زوجي كان بإجازة أسبوعين وأبوي شجعنا قال ليش ماتاخذ بنتي كم يوم تغير جو بدون العيال أحنا بنتحمل فيهم.. ههه ماقصر والله الوالد الله يطول بعمره وعطانا ال Green light مثل مايقولون..:D قلت لزوجي يله الكويت او دبي بعد وين بنروح في مدة قصيرة.. قال لبنان.. عاد آنه الله يسلمكم متنسية في لبنان :-#لأن يوم رحت ذيك المرة كنت حامل في عبدالله وكل نفسي مثل مايقولون غامة علي..ترددت في البداية بس قلت يله فرصة نغير جو بعيد عن الروتين والعيال...
قلت إنزين يله نشوف الحجوزات ونرتب أمورنا في يومين ثلاثة حجزنا وجهزنا ورحنا وخذيت إجازة يومين.. إنزين بس خلصينا عطينا الزبدة...
المهم كانت الرحلة على طيران الخليج (طبعا طيران الخليج عمرها ماطارت على الوقت وتأخرت نص ساعة في الإقلاع) يعني المفروض تطير عشر ماطارت الا عشر ونص... وصلنا بيروت بعد ساعتين وأربعين دقيقة..:clock:
بس دخلنا الحدود الجوية الا ياي على المنظر.. الثلوج توها نازلة.. أخذوا الصورة...
بعدين خلاص قربت الطائرة تهبط.. الا منظر الروشة من فوق والبحر شحلاته,,,جوفوا صخرة الإنتحار شلون ضبطتها كاميرتي..
المهم وصلنا على الفندق.. مادري شلي خلانا نحجزه كان إختيار أختي قالت زين قريب من الروشة بس دقيقتين وتوه فاتحينه أول السنة يعني نظيف... وسعره بالحجز العادي في الخمسين وأحنا حصلناه في النت الليلة ب 43 دينار تقريبا... نسيت أصور الفندق أول مادخلنا وتذكرت يوم ثاني وصورته بالليل...
ماقصروا خدمتهم كانت سريعة وقدموا لنا عصير على مايخلصون الأوراق ورحنا الحجرة.. أحنا خذينا الغرفة العادية... وكان في سويتات.. كل الغرف والسويتات معهم مطبخ صغير...
هذي صورة للفندق (يوم ثاني صار الليل)... للمدخل للغرفة والمطبخ وتكرمون الحمام..
آنه مادري شقصتي مع لبنان مرتين وكل مرة يخلون لنا سرير منفصل. أول مرة قلنا لهم بدلوا الغرفة دمجوا الأسرة قالوا مايصير.. هالمرة شلت الدنيا قلت لهم الحين أتيون تدمجون السريرين شنو ذي (ههه زوجي يقول بس فشلتينا اللي يقول عروس يديدة)..
تعليقي على الفندق.. مكانه قريب من الروشة مافي الا دقيقة وأنتي بالشارع لكن عيبه إن في شارع فرعي يعني مايطل على شي... والسويتات الكبيرة بس اللي كانت تطل على بحر الروشة..
الغرف نظيفة وكل شي فيها... تكرمون الحمام نظيف بس عيبه صغير..
مكان الفطور نظيف بس كان صغير والفطور فيه والحمدلله من الأجبان والمربى والبيض بس مب منوع وايد ولما كان يخلص الشي مايبونه الا عقب خمس عشر دقايق يعني مو من اول مايخلص الصحن ينزلون الثاني..
موظفين الفندق بشوشين وخدومين..
بعد ماركبنا الغرفة بس صلينا ونزلنا على الروشة نتغدى في سناك محمد بربر لأن كنا ميتين من الجوع... وطبعا نسيت أصور والصور في تلفون زوجي وللحين مانزلهم...
رجعنا الفندق ونمنا وبعدها نزلنا على الحمرا خمس دقايق مشي بس من الفندق.. خذينا لفة على المكان.. وطلبنا تاكسي ونزلنا السوليدير...
وقعدنا في هالمطعم نتعشى.. كان وايد لذيذ...
أنا طلبت شيش طاووق.. الا ماجوفه وينه طلع داخل الخبز.. والفتوش يمي يمي..
اليوم الثاني.. رحلتنا لجونيه (جعيتا - التلفريك ) مدينة بيبلوس ومطعم مانويلا في جونيه..
الطريق على جونيه.. قريب من نهر الكلب..
البداية راعي التاكسي قال أدخلكم متحف المشاهير قلنا له لا شايفينه ذيك المرة مانبيه ومباشرة دخلنا على جعيتا.. طبعا التصوير ممنوع في المغارتين فراح أحط لكم الصور برع المغارة..
وهذي صورة لحارس الزمان مادري المكان.. عند المغارة السفلية..
والنهر عند صعدة التلفريك للمغارة العليا..
