكني خفت ورفضت بعدها قالو ليي وقعي على مسؤليتش اي شيئ يصير في البيبي انتين المسئوله خفت قلت اليهم خلاص برقد لكن موموافقه على طلق صناعي بس تتابعون ليي حالة البيبي قالو اوكي ورقدت 00
جا تاريخ 5 من الصبح وجو الدكاتره قالو ليي (ويش تحارسين خلاص طفتين موعدش ولازم طلق صناعي ):thumbs_down:
قلت يالله اتوكل على الله وافق على طلق صناعي يكفيني خسرت اللي قبل وهذا تعبانه عليه وفرحانه فيه ما ابغي اخسره واللي بصيدني خله يصيدني وحطو ليي تحميله بعد صلاة الظهر يااااااااااربي صدق تالم والحمدلله جاني الطلق ونزل عليي دم قلت الحمدلله هانت وما بحتاج لتحميله ثانيه بس قلت ما بقول اليهم حتى لا ياذوني من كثر الفحص
ولما جا اليوم الثاني الصبح جت الدكتوره وخفت انها تحط ليي تحميله ثانيه قلت اليها ان فيني طلق وقاست طلع بس 2سم وحطو عليي جهاز النبض والطلق يتابعون البيبي وفرحت قلت يالله ان شاء الله بعد ساعات اشوف ولدي حبيبي وانسى كل الالام فجاه ما شفتهم الا هم جايين ونادو زوجي واني اسمعهم يقولون عمليه تفاجئت ومت من الصياح:'(:'( وصار جسمي كله يرتعش من الخوف عليه بعدها حاولو يهدئوني وقالو ليي ان البيبي زين بس قاعده تقل نبضاته وايا الطلق قلت اوكي يالله بسرعه عمليه ودوني انقذو البيبي ودوني العمليات واني ميته من الخوف والصياح وكل اللي هناك يحاولون يهدئوني ويمسحون على راسي ويدعون ليي 00
المهم واخيرا ولدت الساعه 12 الا تاريخ 6/10 وايا اذان الظهر وسمعت صوت اغلى الناس (حمودي)وشفته وحطوه على صدري كان احلى شعور وكنت ميته من الفرح لان الحمدلله طلع سليم وجميل مثل ما اتمنى وقلت الحمدلله ان الله عوضني00
بعد فتره طلعوني حطوني في غرفة حتى ارتاح لكن البنج راح وبدت الالام وكل جسمي ينتفض بقوه صرت اصرخ من الالم ما شفتهم الا متجمعين عليي وفي وحده منهم ضغطت بقوه على بطني واني اتالم قالت ليي سامحيني ادري يالمش بس لازم اسوي جذي حتى ترتاحين قلت اليهم شصاير بعد ؟ قالو نزيف قطع واجد قاعده تنزل هذا غير ان اني مريضه من قبل العمليه فيني زكام وكحه وكل ما تجيني الكحه يالمني الجرح اكثر وكل اللي جابوهم بعدي راحو ما ضليت الا اني مع انهم عطوني مهدئ بس بعدي اتالم بعدها قلت اليهم ابي اشوف اهلي وزوجي وجت ليي امي وزوجي وشافو حمود وفرحانين فيه وبعد فتره ودوني الجناح وجو ليي اهلي وراحو لما راحو صرت اتالم من العمليه الم مو طبيعي ما اقدر حتى احرك نفسي ولما شالو القسطره حتى اروح الحمام مت من كثر الالم لكني رحت الحمام بعدمعاناه مع النرس وفي اليوم الثاني زاد الالم مسكين حبيبي حمودي يصيح ولا اقدر حتى ازحزح روحي من الالم حتى اقوم اليه :'(وجو الدكاتره ليي صادني (ضيقه وغازات ونبضات قلبي ارتفعت وضغطي ارتفع ) قلت شكلي بموت عن اول فرحه ليي والدكاتره تحيرو فيني ما عرفو ليي ومنعو عني الاكل والشرب وامي اخذت ولدي لاني ما اقدر اقوم اليه والدكاتره