استفسار

السالفة وما فيها !..

إن هذي تسمى ( سفرة العجم )

وهذي السفرة أساساً فكرتها قادمة من إيران

وفي البحرين تحديداً

هنالك عدد كبير من الجاليات والعوائل الإيرانية إلي عاشت وتربت في البحرين وصارت من أهل هالديرة

ونقلت لنا هالعادة الأساسية عندهم في إيران

وهالعادة قديمة جداً ولا زلت لدى الإيرانين موجودة .. وإلزامي كل عروس إيرانية تسويها ليلة عقد قرانها

لكن!..

سابقاً كانت باهظة الثمن نوعاً ما

حالياً صارت متوفرة لدى الجميع

تآجر , تشترينها .. إلخ

لذلك قام الكل هني في البحرين يسويها

*

وبما إننا تعايشنا مع الإيرانين " العجم " بشكل كبير + صار هنالك تزواج بين البحرينين والعجم

هالسفرة أنتشرت عندنا وصارت معروفة

وأغلب عرايسنا

يسونها في ليلة عقد القران ( الملجة )

هي زينة الملجة !..

+

السفرة .,

لها مكونات أساسية

ولكل عنصر من عناصرها فائدة معينة أو معنى معين

+

العجم يسونها على أصولها ويلتزمون بمكوناتها

بس أحنا البحرينين نسويها كموضة وزينة فقط لا غير , وما نتآثر ولا نلتزم بمكوناتها

والبعض .,

لا يحب يعني يسويها مثل ما إهي وما يحرفها !..

+

تتكون بشكل أساسي من :

( القرآن الكريم , المرايا , الشمعدان , صندوق المهر , حوض السمك أو قفص عصافير , قنود السكر الكبيرة , الفواكهة المزينة والمقطعة , إيناء عسل صغير )

القرآن الكريم يرمز إلى فاتحة خير على العروس .. ويفضل إن العروس تمسك القرآن لحظة عقد القرآن وتقرآ بعض آياته

قنود السكر والعسل .. وهو رمز لجعل الحياة الزوجية سعيدة ولذيذة

وهنالك أيضاً عادة وهي قيام البنات العازبات ( 2 ) بحك قنود السكر ببعضها البعض على رآس العروس أثناء عقد القرآن

حتى يآتي نصيبها بعدها وحدة تحك القند والأخرى تمسك صينية تحت رآس العروس علشان ما تتسخ بالسكر المطحون

وإيناء العسل الصغير ..,

العروسة تذوق عريسها العسل بأصبعها الخنصر والعريس نفس الشي .., :o

الشمعدان , إكسسوار مهم يضفي بعض الرومانسية

والمرايا .. يفضل إنها تكون مقابلة للجهة الثانية

حتى العروس والمعرس يشوفون بعضهم بعض من المرايا .. لأن أكيد بيكونون مستحيين يطالعون بعض وجهاً لوجه

ويقال إن العروس تحتفظ بهذه المرايا .. ولين أنكسرت هالمرايا فإن فالها سيء جداً

طبعاً صندوق المهر ..,

يضع فيه المهر بعد الإنتهاء من عقد القران

حوض السمك أو قفص العصافير

لازم يتكون من ( ذكر & أنثى ) ويوضعون الدبل في القفص أو الحوض ..

والبعض يخلي زوجين حمام

وبعد تلبيس الدبلة يطيرون الحمام << يا عيني عالرومانسيات

+

والأشياءات الثانوية : الزينة مثل التحف والشموع والورد .. التوزيعات وهدايا المعازيم وتختلف وتتنوع كلاً حسب ذوقه

المباخر والدخون (البخور) + مرشات ماي الورد + البيض الملون & الجوز المصبوغ

وأيضاً !..

مهم وجود طشت ( إيناء ) مليان بماي الورد البارد " يفضل بارد " + الورد المجفف

العروس توضع فيه قدميها لدى عقد الشيخ القران

وماي الورد يفضل تحتفظ فيه

علشان تستحم فيه ليلة الدخلة أو ترش فيه فراش الزوجية :)

+

وبسسسسس!..

هذي السفرة , وهذي أصلها

ولون السفرة الأصلي هو الأخضر + الذهبي أو الفضي

بس هاليومين قاموا يسون ألوان منوعة للسفرة .. وماكو لون معين لها

بس يبقى الأخضر هو زينتها وحلاوتها