بعد ما خلصنا هالمشوار.. رحنا جهة التلفريك واوا ركبت تلفريكات الدنيا نفس هالتلفريك ماشفت خلا الضغط بأذني جريب وينفجر حتى حسيت إني صدعت..
أول ماصعدنا فوق حسيت بضغط فضيع.. وهذي الصورة في حريصة عند مريم العذراء...
بعدها نزلنا من التلفريك. الا في متحف على صوب أسمه Museuam of Holography الله يسلمكم داخله كل صور ولوحات ال 3D.. يعني وهالشغلات.. هو متحف صغير بس فيه شغلات حلوة... وحتى رواتنا أشياء كثيرة ومنها بطاقات الإئتمان وشلون الصور ممكن تشوفينها في المستقبل من الجنب وإن في المستقبل حتى صورنا في الجوازات ممكن يشوفون وجهنا من كل الجهات..
بعد هالصعدة والنزلة بالتلفريك رحنا على مدينة بيبلوس الأثرية.. وهذي صورتين لها..
بعدها خلاص الجوع كافر قلنا له على مطعم مانويلا... هذي مطعم أكثر من روعة على البحر وصوت الموج يتضارب بالصخر.... اول ماتدخلين حطوا لج المكسرات... وبعدين يابوا المخللات والسلطات هذي يعني هدية من عندهم.. وبعدين طلبي أنتي المقبلات والطبق الرئيسي وبعدين الحلا عليهم كل أنواع الفواكة اللي عندهم بيصفونها لكم.... ومع عصير رمان ويا ثلج مجروش وسفن أب يخلطونهم مع بعض ويطلع شراب يمي يمي..
منظر للمطعم من الطاولات الخارجية..
والحين صورتين للأكل خل أنيوعكم شوي..
زوجي من الصبح كان ضاربه الم راس مو فاج عنه وأحنا نتغدى وصل حده ومن حلينا أعتفس زيادة وقال يله نرجع الفندق...:sick: وآه آنه ماتهنيت بالقعدة الحلوة...
رجعنا الفندق وغط زوجي في نوم عميق للساعة سبع وبعدها رحنا على الحمرا يكون ياكل لأنه هم من الألم ماتغدى عدل... والله كان خوش مطعم إيطالي..
خلصنا بسرعة من العشه.. وكان الوقت توه الساعة تسع قلنا يله ننزل السوليدير نحلي ونشرب شاي وهالمرة رحنا على Petit..
اليوم الثالث.. رحلتنا على بعلبك.. عاليه وبحمدون..
هذي في الطريق على بعلبك بعد ماطفنا منطقة بوحمدون على طريق شتورة.. أهني كان المطر غزير ودرجة الحرارة نزلت لل 10... بس صج صج كان الجو رهيب...
وهذي صورة لمدينة بعلبك.. الصور كثيرة بس غالبيتها صوري أنا وزوجي..
هذي بعد ماطلعنا من بعلبك.. كان في جنبه صورة أكبر حجر بالعالم...
في العودة وصلنا على بحمدون ونزلنا في جامع صلينا الظهر والعصر جمعا وقصرا.. وخذينا لفة على عاليه وأحنا نازلين وهذي صورة لبيروت من عاليه.. شوفوا شلون المنطقة مرتفعة عن بيروت..
والسايق مانصحنا ناكل هناك يقول يمكن الأكل بايت لأن هالمنطقة صيفية والحين مافيها ناس فنزلنا على بيروت..
هذي في بيروت وين نصب رئيس الوزراء الأسبق المرحوم رفيق الحريري.. والصورة الثانية البناية اللي صار فيها التفجير..
وأخيرا بناكل.. مطعم المنارة على البحر في عين المريسة .. قبل مانوصل على بحر الروشة..
وهني كان المطر يطق وطلعت على التراس وصورت هالصياد مسكين كان مقاوم الجو وصامد يصيد..
وبالليل كانت جولتنا الأخيره على شارع الحمرا وتشرينا بعض الشغلات.. وخذينا عشا سريع من مطاعم بربر.. ههه ولازم بالأخير السوليدير....
يومنا الرابع والأخير..
ماسوينا فيه شي تفطرنا بالفندق وزوجي قال مافي طلعة لازم آركب آشوف مباراة المنتخب اللي يقول بيفوزون وقعدنا نطالع بالمباراة اللي كانت ترفع الضغط والأعصاب وبعدها طلعنا على المطار.... ورجعنا للوطن بحمدلله سالمين غانمين...
صورة أخيرة.. وداعا بيروت...
آخ تعبت وأنا أكتب الموضوع وأنزل بالصور... عاد لا يروح تعبي بلاش....
أمانة يابنات لكل من تدخل موضوعي.. تدعي لي إن الله يسخر لي زوجي ويجمع بينا في الخير ويحفظ لنا عيالنا عبدالله وفجر من كل شر ويبعد عنا عين الحساد.....