قالو اذا ما تحسنت حالتي بنقلوني بالاسعاف الى مستشفى السلمانيه وظليت كم يوم وهم يتابعون حالتي والتنفس ولا ارضع البيبي وكل وحده تجي ليي بعدها في اليوم الخامس تمللت وطلبت رخصه على مسؤليتي قلت اهم شيئ حمودي بخير مومهم اني وطلعت ورحت البيت ولما صار ليي 18 يوم تقريبا اخويي قال يبي حجرتي اللي اني فيها وطردني منها وطلعت واني اصييح بعدها بيوم مرض ولدي ارتفعت حرارته ووديته المستشفى ومن ذاك اليوم بدت رحلة عذاااابي قالو فيه مكروب في الدم وبروح بالمضاد00 قضضو يده من السيلان حطو عليه المضاد 10 ايام وصار زين ورخصوه وكنت دوم احلم ان احد يبي يقتله ويضربه وبعد كم يوم لاحضنا ان رجوله ما يقدر يمدها مثل قبل ولما نبدله تالمه رجوله قمنا خذناه الطوارئ قالو ما فيه شيئ قمت وديته لاستشاري عضام قال يمكن فج او يمكن اوساخ ويسونه عمليه بسيطه وبصير زين 00
لكنهم مو عارفين اليه حتى الدكتوره تقول ليي ان هم مو عارفين اليه ويعالجونه علاج عشوائي مثل العميان ويبون ياخذون ماي من ظهره حتى يعرفون يعالجونه على قولتهم بس احنا رفضنا 000

واني حالتي حاله انام واياه على الارض لان ما في سرير للام ولاحتى مرقد ولا حتى شرشف قحط عندهم لكن حصلنا شرشف يوم ثاني وجبنا مرقد من البيت لاني عمليه وما اقدر انام على الارض بس مستحمله عشان الغالي000
وهم من يقولون ليي شيئ ما استحمل واصيييح مو عارفه شسوي اليه كل اللي اقدر عليه هو ان اني ادعي اليه يقوم ليي بالسلامه وافرح فيه والمسكين من يجون اليه الدكاتره يطالعني ويصيح بعدها بكم يوم زادت حالته وصاده تشنج وحطو عليه جهاز التنفس وضربوه ابره حتى لا يتشنج وودوه العناية المركزه بعدها حسيت ان الغالي يودعني وبروح مني ااااااااااااااااه صدق اصعب ايامي عشتها واني اشوف الغالي يتعذب وموقادره اسوي اليه شيئ000
وظل في العنايه المركزه يوم ويوم ثاني توفى حبيب قلبي رااااااااح واخذ قلبي وعقلي كله واياه ما انساه ولا انسى حركاته ورضاعته وحبه ليي ما يبي الا حظني :'(:'(:'(وبعدما توفى اخذته وحببته ولبسته ثياب الطفل الرضيع لاني ناذره اني البسهم اياه بس ما الله كتب ولما لبستهم اياه طلع قمر يجننون عليه وخليته في حظني وقعدت اصييييح عليه من كل قلبي وكل اللي هناك يبوني اهدا بس مو قادره والكل قام يصيح وبعدها وديناه المقبره وجو معظم اهلي وكلهم قعدو يصيحون عليه اما اني حالتي ما تنوصف من كثر الصياح 00ما شاء الله عليه كان جميل حتى الدكاتره والنرسات يحبونه وفي دكتوره جت صورته في تلفونها فيديو00
وذكي ما انساه كل شيئ يذكرني فيه سريره واغراضه والعابه حتى حليبه للحين ما نشف ياااااا الله دعواتكم ليي ان الله يصبرني على فراقه

ادري طولت عليكم بس لان ما عندي خوات ولااحد اشكي اليه همي كتبت اليكم قصتي واني كلي حزن حتى تدعون ليي ولكل محرومه بالذريه الصالحه واللي تدعي ليي عسى الله يعطيها كل اللي في قلبها يااااارب