وكل عام وأنتم بخير بمناسبة قرب حلول السنة الهجرية الجديدة ،، أعادها الله علينا جميعا بالخير واليمن والبركات وعساها يا رب سنة مباركة للجميع .. اللهم آمين :)
طبقي لليوم حلا شهي ما شاء الله ،، كان عندي كيسة شعيرية باقية من أيام رمضان ، وبغيت أسويها في حلا جديد غير عن المألوف اللي متعودة أسويه ،، بحثت في النت وشفت طريقة ولا أروع تبارك الله ، بالنسبة لي جديدة مدري عنكم :p .. وما أقول غير جزا الله صاحبته خير الجزاء بجد كان يجنن ونال على رضا الحلوين أهم شي :thumbs_up: ..
نبدأ بسم الله مع المقادير ..
المجموعة الأولى : 2 قشطة + ثلث كوب زيت + ملعقة كبيرة بيكنج بودر :)
المجموعة الثانية : 3 بيضات + ملعقة صغيرة فانيلا + كيسة شعيرية :)
الطريقة :: :lol:
نكسر الشعيرية في ملة ، ما يحتاج إننا نقليها ولا شي كما جرت العادة :D
والمرحلة اللي عقب نسيت أصورها السموحة ، بس فيها نحط بالخلاط المجموعة الأولى ونخلط فيهم ونضيفها على الشعيرية المكسورة ، ومن ثم نخلط المجموعة الثانية بروحها ونضيفها أيضا للشعيرية .. لاحظوا المجموعتين مندمجات سوا :D - لا تخلطوا مقادير المجموعتين سوا عشان موضوع التجانس لا أكثر :cool:
ونمزج المكونات كلها مع بعض ، ونخلي الخليط يرتاح لمدة 10 دقائق أو أكثر ( الطريقة هاي مهمة ) لا تطوفوها يعني :p وراح تلاحظوا ان الشعيرية تشربت المقادير كلها وهذا هو الهدف ..
وهنا بعد ما تشربت الشعيرية كل المقادير ،، صبيناها على قالب الفرن :)
وندخلها الفرن عشان تستوي وتكسب لون ذهبي يجنن :worn_out: ،،
ولين ما تنضج معانا الشعيرية ويا باقي المقادير ، نسوي التوفي أو صوص الكراميل مثل ما يسميه البعض .. وهاي مقاديره والطريقة نسيت أصورها أيضا :o ، في الصفرية نذوب نصف كوب سكر لين يشقر لونه ، وعقب نحط زبدة ونقلب فيهم سريع عشان ما يتكتل ويانا التوفي ، بعد ذلك نرفعه من على النار ونضيف له بالتدريج علبة قشطة ..
هنا الطبق بعد ما استوى نطلعه من الفرن ومباشرة نصب عليه التوفي ...
نخليه ليييين يبرد بره الثلاجة ما يحتاج داخل الثلاجة :lol: ،، وهذا بعد ما قطعناه ،، أترككم مع الصور
بعد ما زيناها بالهيرشي ( اختياري ) ;) ..
وهذا صحن بنوتي الغالية مودة ( لا تنسوها من دعواتكم ) ، سويت لها حركات الأشكال والوجه المبتسم - عامل الإغراء وفتح الشهية :lol:
