السلام عليكم ورحمة الله وبركاته
موعدي كان 23 نوفمبر 2009م
وولدت 10 نوفمبر 2009م
بالبداية ما كنت متوقع ولادتي تقدم أبداً
لان ما كان عندي بوادر ولادة فكنت انتظر موعد ولادتي
بس المفاجأة كل الأمور صارت بسرعة تعاالوا معاي وجوفوا شلون
بما إني بكرية فما عندي خلفية عن الولادة سوى قرآءة فقط في المواقع
بتاريخ 9 نوفمبر قعدت الصبح كان عندي ألم بسيط
وتوقعت يكون ألم عادي (طلق كاذب ) أو ما يسمى بريح إستقبال ماقبل الولادة
لكن المفاجأة إني جفت نقط دم بسيطة نازلة عليي فالبداية خفت وخبرت امي
أمي طمنتني وقالت لي هذا بادر من بوادر الولادة بس مو شرط تولدين الحين ..!
لان الدم قطرات بسيطة جداً ومايلة مو للون الأحمر للوردي مع إفرازات مخاطية شفافة
قضيت اليوم بحياة طبيعية ورحت امشي ورحت بيومها السوبر ماركت كان ناقصني أغراض رحت شريتها بالليل ومانمت أني وزوجي إلا عالساعة وحدة بالليل .. وكل الأمور طبيعة وماشية تمام
لكن.....!!
عالساعة 4 الفجر
كنت نايمة ولا على بالي شيء بس قبل لا أنام
كنت أمزح مع زوجي وأقول له بكرة بولد لاتروح الشغل ...!!
وهو يقول ما أتوقع تولدين بكرة ماعندج علامات ولادة .!
وأني نايمة كل الامور تغيرت حسيت برطوبة
قلت أكيد إفرازات وقمت تكرمون بروح الحمام
وتوني داخلة الحمام إلا ماي ينزل على رجايلي .!!!:-o
أقول ببالي هذا شنو .!.!
بس بعد خليت عندي شوية جرأة وحطيت لي كتكس أولويز
وقلت خل أكمل نومي ومن أصبح أفلح ..
دخلت الحجرة حاولت انام أبغي أنام لا ما جاني نوم بدأ عندي ألم .!
شوي شوي يزيد .! ما أبغي أقعد زوجي الساعة 5 ونصف بيرن المنبة وبيقوم هو للشغل ..!
بس ما إستحملت الألم الي كان يزيد بشكل سري ومتواصل .! زوجي حس بصوتي وأني تألم شوي شوي حتى لا يسمعني قعد من النوم إلا يقول لي شفيش قاعدة ليش مانمتين عندش ألم شيء ويش صاير .......!!
قلت له مبلى نمت بس فاجأتني رطوبة ورحت الحمام ونزل عليي ماي والحين ألم وااااااايد وموقادرة أقعد ولا انام .!
حاول يهديني شوي ويصبرني شوي ويقول ألم عادي إن شاء الله وبيروح .!
أقول له شكله بولد خلاص وصلنا لوقت الجد يقول لي بس موعدش بعده .!؟وامي مجهزة لي ماي وزعفران وسيدة عطتني أشربه زوجي
يقول لها يمكن ألم عادي قالت له لا هذا ألم طلق
وعدت نصف ساعة وصلت الساعة 4 ونصف الفجر بدات ما أتمالك نفسي
طلق حامي وألم يزيد زوجي إتصل لامي وقال لها عن الألم والماي الي نزل عليي
قالت له قوم جيبها عندي لانها بتولد .!؟
وقمنا طلعنا من الشقة ووداني بيت أبويي ولا دخلت إلا وأني مصدقة ..
بما إن أمس عندها قطرات دم واليوم نزل عليها ماي وهذا ماي الرحم ..
زوجي نزلني ببيت أبويي وطلع عقب عالساعة 5 وربع
حتى يروح يبدل ويروح دوامة وبالدوام يستأذن ويرد يجيني
راح زوجي وبدات أمي شغلها جابت لي حليب مخلوط بهيل وزعفران
وماي وزعفران ووصت زوجي يجيب بطريقة أنناس ..
