دعوه تكفيني ،، بليز

السلام عليكم ,, اشحالكن ياعرايس
بصراحة انا كتبت هالموضوع من الضيجة الي فيني وصدق احس اني مهمومة لدرجة ماتتخيلونها يمكن يكون الموضوع تافه في نظركم بس صدق مأثر فيني ،،
اول شي انا عمري 22 سنة ، ادرس فالجامعة باقلي سنة عشان اخلص ، طولي ووزني اوكي بس يبالي امتن شوي ، عادية ، ومواصفاتي الثانية بعد عادية..
اسمعوا السالفة وقوليلي كيف اقدر اطنش لني صدق تعبت ،،،،
من 12 يوم تقريبا يونا ناس على اساس انهم يايين يشوفون اختي المربية ، اول مادخلوا انا استقبلهم ، بما انه كان عند امي ناس في الميلس ، المهم سلمت عليهم ويت حرمة اخوي بعدي تسلم عليهم وانا دخلت الميلس، امي سألتني وين الناس ، قلتلها حرمة اخوي تسلم بس طولت شوي مادري ليش ،،
المهم يلست اسال حرمة اخوي تعرفينهم قالت لا ، واحس امي كانت ماتعرفهم بعد ،، عقبها انا طلعت وامي قالتلي اييب القهوة يبتها وعقبها طلعت ، عقب ماطلعت يتني حرمة اخوي وقالتلي ان هالناس يايين يخطبون وانهم خطبوا اختها وماوافقت لنها تبا العرس السنة الي بعدها وتكون بروحها ،وهم يبونا في الصيف ومع اخوه ..
(الناس يوم شافوا حرمة اخوي ، اعتفس ويهم ، وقالولها انتي هنيه ، قالتلهم هيه هذا بيت اهل ريلي ، ومع انها تعرف انهم يايين يخطبون ، تمت قاعدة، حلاة الناس يايين يخطبون وهي مجابلتهم وتعرف انهم ردوهم )
المهم عقبها يت امي رمستني وقالتلي ترا الحرمة سالت اي وحدة من البنات بتزوجونها قلتلها انتي، وهي قالت اوكي ، انا يوم قالتلي انهم يايين يخطبوني فز قلبي والله حسيت الدنيا سودة من الخوف ،،
الريال عمره 26 وخرييج ادارة واقتصاد يشتغل فبوظبي ونحن سالنا عليه ويقولون انه محد ذمه، وبصراحة كل مواصفاته نفس ماكنت احلم فيها ، بس شيئين خلونا محتارين :
1- انهم ناس عندهم خير والله يرزقهم ، بس هالشي مب مبين فيهم ابد لافي بيتهم ولا فشي ، ليش مادري؟ تواضع ، اقتصاد ولا بخل ؟؟
2- الشي الثاني انهم يالسين يخطبون من فترة مثل ماسمعت 3 سنين ولين احين بس اخوه ملج من سنه وهو لا .
الي قاهرني انه خطب اخت حرمة اخوي قبلي وبنت جيرانا بعد ، وان حرمة اخوي تقولي بصراحة انا ماارتحتله ، قلتلها شفتيه قالت لا ، قلتلها عيل لا تحكمين على حد جي ، مع انها قايلة انهم ضغطوا على اختها بس عشان توافق وهي ماكانت راضية لنها تدرس فالجامعة وبقالها سنة.
المهم بعد اسبوع تقريبا، لأن نحن قلنا لهم بنرد بعد اسبوع، قلت لابوي اتصل فنسيبهم قوله انه نحن موافقين مبدئيا ، عفكرة ابوهم متوفي، وابوهم كان ربيع ابوي.
جان يقول الريال شو شروطكم ، قاله ابوي بكلم الاهل وبرد عليك ، انا قتله خليهم يحددون يوم عسب الحريم يرمسون ، او يعطونا رقم الفون عسب نتصل عليهم او هم يتصلون >> انا قلت جي لني اعرف ابوي بيقول ماعندنا شروط والبنت بنتكم ومادري شو ،،
وانا بصراحة ماعندي شروط غير الاشيا العادية ، اكمل دراسة واشتغل واعرف وين بسكن والمهر العادي وطبعا اني اشوفه كيف يبون، مب حلوة اتشرط قبل لا اشوفه يمكن سبحان الله ماارتحاله ، بصراحة انا أحس الشوفه هي الي تخلي الانسان يعطي الموافقة النهائية ويرتاح نفسيا.
المهم عقبها هاليوم مادق الريال، هالسالفة صارلها 3 ايام ،،
وانا مهمومه مرة ماعرف شو اسوي ، تفكيري مشتت ، والله لو يدقون يقولون ماشي نصيب احسن من انهم ساكتين، حسسوني اني اخيس انسانه على وجه الكرة الارضية، اهانوا كرامتي لو انهم مايبون ليش يو من الأصل ولابس يوم شافوني عطول قالوا خلاص بنغير رايينا بس استحوا ..
ولا هل تتوقعون انهم مايبون خلاص ولاانهم بس متاخرين ولا شو مادري ، وانا يوم سالت حرمة اخوي يوم يو خطبوا قالت دقولهم عطول عشان يشوف البنت ، وانا حتى ماطلبوا يشوفوني ،،
اااااه ، ياببنات انا استخرت من اول يوم يو فيه ، لين امس وانا استخير اول يوم ماقدرت انام بس عقب لاستخارة حمدالله ارتحت وايد ، وبعد ماقلت لابوي اني موافقة مبدئيا حلمت انهم كانوا يايين وكنا ندليهم البيت مع انهم يعرفونه،،
بنات ادعولي الله يعجل الامور واذا في نصيب يصير واذا لا الحمدالله
والله يعوضوني باحسن منه ، المهم ارتاح من هالهم .