تعبت من حياتي ساعدوني .. مابي أفكر أنفصل !!

صباح الورد ياعسولة
حبيبتي انتي وهمتي نفسك بهالشئ والسبب كلة من خطيبك
لانه اجبرك على انك تروحين لهم وحدد لك يوم ووقت انك تجلسين
تفاهمي معاه قولي له اتمنى انك ماتجبرني وانا راح ازور اهلك اكيد واحطهم بعيوني
هو دخلك لحياتهم بطريقة خطأ علشان كذا انتي حاسة انك تكرهينهم وهم مالهم ذنب
يمكن لو شوي شوي انتي من نفسك تروحين صدقيني راح تحبينهم وراح تشوف نفسك مبسوطة
كثير عندهم كلمية بعقلانية ومن غير مشاكل قولي له ياحبيبي ابي افتح معاك موضوع وماابي تتضايق
اوتحط بخاطرك ...انا لسة ماتأقلمت كثير مع عايلتكم ياليت تخليني على راحتي وكل اسبوعين مرة راح اروح لحد
مااتأقلم معاهم واذا قال لك عن صديقاتك قولي مو بيوم وليلة فترة لما كونت هالصداقة وهالميانة معاهم وانا اوعدك
انك راح تنبسط بس الموضوع مو اجباري حلو لما الواحد من نفسة يسوية

حبيبتي الغاليه
العيب لا هو منك ولا من خطيبك ولا من اهله
العيب والي خلاكي تنضغطي نفسيا وتحسي بكره لأهله هو المده.......اكيد بتقولين كيف يعني المده؟؟
انا هالحين بشرح لك .
زوجي اول ما خطبني قالي انا ابيك تحبين اهلي وتجين عندنا من النهار الين الليل زي خطيبة اخوي وزي ما اختي تروح
بيت اهل خطيبها انا قلت بقلبي اى يصير خير وقلت له اوكي.
رحت المره الاولى معه وجلست معه ومعهم طبعا ومااحس ان في حوار بينا واحس بتقيد وان كل حركة علي محسوبه.
اول ما طلعنا ناظرت فيه قلت حبيبي يعني انت كنت جالس معنا وشفت الملل الي حنا فيه وشفت تقيد اهلك وتقيدي انا.
يا حياتي مره مرتين ثلاث خلاص علمت زوجي على اسلوب ان يجلس معنا يعني اروح الخميس اتغدى هناك واجلس الين
العصر وان صارت الجلسه حلوه وجاوا بنات خالاته جلسنا الين المغرب وخلاص نطلع ...........طبعا هو حاول يسوي نفس اسلوب
خطيبك انتي مو معتبرتهم اهلك وانتي ما تحبينهم وانتي تخافين تجلسين معهم لحالك .....وانا جاوبته بجواب واحد.
قلت له رحم الله والدين من زار وخفف يعني ماابي اثقل عليهم ولا ابي اكسر ظهري متصلبه من الظهريه الين الليل وانا مستحيل
الصراحه اتسدح في بيتهم مع انه فيلا 3 ادوار بس خلاص علمته ومع الوقت يالغاليه اهله صاروا يفضلوني على انفسهم وصرت انا كمان
اشتاق لهم واحبهم لاني ما شفت منهم ولا شافوا مني الا كل خير والاحتكاك الزايد مهوب زين ابد بالذات لوحده مثلي تخر كل الي في بطنها
وزوجي يعرف هالخصله فيني ههههههههه علشان كذا يخاف خلاص مجرد ما اغمز له قال يله حبي مشينا وانا عاد اسوي نفسي اقوله لا شوي ربع ساعه
ونمشي تقوله امه ليه بدري وين رايحين هو يقول بروح انام شوي وعندي شغل وفلانه بتروح بيت اهلها.
..........................
زبدة الكلام اقنعي زوجك ان يجلس معكم بالجلسه راح تكون احلى واطعم بنظرك ووناسه حدها وادعي قدامه بأي حجه مقنعه انك تعتبري روحتك
لأهله فرصه علشان تتعرفي على شخصيته اكثر وكيف يعامل اهله واذا قالك لا انا بتركك وبروح عند الرجال قولي له لا حبيبي انا ملزومه اواصلهم
واقدم لهم افضل ما عندي وامشي الوقت الي يريحني وسالفة اني اجلس الين الليل صعبه لان ظهري يألمني ومااقدر اخذ راحتي معهم وفهميه
كل ما صرتي خفيفه عليهم حبوكي واحترموكي اكثر .
تحياتي

اش رايك تقولين له اسبوع في بيتهم واسبوع في بيت هلك عشان تندمجين وياهم اكثر لأنك تستحين وتخافين تقولين شي والا اتغشمرين ويفهمونك غلط!!

