ساعدوني .. اباا شوركم .. ولا بفكر في الطلاق ؟؟

جناح الروح;10799443:
.. (( حبيبي لمن أدخل بيتي وأنا معااك بلبس كل اللي نفسك فيه ))

جناح الروح;10799443:
بس أنا أشوف تخبيرك لأهلك بالموضوع مش في مكانه

حور الروح;10799421:
اختي من وجهة نظري انتي ما غلطتي ،لانكم اللحين ممتلجين وبعدك ما رحتي لبيته وهو كذا يسوي فيج!!

دائما لما تحصل مثل هالمشاكل الاهل لازم ينحطون بالصورة خاصة في وضعكم ، لانكم لو متزوجين وببيتكم ممكن تحلو مشاكلكم بينكم بس ما دمتي بعدج في بيت اهلج وانتي حاولتي تتفاهمين معاه بكل الطرق وهو اللي معاند فخلاص خلي الاهل يتفاهمون خاصة ان اهله طاحو فيج بهالكلام واتهموج انتي بالغلط كله. خلي ابوج يتصل به ويكلمه ويفهمه ان الامور ما تكون بهالطريقة.


بالوقت الحالي هو اكيد معصب ومتضايق وعشان كذا ما يرد عليج .اصبري شوي لحد ما يهدأ ويتصل بك .انتي لحظتها اتفاهمي معاه بهدوء وقولي له وجهة نظرك وان الزواج مو بس عادات وتقاليد وعيال وخلاص . الزواج تفاهم وابداء رأي مو تحكم من قبل الزوج . وان الزوجة حتى لو تشتغل ما يحق للزوج يمتنع عن الصرف عليها واذا هو صمم وقال ما بيصرف عليج قولي له اوكي انا موافقة بس فلوسي لي وحدي ما بدفع ولا فلس في البيت او غيره ( انا ما اقولج هالكلام كعناد فيه ولكن عشان ما يجي بعد الزواج ما يصرف عليج ويبي انتي تصرفين عالبيت من فلوسج فالافضل من اللحين تحددو الامور المالية )

فهميه انه بالنسبة للبس انتي ما متعودة ببيت اهلك على هاللبس واهلك ما يرضون ولكن بعد الزواج انتي بتسوين له اللي نفسه فيه وتلبسين اللي في خاطره.

انتي بعد شوفي انتي شو نواقصك . يعني يمكن فعلا انتي ما تهتمين بنفسك قدامه يعني تطلعين بجلابية بيت او مخورة وما تحطين مكياج لما يجي يزورك فيشوفك بهالشكل ويحس بأنك ما مهتمة بنفسك عشانه . اهتمي بنفسك إلبسي شئ حلو مو لازم قصير ولكن مثلا تنورة وبلوزة ساترة بس حلوة وكشخة حطي شوية مكياج خفيف لانه بالنهاية هو زوجك.

اهم شئ الان الهدوء وما تتسرعي بطلب الطلاق الا اذا حسيتي فعلا خلاص انك ما تقدري تتعايشي مع الوضع والظروف وانك ما بتقدري تعيشي مرتاحة معاه . لكن اذا في مجال للتفاهم حاولو تتفاهمو وانتي اللي بيدك تحددي الامور معاه .

لكل البنات لا تتسرعو في الملجة ، خلو لكم فترة خطوبة كافية يعني عالاقل 3 اشهر عشان تفهمون بعض وتشوفون الشاب واهله وتعاملهم وطريقة تفكيرهم . لان فسخ الخطوبة اسهل من طلب الطلاق .