الألم يزيد وأني أصيح بدموع بس وأتلوى يمين ويسار زوجي وصل وجافني والألم يزيد عندي قال لامي خل نوديها المستشفى قالت له لا بعدها
رحت المستشفى أول مرة عالساعة 9 ونصف الصبح وقالوا لي مفتوح الرحم 2 سانتي وبيدخلوني ولادة بس مارضيت أدخل وقلت لهم برجع البيت وإذا زاد الألم برد أجع عندكم
لان البيت مو بعيد مسافة 10 دقايق بس عن المستشفى
بالبداية مارضوا على إعتبار إن دمي كان نازل ويبون يحطون عليي سيلان
ما رضيت أقعد وقت على ورقة إخلاء مسؤولية ووقع زوجي وطلعنا ورجعنا البيت ..
وضليت اتألم مكاني وزوجي جاب أنناس بس مالي نفس آكل
أمي سوته لي عصير شربت شوي منه بس وتكرمون صادني إسهال وترجيع ..
الوقت موب راضي يمر والألم يزيد وصلت الساعة 2:30 الظهر والألم صار أزيد
زوجي مارضى أتم بالبيت أكثر لان راسي بدأ يدور من أوقف وترجيع ذبحني
بالإضافة إلى نقص الدم وكان دمي 9.5 يوم أدخل ولادة ..
رحنا المستشفى وجيكوا لي مرة ثانية وقالوا لي 3 سانتي ..!! << ك هالألم وبس 3 :sick:
بس مارضوا أطلع من عندهم عطوني الثياب وقالوالي بدلي ولادة
ودخلوني القسم بدون حتى ما اجوف زوجي
لانة نزلني ويايي أمي وأختي وراح يبركن السيارة ولا جى إلا وأني دخلوني ..
دخلوني وركبوا عليي سيلان وجهاز التخطيط وخلوني بروحي أتالم
وكل شوي يجون لي يجوفون الأجهزة .. وضليت على توسع 3 سانتي للمغرب الساعة 5 ونصف ما صار توسع عطوني إبرة طلق صناعي وإبرة مهدئة وخلوني انام شوي لاني كنت تعبانه ..
نمت وقعدت والألم زاد من الإبرة بس ما زال 3 ساتي ماتوسع ..!
يأست ني أولد بهاليوم والألم وااااااااااااجد بس الغريب مافي توسع وعالساعة 8 المغرب وصل 4 سانتي زوجي مسكين برى ولا تحرك طلب منهم يجوفني ودخلوه لي وأني تعبانة حدي وعليي جهاز أكسجين مسكين حاول يجود دموعة بس ما قدر قعد يهديني ويقول صبري شوي كلها لحظات وعلاوي بيوصل بالسلامة وبعدها بتنسين التعب قلت له إن شاء الله وطلع ما قعد عقب دخلوا لي أمي شوي وطلعت لما طلعت أمي ججو جيكو وقالوا لي 5 سانتي وعطوني إبرتين طلق صناعي مع بعض حتى يحمى الطلق وخلوني أعاني بعد ما حمي الطلق وصلت عالساعة 9 ونص 7 سانتي جو لي وعطوني إبرة منومة وقالوا لي الحين لازم تنامين ونيموني ربع ساعة وقعدت بالالم حدة وجت الدكتورة وفتحت لي كيس ماي البيبي وخلتني أصرخ وهي الصرخة الوحيدة الي صرختها بصوت عالي وبعد ما نزل ماي البيبي بدا الرحم يتوسع الساعة 10 ونصف جت جيكت الدكتورة وقالت لي خلاص ولادة قلت لها جم قالت زين ولا عطتني جواب راحت وجت وردت جيكت إلا هي تقول 9 .. 9 ونصف خلاص 10 ولالالالالادة بعد ما نادت ولادة جوني الغرفة معاها 5 وحدات ..!! وأني حدي خايفة بدأوا ينزلون السرير وقالوا لي قربي وكل ماجاج ألم دفعي دفعت الدفعة لأولى وقرب علاوي والدفعة الثانية بين شعره والدفعة الثالثة طلع نصف الراس ورااااحت طاقتي ووقفت دفع فرد رجع البيبي داخل الرحم خفت والممرضات عصبوا عليي وجهاز التخطيط بدأ يطلع صوت عالي لان البيبي تعب قالوا لي لو شوي صكيتين عنق الرحم على البيبيي وقمت أصيح وخفت خلوني أريح وأخذتنفس وقالوا لي الحينلازم البيبي يطلع دفعي ودفت الحمد لله طلع علاوي بالسلامة الساعة 11 و 20 دقيقة مساءاً والساعة 12 طلعوني لزوجي وأهلي الي ينتظروني ونور علاوي دنيتي ..
10_11_2009م
والسموحة عالإطالة
مع التحية
ينبوعُ الحب