~.~ كفتة مقلية جديدة ورهيبة و طريقة مكرونة سهله وبمووووت فيها ~.~

السلام عليكم ورحمة الله وبركاته
.ِ..ِ..ِ..ِ..ِ..ِ..ِ..ِ..ِ..ِ..ِ..ِ.


ازيكم يا عروسات ؟ يارب تكونوا بخير

وسنة جديدة وسعيدة علينا جميعاً يارب F:


من حوالي سنتين او تلاته كنت معزومة عند صديقتي ف المنصورة

وأكلت عندها كفتة عجبتني جداااااا على غير العادة :D

لأنى مبحبش الكفتة ابداً خاصة لو ف البيت ومكولهاش الا لو نادراً

وده راجع لخلاف بيني وبين اللحم المفروم غير مفهوووووم :cool:


المهم من يومها عماله ادور يمين وشمال على الوصفة

خاصة انى مكنتش عارفه اوصل لصاحبتي دي والاتصال اتقطع

لحد ما جبتها منها ربنا يكرمها يارب وعملتها وطلعت جميلة جداً

بس غيرت فيها شوية


انا آسفه جداً انى مصورتش المقادير لأنها كانت على موبيل

خطيبي ومسحها ربنا يسامحه :(




الكفتة



المقادير :



- كيلو لحمة قطع ( انا جبتها قطع وشفيتها خالص من الدهون

وبعدين فرمتها بس كانت فكرة غير سديدة بالمرة :D )

ممكن تجيبوها مفرومة بس تكون يفُضل تكون حمراااااااااا


- بطاطساية كبيرة مقطعه مكعبات ومقليه نص قليه


- كوب برغل منقوع من بليل ( الوصفة الاصليه كانت بالفريك )


- كام عود بقدونس وشبت


- بصلايه مفرومة


- 3 فصوص توم


- بهارات وملح وفلفل وانا استخدمت بهارات ماي واي للكفتة

تحففففففففة جداً بس حطيت معلقتين وبس

اكتر من كده هتبقى صعبه اوى وممكن اى خلطة للكفتة جاهزة

انتوا متعودين عليها



الطريقة :


- نفرم كل المكونات ف الكبة

او نفرم كل حاجة على حدة ونخلطهم مع بعض

ميزة الكفتة دي انها بترمي ماشاء الله وبتكون الكمية كبيرة

بس هنا دي ربع الكمية لأني ف اول مرة عملتها ملحقتش اصور

وده اللى كان فايض وكنت مطلعها من الفريزر

علشان كده الوان المكونات مش طازة اوى .. معلش :o









- نصّبع الكفتة و نحاول نخليها رفيعه علشان تستوي بسرعه

ونحطها ف بيض عليه شوية ملح وفلفل









- نحطها ف البقسماط ونحطها شوية ف التلاجه تمسك نفسها

ده لو مطلعينها من الفريزر لأنها هتكون طرية لو طازة مش هتفرق خااااالص







- نقليها ف زيت ساخن غزير على نار هااااادية بس مش شمعه يعني :D

بتاخد حوالي عشر دقايق او اقل







- نطلّعها على ورق مطبخ







- نرّصها ف طبق التقديم







اول مرة عملتها مع مكرونة بالبشاميل وفطاير باللحمة

و حطيتها ف بيتي بان عليها كاتشب كانت تحففففففة

هي بصراحة تتاكل ف عيش اجمل بكتير

والمرة التانية كان يوم سريع عملتها جمب مكرونة محمرة

مشوفتهاش ف المنتدي قبل كده فقولت يمكن متعرفوهاش

هي سهله وبدائية جدا بس لذيذه وبحبها اكتر من المكرونة بالصلصة






المكرونة المحمرة



المقادير :


- كيس مكرونة


- معلقتين او تلاته زيت منكترش لأنها مش بتشربه





الطريقة :



- نحمّص المكرونة ف زيت زي الشعرية او لسان العصفور








- نخلى بالنا متتحرقش لحد ما توصل للون ده او ممكن افتح

حسب ما تحبّوا وخلوا بالكوا لما بتستوي بتغمّق شوية









- اول ما توصل للون اللى عايزينه نحط مية و الملح

ونسويّها زي الرز بالظبببببببط







- هنا بعد ما استوت مبتاخدش وقت طويل حوالي تلت ساعه

وزي ما قولتلكم نعاملها معاملة الرز بالظبط






معلش ملحقتش اصور طبق

نداء الجوع بقى :D



يارب تكون الطرق واضحة وسهله وتكون جديدة عليكم

وتجربوها وتعجبكم إن شاء الله

واعتذر كتير لتقصيري ف التصوير F::)