تعبانه وايد بليز ساعدوني

بسم الله الرحمن الرحيم
السلام عليكم ورحمة الله وبركاته
شخباركم
صراحه انا من متابعيين هالمنتدى من زمان على الرغم من حداثة عضويتي واللي دفعني اني اكتب لكم اليوم ردودكم ع مشكلات الاخوات اللي احسه طالعه من القلب من خوات لاخواتهم
مشكلتي اثقلت صدري بالهموم بقولها لكم باختصار انا متزوجه من ولد خالتي باقي شهر واتم ثلاث سنوات ع زواجي عندي زوج تتمناه اي بنت جمال واخلاق والاهم انه يحبني وانا احبه واموت فيه من يوم ما كنا صغار بس في شغلتين منكديين علي حياتي ومخليني دائما حزينه لدرجه احس صادني اكتئاب او مرض نفسي اول سبب مرض زوجي زوجي مريض بالسرطان من فتره حتى من قبل لا نرتبط وغير هذا عنده مشاكل صحيه وايد مره يكون زين وعشره تعبان ومرقد وحالته حاله وهالشي وايد مؤثر ع نفسيتي ادري انه ابتلاء من رب العالميين ومؤمنه بكل شي الله كاتبه بس صعب علي اشوف اللي احبه يتعذب كل يوم وكل يوم احس اني ممكن افقده ويروح عن حياتي واهو اصلا كل حياتي والسبب الثاني ودي يكون لي من زوجي طفل يكون من ريحته وخلال فتره زواجي حملت 4 مرات وفي كل مره كنت اجهض خلال الثلاث الشهور الاولى وليومكم مو عارفه شنو الحل وشنو سبب الاجهاض المتكرر تابعت وتعتب ولفييت مستشفيات البحرين كلها وكل مكان يقولون لي سبب مختلف او يقولون كل شي طبيعي ومافي سبب المشكله انا شكييت من العلاج اللي ياخذه زوجي بس خايفه اجرح مشاعره لما اصارحه بهالشي او اني اسال الدكتور عن احتمالية هالشي جدامه...
آخر المستجدات اللي خلتني اكتب لكم اليوم انا عندي صديقه من ايام الدراسه عزيزه علي وايد اعتبرها اخت مو بس صديقه ساندتني في فترات مرض زوجي وفي وايد اوقات واهي توها متزوجه من جم شهر فرحت لها وايد واهي تستاهل كل خير واهي حاليا حامل مشكلتي انه لما تتكلم عن حملها او عن البيبي احس بضيقه والله اني ما احسدها واتمنى لها كل خير بس ما ادري ليش ايني هالشعور لدرجه كنت طالعه معاها ايام العيد وكانت تتكلم عن جنينها يوم تشوفه بالالتراساوند داخلي فرحانه لها بس حزينه على نفسي بدون شعور قعدت اصييح احسها ماراعت شعوري رغم انها عارفه الحالة النفسيه اللي مريت فيها لما اجهضت كذا مره خفت لا تلاحظ وتفكرني احسدها او اغير منها ولحد اليوم وانا مضايقه مضايقه ليش حسيت بهالشعور المفروض افرح لها مثل مافرحة لي في شغلات وايد ما ادري شلون اتغلب على هالشعور احس تعبانه تعبانه يا ناس ما اقدر اسمعها تتكلم عن حملها والبيبي وبنفس الوقت ما اقدر امنعها انه تقولي وتشاركني فرحتها والله تعبت حتى دكتور نفسي رحت بس ما واصلت مره اكون اوكي ومره ترد حالتي احاول اتقرب لربي والحمد لله مستمره بالدعاء وادري برب العالميين مايقصر بس بعد الضيقه اللي بصدري مو عارفه شلون اتخلص منها
بليز ساعدوني بحلولكم وآرائكم وادعو الله يشافي زوجي ويرزقني بالذرية الصالحه