صراحه غريبه كل جمعه عند أهله من الصبح لي الليل وايد صعبه وانتوا توكم ماتزوجتوا

يمكن احنا غير عنكم

يعني مانزور اهل الزوج ابدا في فتره الملكة

اهو ايون لو حتى كل اسبوع

قولي اي عذر

عندك امتحانات والا اتجهزين للعرس والا بتسوين بروفه للفستان

حاولي

عادي...
اذا رحتين لا تظلين واجد بس للعصر ورجعي او روحي المغرب لا تظلين طول اليوم لان هالشي بيخليش تتمللين ولانش مو متعوده عليهم...
و هوه لان ما يرضى على اهله عشان جدي يقول لش اهلي ما تضحكين وياهم و ربعش تستانسين وياهم... قولي ليه الموضوع موضوع وقت و بتعود عليهم ... و خصوصا ان ما بيظلون لش حمواتش و اكيد كل وحده بتروح بيت رجلها و بعدين بتتقابلون يادوب ايام الاجازات..


تحياتي

الله يوفقش خيتووو

ليه اصلا فكرة الانفصال؟!ياااااااأختي الزوج الصالح بالمنقاش تلقينه هاليومين تعوذي من إبليس وشيلي هالفكره,انتي ماتكرهينهم انتي تكرهين الوضع والطريقه اللي فرضت عليك وهذه الطريقه تسمى فرض شخصية وماهي شينه بس مو الحين بعد العرس,وحتى بعد العرس مايصير من الصبح الى الليل وش دعوى ممرضه بمستشفى,وبعدين في بيت أهل زوجك ماشاء الله 6بنات يعني ان حب الزوج كرهوا الاهل والعكس,الله يهدي سرك.

الله يهديكم ويصلح حالكم انشاءالله، حاولي حرام تخسرينه دام اهو طيب لهالدرجة الريال الزين ترى بهالزمن مايتحصل ، ولا تقدمين على خطوة تخليج تندمين طول عمريج، الله يهديج وينور بصرج وبصيرتج.

الله يهديكم ويصلح حالكم وكلام البنت صح ... بس تعوذي من ابليس تفكرين بالانفصال وتوج على باب الله الغالية أجل بعدين شو بتسوين ... حاولي تحلي ما راح اقول المشكلة بس الموضوع من غير هروب ... هروبج يعتب ضعف في شخصيتج فما دامك عرفتي الموضوع ... وحطيتي أيد على اللي يضايقج حليه بطريقة ودية وبالنقتش بالبداية راح تلاقي صعوبة بس بإصرارك على الموضوع راح تلاقي نتيجة ان شاء الله

وبعدين دايما حاولي تجهزي كلام وحركات لما تروحي ... واعرفي كيف ترتبي افكارك وتناقشي وتتكلمي ... لان هذا شيء مهم الغالية بكرة راح تصيري مرة وربت بيت (( تدربي عليهم )) مثلا اتفقي معاه جمعة من الجمعات تتجمعون بس برع البيت عزميهم عندج بالبيت ويا امج والوالدة واخواتك ما راح يقصرون بالسوالف وسالفة تجر سالفة عشان يصير تأقلم ... تجمعوا في حديقة أخذوا قهوتكم ودلالكم وقعدوا في مكان للعائلات منها بتنفسين عليهم وتضمنين زوجج يكون معاكم ..

او حتى جمعة من الجمعات عشان تجزرين الوقت روحوا تسوقوا مع بعض ... تكوني افتكيتي من جمعه هههههه

الله يعينكم


العتب

حبيبتي .,

وكونج ( بحرينية )

فلازم تعرفين إن هاي عادات وتقاليد عندنا

إن الوحدة تزور بيت عمها وتقعد معاهم وتسولف وتضحك .. سواء كانت حابه أو كارهة

هذي عادة تجري عند الكل

مو بس إنتي الوحيدة !..

*

خليني أكلمج وفقاً لعاداتنا وتقاليدنا .. بعيداً عن شنو تحبين وشنو تكرهين ؟!.

*

إنتي طيلة الأسبوع لاهية مع ربعج , أهلج , خطيبج صح ؟!..

شنو فيها لو رحتي يوم واحد بيت عمج ؟!.

تغذيتي , قعدتي , أبتسمتي , سولفتي .. وحاولتي تاخذين عالجو ؟!.

هو مجرد يوم واحد فقط

*

إنتي قلتيها بنفسج خطيبي بهاليوم يكون مشغول ويقضي أشغاله ويقعد مع الرجال !..

يعني ما بيكون فاضي لج أوردي

*

طيب سين سؤال ؟!.

يوم كنتي بنت في بيت أهلج

ما كنتوا تتجمعون يوم واحد كل أسبوع ؟!.

ما في بيت بحريني , ما عندهم هالعادة وهالتقليد

التجمع الأسبوع , في الويك آند

وأكيد لا زلتي تجتمعين مع أهلج يوم واحد كل أسبوع

*

حبيبتي .,

أهل خطيبج .. إهما أهلج ستقبلاً

ولو الله كتب وتزوجتي وجبتي أولاد - إن شاء الله - , راح يكونون أحفادهم

*

فعلى أي أساس هالكره ؟!.

على أي أساس هالضيق ؟!.

*

لأنج حاطه في بالج فكرة .. أنا مجبورة على الروحة والقعدة والمجاملة وكل هلأشياءات

شيلي هالفكرة , وسوي لها ديليت .,

*

وأبدآي بداية جدية ومختلفة

*

خطيبج أكيد عنده غرفة أو شقة في بيت أهله صح ؟!.

وأكيد فيها تيفي , كومبيوتر .. إلخ

يعني قسمي وقتج

شوي هني مع بيت عمج , شوي في في غرفته

علشان تكسرين الملل والروتين من طيلة القعدة

مب تقعدين معاهم طيلة الوقت .. نوعي علشان يمشي اليوم بسرعة

*

شلي يخليج تحبين القعدة هناك ؟!.

حبج لأهله

حبيهم , حبيهم بدون مقابل , بدون إنتظار لشي , بدون لا أحد يقولج .. حبيهم

مثل ما تحبين خطيبج حبيهم

هذيلا أهل خطيبج وقطعة منه

المفترض غصب عنج وبدون ما تحسين تحبينهم

هذي السالفة بعد ما يبي لها

أم وأبو

أو أحد يجي يعلمج هذيلا منو ؟. وشنو يعنون لج ؟!!..

هذيلا الحين أهلج

*

تعلمي كل مرة تروحين

تبوسين راس عمج & عمتج

وتسلمين على حمواتج وحميانج وترحبين فيهم

تعلمي الهدوء , اللطف , البشاشة , وكوني دوم مبتسمة معاهم

وصدقيني الشي بيجي من تلقاء نفسه بدون ما تغصبين عمرج عالمحبة

*

صدقيني لا كنتي معاهم كافية خيرج وشرج وتعاملينهم بكل طيب وإحترام

راح يحبونج , وتحبينهم

وتقوى العلاقة

*

في المناسبات أهدي عمتج هدايا , ولا تنسينها .. هذي حسبة الوالدة

والهدايا .. تفرح القلب وتزيد المحبة بعد

كلما شافت منج الدلع والطيب والزين

والله تشيلج على راسها وتدور فيج

*

وهمسة أخيرة ,

محبة زوجج لج من محبتج لأهله

كلما شاف أهله يحبونج ومرتاحين لج وإنتي تحبينهم وتحترمينهم

راح يعشقج أكثر

ويحترمج أكثر .. ويعزج أكثر من قبل

لكن!..

إذا شاف منج العكس

ماكو محبة , متضايقة منهم كأنهم ثقل وهم على قلبج

وتستكرهين روحتج لهم

هالشي بيحز في خاطره

وبيتضايق وايد .. حتى لو ما قال لج أو ما عبر

يكفي بداخله .. بيكون شايل بالخاطر !..

وما أعتقد حلوة تكسرين بخاطره

وهو بعد شوي .. شوي صدقيني!..

بيسوي مثلج

وبيخف علاقته مع بيتكم وأهلج وبيصير جاف معاهم

لأن قاعد يشوفج شلون تسوين لأهله

بيسوي أهو مثلج .. بدون ما يحس

كنوع من تعويض النقص إلي قاعد يصير

لأنج بتآثرين عليه بتصرفاتج بشكل سلبي مب إيجابي

*

ف حبيبتي

لا تستهينين بالعلاقات الأسرية .,

لأنها شي مهم عندنا

ولا إنتي أول ولا آخر وحدة

تدخل على بيت عمها

وتقعد معاهم طيلة اليوم

تقريباً كل وحدة مخطوبة في البحرين مثل حالتج

بس الشاطرة , الفاهمة , هي إلي تكسب قلب بيت عمها من البداية

وتسويهم ( يا دهينة لا تنكتين )

تتحمل فيهم , وبيتحملون فيها

*

موفقة

اختتتي انتي حطتتتي اب بالج هل فكررة لازم تقنعيين نفسسج انهم ناس طيبيين وحبابيين او ان اهم ما ضروووج ولا سمعتي منهم كلااام شين ..ومستقبلينج ااب بيييتهم يعني يحبووونج..ونتتتي قولي لي خطييبج ما ابي اروح ابي اقعد في البيييت انام ارتااح اقضضي اشغااالي اجوووف اهلللي وللمن يدق علييج قولي ما بروووح عادددي

دلوعةحناني;10801885:
حبيبتي الغاليه
العيب لا هو منك ولا من خطيبك ولا من اهله
العيب والي خلاكي تنضغطي نفسيا وتحسي بكره لأهله هو المده.......اكيد بتقولين كيف يعني المده؟؟
انا هالحين بشرح لك .
زوجي اول ما خطبني قالي انا ابيك تحبين اهلي وتجين عندنا من النهار الين الليل زي خطيبة اخوي وزي ما اختي تروح
بيت اهل خطيبها انا قلت بقلبي اى يصير خير وقلت له اوكي.
رحت المره الاولى معه وجلست معه ومعهم طبعا ومااحس ان في حوار بينا واحس بتقيد وان كل حركة علي محسوبه.
اول ما طلعنا ناظرت فيه قلت حبيبي يعني انت كنت جالس معنا وشفت الملل الي حنا فيه وشفت تقيد اهلك وتقيدي انا.
يا حياتي مره مرتين ثلاث خلاص علمت زوجي على اسلوب ان يجلس معنا يعني اروح الخميس اتغدى هناك واجلس الين
العصر وان صارت الجلسه حلوه وجاوا بنات خالاته جلسنا الين المغرب وخلاص نطلع ...........طبعا هو حاول يسوي نفس اسلوب
خطيبك انتي مو معتبرتهم اهلك وانتي ما تحبينهم وانتي تخافين تجلسين معهم لحالك .....وانا جاوبته بجواب واحد.
قلت له رحم الله والدين من زار وخفف يعني ماابي اثقل عليهم ولا ابي اكسر ظهري متصلبه من الظهريه الين الليل وانا مستحيل
الصراحه اتسدح في بيتهم مع انه فيلا 3 ادوار بس خلاص علمته ومع الوقت يالغاليه اهله صاروا يفضلوني على انفسهم وصرت انا كمان
اشتاق لهم واحبهم لاني ما شفت منهم ولا شافوا مني الا كل خير والاحتكاك الزايد مهوب زين ابد بالذات لوحده مثلي تخر كل الي في بطنها
وزوجي يعرف هالخصله فيني ههههههههه علشان كذا يخاف خلاص مجرد ما اغمز له قال يله حبي مشينا وانا عاد اسوي نفسي اقوله لا شوي ربع ساعه
ونمشي تقوله امه ليه بدري وين رايحين هو يقول بروح انام شوي وعندي شغل وفلانه بتروح بيت اهلها.
..........................
زبدة الكلام اقنعي زوجك ان يجلس معكم بالجلسه راح تكون احلى واطعم بنظرك ووناسه حدها وادعي قدامه بأي حجه مقنعه انك تعتبري روحتك
لأهله فرصه علشان تتعرفي على شخصيته اكثر وكيف يعامل اهله واذا قالك لا انا بتركك وبروح عند الرجال قولي له لا حبيبي انا ملزومه اواصلهم
واقدم لهم افضل ما عندي وامشي الوقت الي يريحني وسالفة اني اجلس الين الليل صعبه لان ظهري يألمني ومااقدر اخذ راحتي معهم وفهميه
كل ما صرتي خفيفه عليهم حبوكي واحترموكي اكثر .
تحياتي

سبحااااااااااااااااااان الله .. كانك تتكلمي عني .. نفس الشي .. نفس الاسلوب

انا كنت مثلك احس بتقيد واجلس لين ظهري يعورني .. وارسل لزوجي يجي يجلس معي ونكون متفقين من اول ان الساعه الفلانية تجيني تطلب مني نطلع

وفعلا

الظاهر ان هالاسلوب انسب اسلوب

أمرج غريب والله..
ليش تكرهينهم وهم أبد ما ضروج؟
هذولا أهلج ولين تزوجتي بيكونون أهل عيالج!
حرام عليج..
انتي استغفري الله في الأوقات اللي تتمللين فيها صدقيني بتحسين براحة..

حاولوا تسوون برنامج طلعة مع بعض مثل شواء حتى لو كان في حوش البيت بس اهم شي برنامج غير عن مجرد السوالف وراح تنبسطين وياهم..
استهدي بالله ولا تخربين بيتج على أوهام!

مافي شي يجي بالغصب حبيبتي
بس صحيح موحلوة تقعدين عندهم من النهار لليل ، حتى اهم يبون يرتاحون ويآخذون راحتهم
روحي لهم مع صلاة العشى وطلعي ع الساعه 10 حلو كذا


انا عكسج استانس وايد يوم اروح بيت عمي :)

حااولي تتقبليهم وراااح تتقبليهم بس دامك تتقولين
مو مرتااحه بيصير مو مرتااحه عزيزتي اللي تحب زوجها بتحب اهله

استغفرالله واتوب اليه لااله الاانت سبحانك اني كنت من الظالمين اللهم فرج هم المهمومين ونفس كرب المكروبين اللهم صلي على محمد وعلى محمد